Read tshwa Mitsengo 10 Bible Online

Mitsengo 10 - tshwa bible

Mitsengo 10

¹Jehova i lo byela Mosi, aku:

²Ti mahele mipunzu mimbiri ya siliva; u yi maha hi siliva yi fulilweko. U ta vitana ha yona a hlengeletano, ni ku andlamukisa wugovelo.

³Ku taku loku yi biwa, a hlengeletano wontihe wu tsombana ka wena le nyangweni ya tenda ga mutlhangano.

⁴Kanilezi loku ku biwa punzu munwe basi, ku ta tsombana tihosana, ti nga tinduna ta matala ya ka Israeli.

⁵Ku taku loku ku biwa mipunzu, lava va goveleko le Mutsuwuka-gambo va suka.

⁶Ni loku muba mipunzu a khati ga wumbiri, lava va goveleko le Dzongeni va ta suka. Ku ta biwa mipunzu loku wugovelo gi lava ku suka.

⁷Kanilezi loku mu vitana a hlengeletano, mu taba mipunzu, kanilezi hi ginwani bela.

⁸Mbapristi, a vana va Aroni, lava va ta ngaba mipunzu. Lexo xi tava xileletelo xa kala kupinzuka ka zizukulwana za nwina.

⁹Ni loku mu hloma yimpi lomu tikweni ga nwina a ku yalwa ni valala va nwina lava va mu vukelako, mu taba mipunzu yo hlomisa, zonake mu ta alakanywa mahlweni ka Jehova, Nungungulu wa nwina, mu hlangutwa mandleni ya valala va nwina.

¹⁰Hambu masikwini ya nwina ya kutsaka, ni lomu mibuzweni ya nwina, ni kusanguleni ka hweti, mu taba mipunzu, na mu kari mu nyikela miphahlelo ya kuhiswa ni ya kubonga yi maha lezaku mu alakanyiwa mahlweni ka Nungungulu wa nwina. Hi mina Jehova, Nungungulu wa nwina. Va ka Israeli va andlamuka le Sinai.

¹¹Ku te hi lembe ga wumbiri, ka hweti ya wumbiri, hi siku ga 20, a refu gi suka le hehla ka tabemakeli ga wumboni.

¹²Zonake a vanana va ka Israeli va lo andlamuka le xiwuleni xa Sinai, va famba hi mipfhuka yabye; zonake a refu gi loya yima le xiwuleni xa Parani.

¹³Va lo sangulisa a pfhumba gabye hi kulaya ka Jehova, kota lezi a leleteleko Mosi.

¹⁴Va lo rangelwa hi nghapa ya wugovelo ga ka Juda; va lo andlamuka hi mabutho yabye. A yimpi ya ka Juda yi lo rangelwa hi Naxoni a nʼwana wa Aminadaba;

¹⁵a nduna ya yimpi ya lixaka la vanana va ka Isakari hi Netaneli, a nʼwana wa Zuari;

¹⁶ni nduna ya yimpi ya lixaka la ka Zabuloni hi Eliabe a nʼwana wa Heloni.

¹⁷Zonake a tabemakeli gi tlhatlhiwa, ni vanana va ka Gerxoni, ni vanana va ka Merari va lo suka na va rwele a tabemakeli.

¹⁸Zonake ku lo suka a mabutho ya wugovelo ga ka Rubeni na ma rangelwa hi nghapa yabye. Eliazura a nʼwana wa Xedura i wa hi nduna ya yimpi leyo.

¹⁹A nduna ya yimpi ya lixaka la vanana va ka Simeoni hi Xelumieli a nʼwana wa Zurixadayi;

²⁰a nduna ya yimpi ya vanana va ka Gadi hi Eiiasafa a nʼwana wa Deueli.

²¹Zonake ava ka Kohati, a varwali va zibya zo basa, va lo andlamuka; a vo ranga va lo yimisa a tabemakeli va longisela a kuta kabye.

²²Ku lo suka mabutho ya wugovelo ga va ka Efraime na va rangelwa hi nghapa yabye. Elixima a nʼwana wa Amihudi i wa hi nduna wa yimpi leyo.

²³A nduna ya yimpi ya lixaka la vanana va ka Manase hi Gamalieli a nʼwana wa Pedazura.

²⁴Ni nduna ya yimpi ya lixaka la vanana va ka Benjamini hi Abidani a nʼwana wa Gideoni.

²⁵Ku lo suka a mabutho ya wugovelo ga ka Dani, hi lenzhako ka wontihe magovelo, na va rangelwa hi nghapa yabye. Ahiezere a nʼwana wa Amixadayi i wa hi nduna ya yimpi leyo.

²⁶Ni nduna ya yimpi ya lixaka la vanana va ka Axeri hi Pagieli a nʼwana wa Okrani.

²⁷A nduna ya yimpi ya lixaka la vanana va ka Naftali hi Ahira a nʼwana wa Enani.

²⁸Ma wa hi ya ku maha lezo a mafambela ya tiyimpi ta vanana va ka Israeli, loku va andlamuka.

²⁹Mosi i te ngalo ka Hobaba, a nʼwana wa Reueli, a muMidiani, a muxade wa Mosi: Hina hiya tikweni legi Jehova a nga ku ngalo: Nzi ta mu nyika gona. A hi fambe hontlhe; hina hi ta ku khoma khwatsi, hakuva Jehova i wulawulile kusasa ha Israeli.

³⁰Hobaba i lo hlamula, aku kakwe: Mina nzi nga ta famba; kanilezi nzi ta tlhelela tikweni ga hina, ni le maxakeni ya mina.

³¹Mosi aku ngalo: U nga hi siyi, mina nza ku kombela, kota lezi u tivako mipfhuka ya hina lomu xiwuleni, wena u tava mahlo ya hina.

³²Loku wena u famba na hina, a kusasa loku Jehova a ta nga ku maha ka hina, hinawu hi ta ku maha ka wena.

³³Va lo andlamuka hi le xitsungeni xa Jehova, va famba a pfhuka wa masiku manharu, ni nghaxa ya xivumelwano xa Jehova yi wa famba mahlweni kabye a pfhuka wa masiku manharu, a ku lava a wutshamu ga kuhumula.

³⁴A refu ga Jehova gi wa hi hehla kabye laha hlikanhini, a kusukeni kabye hi le wugovelweni.

³⁵A kusukeni ka nghaxa, Mosi aku ngalo: Vuka, Jehova! A valala va wena a va hangalaswe, Lava va ku vengako a va panzanywe mahlweni ka wena. [21]

³⁶Ni kurulweni ka yona, i waku: Tlhela, Jehova, Ka mazana ya mazana ya ka Israeli.