Read tshwa Mitsengo 11 Bible Online

Mitsengo 11 - tshwa bible

Mitsengo 11

¹A vanhu va lo sangula ku monya tindleveni ta Jehova. Laha Jehova a nga wa zi zwile, a zanga yakwe yi lo vindluka, zonake a nzilo wa Jehova wu vura xikari kabye, wu mbheta vanhu lava va nga hi magumo ka wugovelo.

²A vanhu va lo rila ka Mosi; na Mosi i lo kombela ka Jehova, zonake a nzilo wu lo timeka.

³Va lo chula a vito ga wutshamu lego ku ngalo Tabera, hakuva a nzilo wa Jehova wu lo vura xikari kabye.

⁴Ni wunyingi ga valuveli lava va nga lomu xikari kabye va lo tatiswa hi kunavela, vonawu a vanana va ka Israeli va lo engeta va rila, vaku: Himani a ta nga hiha a nyama, higa ke? [22]

⁵Hina ha alakanya a zidluwani lezi hi nga kari higa kota kuranza ka hina le Gipite, a mariwa, a makhalavatla, ni soboya, ni sobolinya, ni timbura.

⁶Makunu a timbilu ta hina ti womile; hakuva laha ku hava nchumu, ahandle ka manna lawa ma nga mahlweni ka hina basi.

⁷Ni manna ma wa fanana ni timbewu ta korianderi, ti woneka ku khwatsi ngwa bedelima. [23]

⁸A vanhu va wo hangalaka va famba va rolela manna; va ma gaya hi zigayo, kutani ku kanza hi machuri, va ma bhika lomu timbiteni va maha timbunzu; ni kunanziha ka wona ku wa fanana ni ka timbunzu ti bhikilweko hi mafura.

⁹Ku waku loku a nzhokati yiwa laha misaveni ni wusiku, wonawu manna mawa.

¹⁰Zonake Mosi i lozwa vanhu na va rila lomu mingangweni yabye, loyi ni loyi na hi laha nyangweni ya tenda gakwe. Jehova i lo zangara nguvu, na Mosi i lo karateka,

¹¹Zonake Mosi aku ka Jehova; U karatela yini a nanza ga wena; hikuyini u nga nzi zweliko wusiwana, lezi u nzi binzisako hi nzhwalo wa vontlhe vanhu lava ke?

¹²Xana nzi mina dadani ni mamani wa vanhu lava vontlhe ke? Kutani nzi va pswalile, laha u nga ta ngha uku ka mina: va beleke khwatsi hilezi mupswali a belekako a nwanana loyi a mu anwisako, kala va chikela tikweni legi u tsumbisileko vararu vabye ke?

¹³Nzi ta yi kuma kwihi a nyama ya ku nyika lava vanhu ke? Hakuva vo nzi rilela, vaku ka mina: Hi nyike nyama, higa.

¹⁴A nzi zi koti ku rwala vontlhe lava vanhu nzoce, hakuva va nzi binza.

¹⁵Loku zi nghaho, nza ku kombela lezaku u nzi zwela wusiwana u nzi daya zalezi, kasi nzi nga ha woni a hlomulo lowu.

¹⁶Zonake Jehova aku ka Mosi: Nzi vitanele 70 wa masingalakati ya va ka Israeli, lava u va tivako lezaku hi vona tihloko ta vanhu, ni kuva madota ya ku xuxa timhaka; u va neha lomu tendeni ga mutlhangano, va ta ta yima laho zinwe na wena. [24]

¹⁷Mina nzi ta relela, nzi ta wulawula na wena kwalaho; nzi ta pambu a a moya lowu wu nga ka wena, nzi wu chela hehla kabye, vona va ta rwala zinwe na wena a nzhwalo wa vanhu, kasi u nga rwali wece.

¹⁸Wena u ta byela vanhu, uku: Ti basiseleni ga manziko, mu taga nyama, kota lezi mu nga wa rila tindleveni ta Jehova, muku: Himani a ta nga hi nyika nyama higa, hakuva hi wa tshamekile le Gipite? Makunu Jehova i ta mu nyika a nyama muga.

