Read tshwa Mitsengo 19 Bible Online

Mitsengo 19 - tshwa bible

Mitsengo 19

¹Jehova i lo wulawula ka Mosi na Aroni, aku:

²Lexi hi xilayelo xa nayo lowu Jehova a leleteleko lezaku: Byela a vanana va ka Israeli va ku nehela a pswele ga homu yo pswhuka, yi nga hiko na bawa, yi nga solekiko, yi nga tlhatekwangiko muyoko.

³Mu yi nyikela ka mupristi Eliazare, va ta huma nayo lahandle ka wugovelo, va ya yi tlhava mahlweni kakwe. [49]

⁴Mupristi Eliazare i ta teka a nkhata wa homu hi litiho lakwe a nwatsekela ha wona ntlhanu wa zikhati ni zimbiri matlhelweni ya nyangwa ya tenda ga mutlhangano.

⁵Zonake va ta hisa a homu mahlweni kakwe; va ta hisa ni bhebhe ga kona zinwe ni nyama ya kona ni nkhata wa kona ni swanyi. [50]

⁶Mupristi i ta teka a sinya ya sedari, ni hisope ni woya go pswhuka, a zi hoxa laha nzilweni, laho ku swako a homu.

⁷Zonake a mupristi i ta hlaza tinguwo takwe, a hlamba a miri wakwe lomu matini, zonake a nga enghena lomu wugovelweni; kanilezi i tava a nga hlazekangi kala laha gambyeni.

⁸Ni kambe a munhu loyi a hisileko a homu i ta hlaza tinguwo takwe lomu matini, a hlamba a miri wakwe; i tava a nga hlazekangi kala laha gambyeni.

⁹A munhu loyi a hlazekileko i ta wota a khuma ga homu, a ya gi chela wutshanwini ga kubasa, lahandle ka wugovelo, kasi ga lonzowotelwa a tlhangano wa vanana va ka Israeli a kuva mati yo basisa zionho; wu hi muphahlo wa kuonha.

¹⁰Loyi a wolileko a khuma ga homu, i ta hlaza tinguwo takwe, a nga hlazeki kala laha gambyeni. Lexi xi tava xileletelo xa kala kupinzuka xikari ka vanana va ka Israeli, ni ka muluveli loyi a nga xikari kabye.

¹¹Loye a khumbako xirumbi xa munhu i tava a nga hlazekangi ntlhanu wa masiku ni mambiri.

¹²I ta ti basisa hi siku ga wunharu hi mati lawa ni siku ga wuntlhanu ni mambiri, zonake i tava a hlazekile. Kanilezi loku a nga ti basisi hi siku ga wunharu ni ga wuntlhanu ni mambiri, a nga ta hlazeka.

¹³Loyi a khumbako a xirumbi xa munhu a nga ti basisi, i nyenyezisile a yindlu ya Jehova. Loye munhu i ta tsemiwa xikari ka va ka Israeli, hilezi a nga nwatsekelwangi a mati ya kubasisa; wa ha yilile, a kunyenyeza kakwe ka ha hi hehla kakwe.

¹⁴Hi lowu nayo loku munhu a fela lomu tendeni: vontlhe lava va enghenako lomo tendeni, ni vontlhe lava va nga lomo va tava va nga hlazekangi ntlhanu wa masiku ni mambiri.

¹⁵A zibya zontlhe lezi zi nga fenengetwangiko, zi nga hava zifenengeto zi bohelweko ka zona, zi tava zi nga hlazekangi.

¹⁶Kasi hi wihi loyi a khumbako a xirumbi xa munhu a delweko hi tlhari le khwatini, kutani xirumbi xa munhu wo ti fela, kutani marambu ya vanhu, kutani xilahla, i tava a nga hlazekangi ntlhanu wa masiku ni mambiri.

¹⁷A munhu loye a nga hlazekangiko va ta mu nusela a khuma ga muphahlo wa kuonha, zonake va ta chela a mati ma basileko hehla ka gona lomu xibyeni.

¹⁸Zonake a munhu loyi a hlazekileko i ta teka hisope a yi peta lomu matini, a nwatsekela a tenda ni zibya zontlhe, ni vanhu yontlhe lava va nga kona, munhu loyi a khumbileko marambu, hambu munhu loyi a delweko, hambu xirumbi, hambu xilahla.

¹⁹A munhu loyi a hlazekileko i ta nwatsekela a munhu loyi a nyenyezileko hi siku ga wunharu, ni siku ga wuntlhanu ni mambiri. Zonake i ta hlaza tinguwo takwe, a hlamba lomu matini, laha gambyeni i tava a hlazekile.

²⁰Kanilezi a munhu loyi a nga hlazekangiko a nga ti basisi, a munhu loye i ta tsemiwa xikari ka tlhangano, hakuva i nyenyezisile a wutshamu ga kubasa ga Jehova; ni mati ya kubasisa a ma nwatsekelwangi hehla kakwe, i nyenyezile.

²¹Lexi xi tava xilayelo xa kala kupinzuka ka vona. Loyi a ta nga nwatsekela hi mati ya kubasisa, i ta hlaza tinguwo takwe; ni loyi a ta nga khumba a mati ya kubasisa, i tava a nga hlazekangi kala laha gambyeni.

²²Ni zontlhe lezi zi khumbilweko hi munhu a nyenyezileko zi tava zi nga hlazekangi; ni loyi a mu khumbako i tava a nga hlazekangi kala laha gambyeni.