Read tshwa Mitsengo 17 Bible Online

Mitsengo 17 - tshwa bible

Mitsengo 17

¹Jehova i lo wulawula ka Mosi, aku:

²Byela a vanana va ka Israeli va ku nehela tinhonga; a nyangwa yinwe ni yinwani va neha nhonga, ku tava 12 wa tinhonga leti ti ta nga huma hi ka tihosana tabye, khwatsi hi tinyangwa ta vararu vabye; u ta tsala a vito ga munhu ni munhu ka nhonga yakwe;

³u tsala a vito ga Aroni ka nhonga ya ka Levi, hakuva a hosana yinwe ni yinwani ya tinyangwa yi tava ni nhonga yinwe.

⁴U ta ti veka lomu ka tenda ga mutlhangano, a mahlweni ka wumboni, laha nzi tlhanganako kona zinwe na nwina.

⁵A munhu loye nzi ta nga mu hlawula, a nhonga yakwe yi ta hluka, zonake nzi ta mbhetisa a zisolo za va ka Israeli lezi va nga nazo ha nwina.

⁶Mosi i lo kanela ka vanana va ka Israeli tontlhe leti timhaka, zonake tontlhe tihosana tabye ti lo neha a tinhonga tabye, a hosana yinwe ni yinwani yi lo neha a nhonga yinwe, khwatsi hi tinyangwa ta vararu vabye, ku wa hi 12 wa tinhonga; a nhonga ya Aroni yi wa hi xikari ka tona.

⁷Zinghaho Mosi i lo veka tinhonga mahlweni ka Jehova, lomu tendeni ga wumboni.

⁸Hi siku gi gamelako Mosi i lo enghena lomu tendeni ga wumboni, zonake i lo wona a nhonga ya Aroni na yi hlukile, leyi yi nga ya nyangwa ya ka Levi; na yi hlukile hakunene yi pfepfa zitsangi, na yi pswele mihanzu yi buvileko. [44]

⁹Zonake Mosi i lo teka tinhonga tontlhe mahlweni ka Jehova, a ti neha ka vanana va ka Israeli; laha na va ti wonile, loyi ni loyi i lo teka a nhonga yakwe.

¹⁰Jehova i te ngalo ka Mosi: Tlhelisa a nhonga ya Aroni mahlweni ka wumboni, yi ta hlayiswa lomo, kasi yi maha xialakanyiso ka vanana va ku hluwuka; u fuvisa zisolo xikari kabye hi kumbheleleko, lezaku va ngafi.

¹¹Mosi i lo maha lezo, i lo maha khwatsi hilezi Jehova a mu leleteleko.

¹²Zonake a vanana va ka Israeli va te ngalo ka Mosi: Languta hi file, hi lova, hontlhe ha lova.

¹³Loyi ni loyi, lava va tshinelako ka tabemakeli ga ka Jehova, ofa. Xana hi ta mbhela hina hontlhe hi kufa ke?