¹⁹Mu nga taga siku ginwe basi, hambu masiku mambiri, kutani masiku manharu, kutani ntlhanu wa masiku, kutani khume ga masiku, ge hambu makume mambiri ya masiku basi;

²⁰kanilezi mu taga hweti yontlhe, yi kala yi huma hi lomu tinhovini ta nwina, mu swireka ha yona, hakuva nwina mu kanyisile Jehova loyi a nga xikari ka nwina, mu kala mu rila mahlweni kakwe, muku: Hi humele yini le Gipite ke?

²¹Mosi i te ngalo: A vanhu lava nzi nga xikari ka vona i 600,000 wa vavanuna, kanilezi wena u ngalo: Nzi ta va nyika a nyama vaga hweti yontlhe.

²²Xana va ta dayelwa tiyivu ni tihomu, ku kala va enela ke? Kutani ku ta tsomhanyiswa zidluwani zontlhe za bimbi zo kala va enela ke?

²³Jehova i te ngalo ka Mosi: Xana a canja ga Jehova gi komile ke? Makunu wena u ta wona zalezi kutani timhaka ta mina ti ta maheka kutani ti nga ta maheka. [25]

²⁴Zonake Mosi i lo huma a ya hlawutela vanhu a timhaka ta Jehova. I lo tsombanyisa a 70 wa masingalakati ya vanhu, a va yimisa va ranzela a Tenda.

²⁵Zonake Jehova i lo relela hi refu, a ta wulawula na Mosi, zonake i lo pambula a moya lowu wu nga wa hi hehla ka yena a wu chela hehla ka 70 wa masingalakati. Laha a moya wu nga wa relele hehla kabye, va lo profeta, kanilezi a va ha engetangi kambe.

²⁶Makunu ku wa sele vavanuna vambiri le wugovelweni, a vito ga munwe i wa hi Eldade, ni vito ga munwani i wa hi Medade; a moya wu lowa hehla kabye, na va hi lava va tsalelweko, a va yangi le Tendeni; va lo profeta lomu wugovelweni.

²⁷A jaha ginwani gi lo tsutsuma gi ya byela Mosi, giku: Eldade na Medade va profeta le wugovelweni.

²⁸Zonake Joxua a nʼwana wa Nuni, loyi a nga hi nanza ga Mosi kusukela wunwananeni gakwe, aku ngalo ka Mosi: Hosi yanga Mosi, va beletele!

²⁹Mosi aku ka yena: U na ni mona ha mina ke? Mawako ku khwatsi a vanhu vontlhe va Jehova va nga profeta, ku khwatsi Jehova a nga chela a Moya wakwe hehla kabye!

³⁰Zonake Mosi i lo tlhelela wugovelweni zinwe ni masingalakati ya ka Israeli.

³¹Zonake Jehova i lo pupuxa a mheho, yi neha tihwari na ti humela tlhelo ga bimbi, ti wela matlhelo wontihe ya wugovelo, ku khwatsi i pfhuka wa siku ku renzelekela laha wugovelweni, ku wa ku khwatsi mikono mimbiri hehla ka misava. [26]

³²Zonake a vanhu kusukela a siku lego gontlhe, ni wusiku gontlhe, ni siku gi gamelako gontlhe, va lo rolela tihwari; loyi a nga rolela titsongwani hi loyi a nga tatile khume ga tihomer. Va lo ti anekela lomu wugovelweni.

³³Laha na nyama ya ha hi lomu menweni yabye, na yi nga se mbhela, a zanga ya Jehova yi lo vindlukela vanhu, Zonake Jehova a lamata vanhu hi mhango ya hombe nguvu.

³⁴Zonake va lo chula a vito ga wutshamu lego Kibrot-Hatava, hakuva laho ku lo kelelwa a vanhu va mbilukelako.

³⁵A vanhu va lo andlamuka laho Kibrot-Hatava, va famba kala va ya chikela le Hazerote, va ya yima laho Hazerote.