Read tshwa Mitsengo 14 Bible Online

Mitsengo 14 - tshwa bible

Mitsengo 14

¹Wontihe tlhangano wu lo tlakusa a gezu wu kanyuluka, ni vanhu va lo rila mihloti lego wusiku.

²Vontlhe a vanana va ka Israeli va lo ngurela Mosi na Aroni, a tlhangano wontihe wuku ngalo: Mawako ku fela tikweni ga le Gipite, hambu ku fela lomu xiwuleni! [31]

³Xana Jehova i hi nehele yini tikweni legi kasi hi tawa hi matlhari, ni lezaku a vasati va hina, ni vanhanyana va hina va ta khomiwa? A hi chukwana a kuva hi tlhelela Gipite ke?

⁴Va lo wulawula, munwe ni munwani, vaku: A hi ti yimiseleni a murangeli, hi ta tlhela hiya Gipite.

⁵Zonake Mosi na Aroni va lowa lahasi hi tinghohe tabye mahlweni ka tlhangano wontihe wa vanana va ka Israeli.

⁶Zonake Joxua a nʼwana wa Nuni, na Kalebi a nʼwana wa Jefuna, va nga lava va nga yile ku ya hlola tiko, va lo hanzula tinguwo tabye;

⁷va wulawula ni tlhangano wontihe wa vanana va ka Israeli, vaku: A tiko lego hi yileko hi ya gi hlola, gi sasekile nguvunguvu.

⁸Loku Jehova a xalala ha hina, i ta hi enghenisa ka tiko lego, a gi nyika ka hina, gi nga tiko gi khulungako a masi ni wulombe.

⁹Ntsena mu nga ti alisi mu vukela Jehova; kambe mu nga chavi a vanhu va tiko lego, hakuva vona va ta kuva kuga ka hina. A va na wuponelo, hilezi Jehova i na hina; mu nga va chavi.

¹⁰A tlhangano wontihe wu lo lava ku va gandla hi maribye. Kanilezi a kungangamela ka Jehova ku lo woneka hehla ka tenda ga mutlhangano, a mahlweni ka vanana vontlhe va ka Israeli.

¹¹Zonake Jehova aku ka Mosi: A vanhu lava va ta nzi kanyisa kala rini ke? Kala rini na va nga nzi tsumbi, hambu loku nzi mahile a zihlamaliso zontlhe lezi xikari kabye?

¹²Nzi ta va lamata hi ntungu, nzi va mbhetisa, zonake nzi ta maha lixaka la hombe ha wena, leli li ta ngava ni ntamu ku hunza vona! [32]

¹³Mosi aku ka Jehova: VaGipite va ta zizwa, hakuva wena u humesile lava vanhu hi ntamu wa wena u va tisa seno.

¹⁴Na vona va ta byela a vaaki va tiko legi. Vona va zwile lezaku wena Jehova u tshama xikari ka lava vanhu, ni lezaku wena wa kombisa a nghohe ya wena, ni lezaku a refu ga wena gi tshama hehla kabye, ni lezaku laha hlikanhini u famba mahlweni kabye hi refu, ni laha wusikwini kambe u kona hi mhinga ya nzilo.

¹⁵Makunu loku wena u daya lava vanhu khwatsi hi munhu munwe, a vamatiko lava va zwileko wudumo ga wena, va taku ngalo:

¹⁶Jehova i tsanzekile ku enghenisa a vanhu ka tiko legi a nga wa hlambayile lezaku i ta va nyika, makunu i va dele le xiwuleni. [33]

¹⁷Hikwalaho nza ku kombela, lezaku ngha a Hosi yi kombisa a wukulu ga ntamu wa yona, kota lezi u wulileko ku ngalo:

¹⁸Jehova wa nonoka ku zangara, i tele hi wuxinji, wa tsetselela a zionho ni zihambuko; kanilezi a vaonhi a nga va khomi kota lava va nga hiko ni nanzu, kanilezi wa tlhelisela kuonha ka vadadani hehla ka vanana vabye, kala ka xizukulwana xa wunharu ni xa wumune.

¹⁹Tsetselela lava vanhu a kuonha kabye hi wukulu ga wuxinji ga wena, kota lezi u va tsetselelako lava vanhu kusukela Gipite kala laha.

²⁰Zonake Jehova aku: Nzi va tsetselele kota lezi u wulileko.

²¹Kanilezi hakunene kota lezi nzi hanyako, a kungangamela ka Jehova ku ta tata misava yontlhe.

²²Hakuva vontlhe lava vanhu va wonileko kungangamela ka mina ni zihlamaliso lezi nzi mahileko le Gipite, ni lomu xiwuleni, va nzi ringileko khume ga zikhati, kanilezi a va ingisi gezu ga mina.

