Read tshwa Mitsengo 21 Bible Online

Mitsengo 21 - tshwa bible

Mitsengo 21

¹Laha Arade, a hosi ya vaKanani, loyi a nga wa akile le Dzongeni, na zwile lezaku Israeli wata hi ndlela ya Atarima, i lolwa navo a khoma vanwani.

²A va ka Israeli va lo funga ka Jehova, vaku: Loku futsi u nyikela lava vanhu mandleni ya hina, hi ta lovisa a miti yabye, bhi!

³Jehova i lo ingisa a gezu ga va ka Israeli, a nyikela a vaKanani ni miti yabye; va lo va hihirita vontlhe, bhi! Va lo chula a vito ga wutshamu lego ku Horma.

⁴Zonake va lo andlamuka le xitsungeni xa Hore hi ndlela ya le Bimbini go Pswhuka, va potsoloka a tiko ga Edomi. Kanilezi a vanhu va lo mbhela ntamu hi kota ya ndlela.

⁵Va lo sola Nungungulu na Mosi vaku: Hikuyini mu hi humesa le Gipite, hi ta fela lomu xiwuleni ke? Lomu ku hava zibaba, ku hava mati; a timbilu ta hina ta swihala hi zihabana lezi zi nga vuniko nchumu.

⁶Jehova i lo rumela a tinyoka to tshisa, ti ta luma vanhu; a vanyingi va ka Israeli va lofa. [53]

⁷A vanhu va lota ka Mosi, va ta ku ngalo: Hi onhile hakuva hi solile Jehova na wena; hikwalaho hi kombelele ka Jehova kasi a fela ku hlongola tinyoka xikari ka hina. Mosi i lo kombelela vanhu.

⁸Jehova i te ngalo ka Mosi: Maha a nyoka yo tshisa u yi hayeka laha mhanzeni, kasi loku munhu a lumiwa hi nyoka, i ta cuwuka ka nyoka leyi ya suku, a hanya.

⁹Mosi i lo maha a nyoka ya suku a yi hayeka laha ka mhanze; ku waku loku munhu a lumiwa hi nyoka, a cuwuka ka nyoka ya suku, a hanya. [54]

¹⁰Zonake a vanana va ka Israeli va lo andlamuka, va ta gova le Obote.

¹¹Va lo suka le Obote, va ta gova lomu marumbini ya Abarima, le xiwuleni ko cuwukana na Moabi, hi tlhelo ga Mutsuwuka-gambo.

¹²Zonake va lo suka laho, va ya gova le nkoveni wa Zereda.

¹³Va lo suka laho, va ya gova hi le tlhatuko wa Amoni, legi gi nga le xiwuleni, gi sukelako tikweni ga maAmori; hakuva a congo wa Amoni hi mbhingano xikari ka maMoabi ni maAmori. [55]

¹⁴Hi kwalaho ku wuliwako ha kona bhukwini ga Tiyimpi ta Jehova: “Vaheb le Sufa, Ni le mikoveni ya Amoni,

¹⁵Ni kurelela ka mikova, Loku ku komamako hi tlhelo ga Ara, Kala ku chikela le mbhinganwini wa Moabi.”

¹⁶Va lo suka laho vaya ka hlowo ya Beyera. Laha hi laho Jehova a nga ku ngalo ka Mosi: Tsombanyisa a vanhu, nzi ta va nyika mati.

¹⁷Zonake a va ka Israeli va lo yimbelela lisimu leli: Vela hlowo! mu yi yimbelela!

¹⁸A hlowo leyi yi kelilweko hi tihosana; Leyi a manghanakana ya vanhu ma yi kelileko Hi tinhonga tabye ta wukosi, ni micetengelo yabye. Va lo Suka le xiwuleni vaya Matana.

¹⁹Zonake va lo suka Matana vaya Nahalileli, va suka Nahalileli vaya Bamote;

²⁰va lo suka Bamote vaya nzhelelweni lowu wu nga le masinwini ya Moabi, hi le hehla ka Pisga hi tlhelo ga xiwula.

²¹Zonake Israeli i lo ruma mitsumi a kuya ka Sihoni, a hosi ya maAmori, yi yaku ngalo:

²²Hi vumele hi tsemakanya lomu tikweni ga wena; hi nga ta hambukela lomu masinwini, hambu lomu zivineni; cima hi nga tanwa a mati ya tihlowo; hi ta famba hi magonzo kala hi huma lomu tikweni ga wena.

²³Kanilezi Sihoni a nga vumelangi va ka Israeli ku tsemakanya lomu tikweni gakwe; Sihoni i lo hlomisa a vanhu vakwe vontlhe va huma ku ya vukela va ka Israeli le xiwuleni; va lota le Johaza va talwa na Israeli.

²⁴Kanilezi Israeli i lo va hihirita hi wutlha ga supado, va wutla a tiko gakwe kusukela Amoni kala le Jaboke, ku kala kuya ni ka vanana va ke Amoni; hakuva a mbhingano wa vanana va ka Amoni wu wa hi ni makhokhola. [56]

²⁵Zinghaho Israeli i lo teka yontlhe a miti leyo, a aka ka yontlhe a miti ya maAmori, lomu Hexboni ni ka yontlhe miti leyi yi nga hi lahasi ka vona.

²⁶Hakuva Hexboni gi wa hi zinza ga Sihoni a hosi ya maAmori, loyi a ngalwa ni hosi ya maMoabi leyi yi nga hi kona kale ka kona, a yi wutlela tiko gontlhe kala le Arnoni.

²⁷Hi kwalaho a vayimbeleli va nga ku ngalo: Ngonani Hexboni! Muti wa Sihoni a wu akiwe wu tiyiswa!

²⁸Hakuva a nzilo wu humile le Hexboni, Ni hlavingo wu humile hi le mutini wa Sihoni; Wu lovisile Are wa le Moabi Ni tihosi ti akileko zitsungeni za Arnoni.

²⁹I khombo ka wena Moabi! Mu file, vanhu va Kemoxe! Va nyikele vana vabye kutsutsumeni, Ni vanhanyana vabye va maha tikhumbi, Ka Sihoni a hosi ya maAmori.

³⁰Hina hi va fuletele hi miseve, Zontlhe zi hahlulwe kusukela Hexboni kala le Diboni: Hi hlasele kala le Nofa; A nzilo wu chikele le Medaba.

³¹Zinghaho Israeli i lo aka lomu tikweni ga maAmori.

³²Mosi i lo ruma a mitsumi a kuya hlola le Jazera. Va lo wutla a miti leyi yi nga hi lahasi ka wona, va hlongola maAmori lawa ma nga wa akile ka yona.

³³Zonake va lo hunzuluka va kanziha hi tlhelo ga le Baxani. Ogi a hosi ya le Baxani zinwe ni vanhu vakwe vontlhe va lo huma va va tlhangaveta le Edrei, va lava kulwa navo. [57]

³⁴Zonake Jehova aku ngalo ka Mosi: U nga mu chavi, hakuva nzi mu nyikele canjeni ga wena, yena ni vanhu vakwe vontlhe ni tiko gakwe gontlhe. U ta maha ka yena kota lezi u mahileko ka Sihoni, a hosi ya maAmori, loyi a nga wa akile le Hexboni.

³⁵Zonake va lolwa zinwe naye va mu hlula, ni vana vakwe ni vanhu vakwe vontlhe, laho a ku ponangi ni munwe. Va lo teka a tiko gakwe.