Read tshwa Mitsengo 12 Bible Online

Mitsengo 12 - tshwa bible

Mitsengo 12

¹Makunu Miriamu na Aroni va lo hleva Mosi hi kota ya wasati wa muKuxe loyi a nga mu tekile; hakuva i wa tekile wasati wa muKuxe.

²Vaku ngalo: Kasi Jehova i lo wulawula ka Mosi yece ke? Kasi a nga wulawulangi nchumu ka hina ke? Jehova i lo zizwa.

³Kanilezi inaloyi Mosi i wa hi munhu wo rula nguvu ku hunza vanhu vontlhe va nga laha misaveni.

⁴Zonake Jehova i lo wulawula hi xitshuketi ka Mosi na Aroni na Miriamu, aku: Humani, nwina vanharu, muya le tendeni ga mutlhangano! Va lo huma hi wunharu gabye va famba.

⁵Jehova i lo relela hi refu a yima laha nyangweni ya Tenda, a vitana Aroni na Miriamu. Va lo huma hi wumbiri gabye.

⁶Zonake aku ngalo: Zwanani timhaka ta mina! Loku ku hi kona muprofeti xikari ka nwina, mina Jehova nzi ti tivekisa ka yena hi miwoniso, nzi wulawula naye hi miloro.

⁷Kanilezi a nzi mahi lezo ka Mosi, a nanza ga mina; i tsumbekile a ndlwini ya mina yontlhe;

⁸yena nzo wulawula naye hi nomu, nzi ti kombisa ka yena futsi, na ku nga hi mifihlakalo, kanilezi yena o si wona xiwumbeko xa zinene xa Jehova. Hikuyini mu nga kala ku chava ku hleva a nanza ga mina, Mosi ke? [27]

⁹A zanga ya Jehova yi lo va vindlukela; zonake i lo suka.

¹⁰Laha a refu gi nga suka hehla ka tenda, languta, Miriamu i lo basa hi hlokonho khwatsi i gapongo; Aroni i lo cuwuka Miriamu, a wona lezaku i wa hi ni hlokonho.

¹¹Zonake Aroni aku ngalo ka Mosi: O! Hosi yanga, nza ku khongotela, u nga hi vekeli nanzu wa kubiha loku hi nga ku maha hi wuphuphulu ga hina.

¹²Ngha Miriamu a nga ku khwatsi hi nwanana loyi a handlilweko, loyi a nyama yakwe yi bolileko na a ha huma hi lomu nzeni ka nyine wakwe!

¹³Zonake Mosi i lo rila ka Jehova, aku: O Nungungulu, nza ku khongotela lezaku u mu hanyisa!

¹⁴Jehova aku ka Mosi: Loku a raru wakwe a mu phelele lomu nghoheni, a nga tava ni tingana ntlhanu wa masiku ni mambiri ke? A valelwe ntlhanu wa masiku ni mambiri lahandle ka wugovelo, anzhako ka lezo i ta wuyiswa kambe. [28]

¹⁵Zonake Miriamu i lo valelwa ntlhanu wa masiku ni mambiri lahandle ka wugovelo; a vanhu a va sukangi kala Miriamu a wuyiswa.

¹⁶Anzhako ka lezo a vanhu va lo andlamuka le Hazerote va ya zima matenda yabye le Parani.