Read tshwa Mitsengo 1 Bible Online

Mitsengo 1 - tshwa bible

Mitsengo 1

¹Jehova i lo wulawula ka Mosi na va hi le xiwuleni xa Sinai, lomu ka tenda ga mutlhangano, hi siku go ranga ga hweti ya wumbiri, ka lembe ga wumbiri ga kuhuma kabye hi le Gipite, aku:

²Hlayani vontlhe vanana va ka Israeli hi mingango yabye ni tixaka ta vararu vabye, mu hlaya a mavito ya vavanuna vontlhe hi munwe-munwe, [1]

³kusukela ka va 20 wa malembe kuya mahlweni mu hlaya vavanuna vontlhe lava va zi kotako ku hloma matlhari ka vanana va ka Israeli; wena na Aroni mu ta va hlaya hi mabutho yabye,

⁴ku tava kona zinwe na nwina a wanuna munwe wa lixaka ni lixaka, loyi a nga hloko ya yindlu ya vararu vakwe.

⁵Laya hi mavito ya vavanuna lava va ta nga mu vuna: Le lixakeni la Rubeni, Elizura nʼwana wa Xedura;

⁶ka Simeoni, Xelumieli a nʼwana wa Zurixadayi;

⁷ka Juda, Naxoni nʼwana wa Aminadaba;

⁸ka Isakari, Netaneli a nʼwana wa Zuare;

⁹ka Zebuloni, Eliba a nʼwana wa Heloni;

¹⁰ka vana va Josefa: ka Efraime, Elixama a nʼwana wa Amihudi; ka Manasa, Gamalieli a nʼwana wa Pedazura;

¹¹ka Benjamini, Abidani a nʼwana wa Gideoni;

¹²ka Dani, Ahiezere a nʼwana wa Amixadayi;

¹³ka Axeri, Pagieli a nʼwana wa Okrani;

¹⁴ka Gadi, Eliasafa a nʼwana wa Reueli;

¹⁵ka Naftali, Ahira a nʼwana wa Enane.

¹⁶Lava hi vona va vitanilweko le tlhanganweni, na va hi vona tihosana ta tixaka ta tiyindlu ta vararu vabye; ti nga tona tihosi ta matala ya ka Israeli.

¹⁷Mosi na Aroni va lo ramba madota laya ma langilweko hi mavito.

¹⁸Zonake hi siku go sangula ga hweti ya wumbiri, va lo vitana a tlhangano wontihe, va lo tsaliwa hi tinyangwa tabye ni mingango yabye, na va hlayiwa hi vito ga munhu ni munhu kusukela ka lava va nga ni 20 wa malembe ni kuya mahlweni.

¹⁹Lezo Mosi i lo va hlaya le xiwuleni xa Sinai, khwatsi hi lezi Jehova a mu leleteleko.

²⁰Ku lo tsaliwa a vanana va Rubeni, a matewula ya Israeli, hi zizukulwana zabye ni mingango yabye, ku hlayiwa a vito ga munwe ni munwani wa vavanuna lavo va nga hi ni 20 wa malembe ni kuya mahlweni, vontlhe lava va nga zi kota ku hloma matlhari.

²¹Lava va hlayilweko va lixaka la ka Rubeni, va wa hi 46,500.

²²A vana va Simeoni, a zizukulwana zabye hi mingango yabye, hi tixaka tabye, lava va hlayilweko hi mavito, vavanuna vontlhe hi tihloko tabye; kusukela ka lava va nga ni 20 wa malembe, ni kuya mahlweni, vontlhe vavanuna lava va zi kotako ku hloma matlhari.

²³Lava va hlayilweko va lixaka la ka Simeoni, va wa hi 59,300.

²⁴A vana va Gadi, a zizukulwana zabye hi mingango yabye ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va 20 wa malembe, ni kuya mahlweni;

²⁵lava va hlayilweko va lixaka la ka Gadi, va wa hi 45,650.

²⁶A vana va Juda, a zizukulwana zabye hi mingango yabye, ni tixaka tabye lava va hlayilweko hi mavito, a vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

²⁷lava va hlayilweko va lixaka la ka Juda, va wa hi 74,600.