²³Hikwalaho lava vanhu cima va nga ta wona a tiko legi nzi hlambanyileko ka vararu vabye lezaku nzi ta va nyika gona. Cima a nga kona ni munwe wa lava va nzi kanyisileko, a ta nga wona tiko lego.

²⁴Kanilezi a nanza ga mina Kalebi, loyi a nga ni wunwani moya, loyi a lanzelako hi zinene a ndlela ya mina, nzi ta mu enghenisa ka lego tiko a yako ka gona, gi tava gakwe ni pswalo wakwe.

²⁵Kota lezi vaAmaleki ni vaKanani va akileko lomu nzhelelweni, manziko nwina mu ta tlhela muya xiwuleni hi ndlela ya le Bimbini go Pswhuka.

²⁶Anzhako ka lezo Jehova i lo wulawula ka Mosi na Aroni, aku:

²⁷Ku ta kala rini nzi timisela hi tlhangano lowu wo biha, va ta maha gujeguje kala rini? Mina nzi zwile a kumonya ka vanana va ka Israeli lava va nzi mahelako gujeguje.

²⁸U ta va byela ku ngalo: Kota lezi nzi hanyako, ku wula Jehova, nzi ta mu mahela kota lezi mu wulileko tindleveni ta mina.

²⁹A zirumbi za nwina zi tawa lomu xiwuleni. Nwina nwentlhe lava mu hlayilweko, kusukela ka lava va 20 wa malembe ni kuya mahlweni, lava mu nzi monyileko, [34]

³⁰cima mu nga ta enghena ka tiko legi nzi hlambanyileko lezaku nzi ta mu veka ka gona, ntsena Kalebi a nʼwana wa Jefuna, na Joxua a nʼwana wa Nuni.

³¹Kanilezi a vanana va nwina lava mu nga ku ngalo va ta khomiwa hi valala va nwina, lavoke nzi ta va enghenisa kasi va fela ku tiva a tiko lego nwina mu gi alileko.

³²Kanilezi nwina a zirumbi za nwina zi tawa lomu xiwuleni.

³³Zonake a vanana va nwina va ta nzulanzula lomu xiwuleni 40 wa malembe, na va kari va rwala a nanzu wa ku nga tsumbeki ka nwina, kala ku mbhela a zirumbi za nwina lomu xiwuleni.

³⁴Kota lezi mu mbhetileko 40 wa masiku hi ku hlola a tiko, mu ta rwala milanzu ya nwina 40 wa malembe, a lembe ginwe i siku; kasi mu fela ku zi tiva ku ngalo kuhambana ka mina ko yiniyini!

³⁵Mina Jehova nzi wulile zona, nzi ta maha zalezo ka tlhangano lowu wo biha lowu wu tlhanganako kulwa na mina, va ta mbhela lomu xiwuleni va fela kona.

³⁶Zonake a vavanuna lava Mosi a nga wa va rumile ku ya hlola tiko, lava va nga wa nehile a mubiko wo biha va kucetela mutlhangano wontihe ku monya mahlweni ka Jehova hi ku kanyisa a tiko,

³⁷lava va nga nehile a mubiko wo kanyisa a tiko, va lofa hi tseku mahlweni ka Jehova.

³⁸Kanilezi Joxua a nʼwana wa Nuni, na Kalebi a nʼwana wa Jefuna, lava va nga wa yile ni lava vanhu ku ya hlola tiko, va lo sala va hanya.

³⁹Mosi i lo hlawutela tontlhe timhaka leti ka vanana vontlhe va ka Israeli; zonake a vanhu va lo rila hi hlomulo wa hombe.

⁴⁰Zonake va lo vuka ni mixo va famba, va kanziha hehla ka xitsunga, vaku: Hi laha! hi lava ku kanziha hiya ka wutshamu lego Jehova a gi wulileko, hakuva hina hi onhile. [35]

⁴¹Zonake Mosi aku: Mu hambunyetela yini kuleletela ka Jehova? Cima mu nga ta humelela!

⁴²Mu nga kanzihi, hakuva Jehova a nga kona xikari ka nwina; mu nga ya lamatwa hi valala va nwina;

⁴³hakuva a vaAmaleki ni vaKanani va kona mahlweni ka nwina; nwina mu tawa hi wutlha ga matlhari, hakuva mu fularele Jehova; na Jehova a nga tava zinwe na nwina.

⁴⁴Kanilezi va lo ti kurumeta, va kanziha le hehla ka xitsunga; a nghaxa ya xivumelwano xa Jehova yi wa sele na Mosi, yi wa nga sukangi xikari ka wugovelo.

⁴⁵A vaAmaleki, ni vaKanani, lava va akileko ka lexo xitsunga, va lo relela ya talwa navo, va lo va hlula va va mbheta, va va hlongola kala va chikela le Horma.