Read tshwa Mitsengo 18 Bible Online

Mitsengo 18 - tshwa bible

Mitsengo 18

¹Jehova i te ngalo ka Aroni: Wena ni vana va wena, ni ngango wa raru wa wena, mu ta rwala a nanzu wa yindlu ya kubasa, ni lezaku wena zinwe ni vana va wena mu ta rwala a nanzu wa wupristi ga nwina.

²U ta tshineta ni vamakabye va wena va nyangwa ya ka Levi, a nyangwa ya raru wa wena, va tava zinwe na wena va ku tirela, laha wena ni vana va wena na mu kari mu khozela mahlweni ka tenda ga wukustumunyu.

³Vona va ta ku vuna ntirweni wa wena, ni ka mitiro yontlhe ya tenda; kanilezi va nga dzuki va henya a zibya za wutshamu ga kubasa ni alati, mu ngafa zinwe navo.

⁴Kanilezi va tava zinwe na wena, va hlayisa a tenda ga mutlhangano, ni yontlhe mitiro ya tenda; kanilezi ngha ku nga hi kona a muluveli a tshinelako ka nwina.

⁵Mu ta hlayisa a zibya za wutshamu ga kubasa ni ntiro wa alati, kasi a zanga yi nga engeti yiva kona hehla ka vanana va ka Israeli.

⁶Langutani, nzi tekile a vamakabye va nwina, a va ka Levi, nzi va susa xikari ka vanana va ka Israeli; va nyikelwe ka nwina ni ka Jehova, kasi va tira a ntiro wa tenda ga mutlhangano.

⁷Kanilezi wena ni vana va wena, mu ta tira a ntiro wa wupristi ga nwina ka zontlhe za alati, ni ka lezi zi nga lomu nzeni ka xisirelo; mu tira a ntiro wa nwina lomo. A wupristi i ntiro wu nga xinyikiwo xa nwina ntsena, kanilezi a mupfhumba loyi a tshinelako lomo i ta dawa.

⁸Jehova i lo wulawula kambe ka Aroni, aku: Languta, zontlhe lezi zi basileko, lezi a vanana va ka Israeli va zi nyikelako ka mina, nzi ku nyikile wena. Nzi ku nyikile zona, kasi zi avelwa ka wena ni vana va wena, xi tava xiavelo xa kala kupinzuka.

⁹A xikari ka zilo lezi zi basileko, ahandle ka lezi zi hisiwako, a za wena hi lezi: hi minyikelo yabye yontlhe, ni minyikelo yabye ya zakuga, ni miphahlo yontlhe ya kuonha, ni miphahlo yontlhe ya milanzu, leyi va ta nga maha minzhiho ka mina; zontlhe zilo lezi zi basileko nguvu zi tava za wena ni vana va wena.

¹⁰U ta zi gela wutshanwini ga kubasa nguvu, vontlhe vavanuna a vage; zilo zi basileko ka wena. [45]

¹¹Lezi zi ta ngava za wena kambe hi lezi: lezi zi humako lomu minyikelweni ya ku nziwitela ya vanana va ka Israeli; nzi yi nyikile wena ni varisanyana va wena ni vanhanyana va wena, xona xi tava xiavelo xa kala kupinzuka. Vontlhe lava va hlazekileko va yindlu ya wena va taga.

¹²Nza ku nyika yontlhe mihanzu yo saseka leyi va ta nga neha ka Jehova, ni zontlhe zo saseka za mafura, ni zontlhe zo saseka za vinya, ni mavele.

¹³Yontlhe mihanzu yo ranga yi nga lomu tikweni gabye leyi va ta nga neha ka Jehova, yi tava ya wena. Vontlhe lava va hlazekileko lomu ndlwini ya wena Va taga.

¹⁴Zontlhe lezi zi ta nga vekelwa Nungungulu hi va ka Israeli, zi tava za wena.

¹⁵A matewula wontihe ya nyama yontlhe lawa ma nyikelwako ka Jehova, kutani nja vanhu, kutani nja zifuyo, ma tava ya wena. Ntsena lezaku u ta tirula matewula ya vanhu, ni matewula ya lezi zi nga hlazekangiko. [46]

¹⁶U ta ma tirula na ma hi ni hweti yinwe a wukale ni lawa ma hunzako, hi ku ringanyisa ka ntlhanu wa maxekeli, hi xekeli ga wutshamu ga kubasa, legi gi nga ni 20 wa magera.

