Read tshwa Mitsengo 15 Bible Online

Mitsengo 15 - tshwa bible

Mitsengo 15

¹Jehova i lo wulawula ka Mosi, aku:

²Byela a vanana va ka Israeli, uku: Loku mu chikela ka tiko legi nzi mu nyikileko, mu aka ka gona,

³ku taku loku mu humesa munyikelo ka Jehova, wu mahiwako nzilweni, a muphahlelo wa kuhiswa, kutani muphahlelo wa ku tatisa xifungo, kutani munyikelo wa kuranza ka nwina, kutani hi lomu mibuzweni ya nwina; na mu xuva ku nyikela ka Jehova a masema yo nanziha, hi zifuyo lezi za hombe, kutani hi lezi za zitsongwani; [36]

⁴loyi a humesako munyikelo wakwe ka Jehova, i ta nyikela ni muphahlo wa zakuga, a xipanze xa wukhume xa mapa ma nanaselweko, ma vuvilweko hi xipanze xa wumune xa hini ya mafura.

⁵U ta nyikela hi vinya ya xipanze xa wumune xa hini a kuva munyikelo wa zakunwa, zinwe ni yivu yinwe ni yinwani yi phahliwako hi kuhiswa kutani ku tlhabyiwa.

⁶Loku ku hi hamba, u ta nyikela munyikelo wa zipanze zimbiri za wukhume za mapa ma nanaselweko ma vuvilweko hi xipanze xa wunharu xa hini ya mafura,

⁷ni xipanze xa wunharu xa hini ya vinya a kuva munyikelo wa kunwa; u ta zi nyikela a kuva masema yo nanziha ka Jehova.

⁸Loku u nyikela a nkuzi yo maha muphahlo wo hiswa kutani muphahlo wo tatisa xifungo, kutani muphahlo wa kubonga ka Jehova;

⁹u ta nyikela a nkuzi zinwe ni zipanze zinharu za wukhume za mapa ma nanaselweko ma vuvilweko ni khihlanya ga hini ya mafura;

¹⁰u ta nyikela ni khihlanya ga hini ya vinya, a kuva munyikelo wa zakunwa; muphahlelo lowu wu mahiwako hi nzilo, wu nga ni masema yo nanziha ka Jehova.

¹¹Ku ta mahiwa zalezo ka nkuzi yinwe ni yinwani, ni ka hamba yinwe ni yinwani, ni ka xifuyo xinwe ni xinwani xa tiyivu ni timbuti.

¹²Mu ta mahisa zalezo ka xifuyo xinwe ni xinwani khwatsi hi wunyingi ga zona, kani hi xihi.

¹³Loyi ni loyi wa xisumbulwa i ta maha lezi zilo hi ndlela leyo loku a nyikela muphahlelo wa kuhiswa, wu nga ni masema yo nanziha ka Jehova.

¹⁴Ni loku muluveli loyi a akileko xikari ka nwina, kutani hi wihi a ta nga aka xikari ka nwina, loku a lava ku nyikela muphahlo wa kuhiswa, a kuva masema yo nanziha ka Jehova, i ta nyikela kota nwina.

¹⁵Ku tava nayo munwe wa tlhangano, hi lezaku wa nwina ni wa muluveli loyi a akileko xikari ka nwina. Ku tava xileletelo xa kala kupinzuka ka zizukulwana za nwina; ku tava kota yinwe ka muluveli ni ka nwina mahlweni ka Jehova.

¹⁶Ku tava nayo munwe, ni xileletelo xinwe ka nwina ni ka muluveli loyi a akileko xikari ka nwina.

¹⁷Jehova i lo wulawula kambe ka Mosi, aku:

¹⁸Byela a vanana va ka Israeli, uku: Loku mu chikela tikweni legi nzi mu yisako ka gona,

¹⁹laha mu ta ngaga a zakuga za tiko, mu ta pambula a munyikelo wa Jehova.

²⁰Mu ta pambula a xibaba xa xihulo xa nzhimbo wa nwina, a kuva muphahlelo wa kunziwitela; mu ta wu nyikela kota muphahlelo lowu wu nziwitelwako wa xihulo. [37]

²¹Ka timbewu ta nwina to ranga mu ta pambula a munyikelo wa Jehova wu humako ka xihulo xa nzhimbo wa nwina ka zontlhe zizukulwana za nwina.