²⁸A vana va Isakari, a zizukulwana zabye hi mingango yabye, ni tixaka tabye a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

²⁹lava va hlayilweko va lixaka la ka Isakari, va wa hi 54,400.

³⁰A vana va Zebuloni, a zizukulwana zabye hi mingango yabye, ni tixaka tabye, a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

³¹lava va hlayilweko va lixaka la ka Zebuloni, va wa hi 57,400.

³²A vana va Josefa: Ka nyangwa ya Efraime, a zizukulwana zabye hi mingango yabye, ni tixaka tabye, a ku hlaya mavito ya vavanuna vontlhe lava va zi kotako ku hloma matlhari; kusukela ka lava va nga ni 20 wa malembe, ni kuya mahlweni;

³³lava va hlayilweko va lixaka la ka Efraime, va wa hi 40,500.

³⁴Ka nyangwa ya ka Manase, a zizukulwana zabye hi mingango yabye, ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

³⁵lava va hlayilweko va lixaka la ka Manase, va wa hi 32,200.

³⁶A vana va Benjamini, a zizukulwana zabye hi mingango yabye, ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

³⁷lava va hlayilweko va lixaka la ka Benjamini, va wa hi 35,400.

³⁸A vana va Dani, a zizukulwana zabye hi mingango yabye ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

³⁹lava va hlayilweko va lixaka la ka Dani, va wa hi 62,700.

⁴⁰A vana va Axeri, a zizukulwana zabye hi mingango yabye, ni tixaka tabye, a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

⁴¹lava va hlayilweko va lixaka la ka Axeri, va wa hi 41,500.

⁴²A vana va Naftali, a zizukulwana zabye hi mingango yabye, ni tixaka tabye, a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;

⁴³lava va hlayilweko va lixaka la ka Naftali, va wa hi 53,400.

⁴⁴Lava hi lava va hlayilweko hi Mosi na Aroni, zinwe ni 12 wa madota ya ka Israeli, lava va nga tihosana ta tixaka ta ka Israeli; loyi ni loyi i wa hi hosana ka ngango wa vararu vakwe.

⁴⁵Zinghaho vontlhe a vanana va ka Israeli lava va hlayilweko hi mingango ya vararu vabye, kusukela ka lava va nga ni 20 wa malembe, ni kuya mahlweni, na va hi vavanuna lava va zi kotako ku hloma matlhari vontlhe;

⁴⁶a tsengo wa vontlhe lava va hlayilweko va wa hi 603,550. [2]

⁴⁷Kanilezi a vana va Levi, hi lixaka la raru wabye, vona a va hlayiwangi.

⁴⁸Hakuva Jehova i wa layile Mosi, aku:

⁴⁹A lixaka la ka Levi, u nga va hlayi xikari ka vanana va ka Israeli.

⁵⁰Kanilezi u ta veka mandleni ya vanana va ka Levi a tabemakeli ga wumboni ni zontlhe zibya za gona, ni zontlhe lezi zi lumbako gona. Vona va ta rwala a tabemakeli ni nhunzu yontlhe ya gona; va tira a ntiro wa gona, ni lezaku va ta gova kusuhani ni tabemakeli va gi rinzela.

⁵¹Kasi loku a tabemakeli gi Suka, a vaLevi va ta gi tlhatlha, ni loku a tabemakeli gi yimiswa, a vaLevi va ta gi zimekela; kanilezi a wamatiko loye a tshinelako kusuhani ka gona i ta dawa.

⁵²A vanana vanwani va ka Israeli va ta gova, loyi ni loyi ka wutshamu gakwe, kusuhani ni mujeke wabye hi mabutho yabye.

⁵³Kanilezi a vaLevi va ta gova kusuhani ni tabemakeli ga wumboni, va gi ranzela, kasi a zanga ya mina yi nga dzuki yi vukela a tlhangano wa vanana va ka Israeli; hikwalaho a vaLevi va ta hlayisa a tabemakeli ga wumboni.

⁵⁴Zinghaho a vanana va ka Israeli va lo maha zontlhe kota lezi Jehova a leleteleko ka Mosi; va lo maha zalezo.