¹⁷Kanilezi a matewula ya tihomu, ni matewula ya tiyivu, ni matewula ya timbuti, u nga ma tiruli hakuva ma basile. U ta nwatsekela a nkhata wa kona laha alatini, zonake u hisa mafura ya kona, kasi u maha a muphahlo wa kuhiswa, a kuva masema yo nanziha ka Jehova.

¹⁸A nyama ya kona yi tava ya wena, zinwe ni xifuva xi nziwitelweko, zinwe ni nenge wa xinene. [47]

¹⁹A minyikelo yontlhe leyi yi basilefeo, leyi a vanana va ka Israeli va yi nyikelako ka Jehova, nzi yi nyikile ka wena zinwe ni vana va wena, lezo zi tava xiavelo xa kala kupinzuka. Xivumelwano xa munyu xi tiyileko kala kupinzuka mahlweni ka Jehova, lexi xi ta ngava ka wena ni ka zizukulwana za wena.

²⁰Jehova i lo wulawula ka Aroni, aku: Wena u nga ta kuva ni tshomba lomu tikweni gabye, wena u nga tava ni xiavelo xikari kabye; hakuva mina nzi xiavelo xa wena ni tshomba ya wena xikari ka vanana va ka Israeli. [48]

²¹Languta, mina nzi nyikile a vanana va ka Levi, a minyikelo ya zontlhe za wukhume, lezi zi humeswako hi va ka Israeli, zi tava tshomba yabye, hi kota ya ntiro lowu va tirako lomu ka tenda ga mutlhangano.

²²Kasi a vanana va ka Israeli va nga ha tshineli kusuhani ka tenda ga mutlhangano, ku nga taku va ti rwexa a nanzu vafa.

²³Hilezo a vaLevi va ta tira a ntiro wa tenda ga mutlhangano, va rwala a nanzu wabye. Lexi xi tava xileletelo xa kala kupinzuka zizukulwaneni za nwina; va nga tava ni tshomba xikari ka vanana va ka Israeli.

²⁴Hakuva a xipanze xa wukhume lexi a vanana va ka Israeli va ta nga nyikela ka Jehova, nzi nyikile vaLevi, xi tava tshomba yabye. Hi kota ya lezo nzi wulile lezaku va nga tava ni tshomba lomu xikari ka vanana va ka Israeli.

²⁵Jehova i lo wulawula ka Mosi, aku:

²⁶Byela a vaLevi lezaku: Loku mu amukela xipanze xa wukhume ka vanana va ka Israeli, lexi nzi mu nyikako a kuva tshomba ya nwina, nwinawu mu ta susa xipanze xa wukhume ka zona mu nyikela ka Jehova.

²⁷Ni munyikelo wa nwina wu ta hlayelwa ka nwina kota munyikelo wa mavele, ni wunyingi ga zigowolo za vinya.

²⁸Zinghaho mu ta nyikela ka Jehova a xipanze xa wukhume xa zontlhe lezi mu ta nga zi amukela ka vanana va ka Israeli; zonake mu ta nyikela a munyikelo wa Jehova ka mupristi Aroni.

²⁹Ka zilo zontlhe lezi mu ta nga nyikiwa, mu ta susa xipanze xa kusaseka mu nyikela ka Jehova; ka zilo zontlhe zo saseka mu ta susa a xipanze xi mbheleleko mu nyikela, lowo munyikelo wu basileko.

³⁰Hikwalaho u taku kabye: Loku mu nyikela hi lezi zo saseka nguvu, zi ta hlayelwa a vaLevi, kukotisa mavele ni vinya zi nyikiwaho hi vanwani.

³¹Nwina mu ta ziga ni ka gihi wutshamu, nwina ni mingango ya nwina; hakuva i nchachazelo wa nwina wa mitiro ya nwina leyi mu tirako lomu tendeni ga mutlhangano.

³²Loku mu nyikele hi lezi zi sasekileko nguvu cima mu nga tava ni nanzu; kanilezi mu nga hanahanisi a zinyikiwo lezi zi basileko za vanana va ka Israeli, mu ngafa.