²²Loku mu onha hi ku hoheta, hi ku nga hlayisi milayo yontlhe leyi Jehova a yi wulileko ka Mosi,

²³zontlhe lezi Jehova a zi leleteleko ka nwina hi nomu wa Mosi, kusukela a siku lego a yimisileko zileletelo kala zizukulwaneni zontlhe za nwina;

²⁴zonake ku taku loku ku onhilwe hi ku hoheta, na tlhangano wu nga zi tivi, a tlhangano wontihe wu ta nyikela a nkuzi ya munyikelo wa kuhiswa, a kuva masema yo nanziha ka Jehova, ni munyikelo wa zakuga, ni munyikelo wa zakunwa, kotisa a nayo wa kona; a tlhangano wu ta nyikela ni mhongo, a kuva muphahlelo wa kuonha.

²⁵A mupristi i ta maha muphahlelo wa nzhiho wa tlhangano wontihe wa vanana va ka Israeli, zonake va ta tsetselelwa, hakuva kuonha loku ku mahilweko hi kuhoheta; na vona va nehile munyikelo wabye, wu nga muphahlelo wu hiselwako Jehova, ni muphahlelo wabye wa kuonha mahlweni ka Jehova, hi kota ya zionho zabye lezi va zi mahileko hi kuhoheta.

²⁶A tlhangano wontihe wa vanana va ka Israeli, ni muluveli loyi a akileko xikari kabye, vontlhe va ta tsetselelwa, hakuva a vanhu lavo va lo onha hi kuhoheta.

²⁷Kasike loku munhu munwe a onha hi kuhoheta, yena i ta nyikela a mbuti ya lembe ginwe a wukale a kuva munyikelo wa kuonha. [38]

²⁸A mupristi i ta mahela a munhu loye a onhileko hi kuhoheta mahlweni ka Jehova a muphahlo wa nzhiho; loku a mahelwe a muphahlelo wa nzhiho, yena i ta tsetselelwa.

²⁹Wu tava nayo munwe ka vanana va ka Israeli ni ka muluveli loyi a akileko xikari kabye. Loku munhu a onha hi kuhoheta, mu tava ni nayo munwe.

³⁰Kanilezi loku munhu a onha ha womu, kutani xisumbulwa kutani muluveli, a onha hi ku kanyisa Jehova; loye munhu i ta tsemiwa xikari ka va ka kabye.

³¹Hakuva i kanyisile a gezu ga Jehova, i hambunyetile kuleletela kakwe; a munhu loye i ta tsemiwa; ni nanzu wakwe wu tava hehla kakwe.

³²Laha a vanana va ka Israeli na va ha hi xiwuleni, va lo kuma munhu na a lava tihunyi hi siku ga sabado.

³³Lava va nga mu kuma na a lava tihunyi va lo mu neha ka Mosi na Aroni, ni ka wontihe tlhangano.

³⁴Va lo mu boha, hakuva ku wa nga se nga wuliwa lezi a ta nga mahiwa zona. [39]

³⁵Jehova i te ngalo ka Mosi: Loyi munhu i ta dawa; a tlhangano wontihe wu ta mu gandla hi maribye lahandle ka wugovelo.

³⁶Zonake a tlhangano wontihe wu lo mu humesa lahandle ka wugovelo, wu mu gandla hi maribye a kala afa, khwatsi hilezi Jehova a leleteleko Mosi.

³⁷Jehova i lo wulawula ka Mosi, aku:

³⁸Byela a vanana va ka Israeli lezaku va ti mahela machakafula va rungela lomu magumo ka tinguwo tabye ka zontlhe zizukulwana zabye, va ma bohelela wontihe matlhelo hi tingotana ta wukuxe. [40]

³⁹A machakafula lawa mu ta ma wona; ni loku mu ma cuwuka mu ta alakanya milayo yontlhe ya Jehova mu yi maha, kasi mu nga pengi hi ku lanzela a timbilu ta nwina ni mahlo ya nwina, a ziro lezi zi mu kokelako wubhayini.

⁴⁰Mu ta alakanya milayo yontlhe ya mina, mu yi maha, zonake mu tava lava va basileko ka Nungungulu wa nwina.

⁴¹Hi mina Jehova, Nungungulu wa nwina, loyi a mu humesileko le Gipite, kasi nzi fela ku maha Nungungulu wa nwina. Hi mina Jehova Nungungulu wa nwina.