Read tshwa Mitsengo 22 Bible Online

Mitsengo 22 - tshwa bible

Mitsengo 22

¹A vanana va ka Israeli va lo andlamuka laho, vaya gova le mikoveni ya le Moabi, tlhatukweni wa Jordani ngomama ni Jeriko.

²Balake a nʼwana wa Zipore i lo wona zontlhe lezi Israeli a zi mahileko ka maAmori.

³Zonake i lo chava nguvu hi ku va wona, na va tele nguvu; hikwalaho Moabi i lo rurumela hi kota ya vanana va ka Israeli.

⁴Moabi i te ngalo ka masingalakati ya vaMidiani: Lexi xidlemo xi taga a tiko gontlhe legi gi hi renzelekeleko, khwatsi hi homu yi gako a byanyi ga khwati. Balake a nʼwana wa Zipore i wa hi hosi ya maMoabi ka lexo xikhati.

⁵Yena i lo ruma mitsumi ka Balaami a nʼwana wa Beora, le mutini wa Petora wa le Congweni, a tikweni ga vanana va lixaka lakwe; i lo rumela ku ya mu vitana, va yaku ngalo: Languta, va kona a vanhu va humako hi le Gipite. Va fenengetile misava; va govile va cuwukana na mina. [58]

⁶Ngona lokuloku, nza ku kombela, u ta nzi phungela lava vanhu, hakuva va na ni ntamu wo nzi hunza. Kutani nzi ta zi kota ku va hlula, ni ku va hlongola lomu tikweni, hakuva nza zi tiva lezaku loyi wena u mu katekisako i katekile, ni loyi u mu rukatelako i rukatelwe.

⁷Zonake a masingalakati ya maMoabi ni masingalakati ya maMidiani va lo suka na va khomile zinyikiwo za ku ya nyika xitumbe; va lo ya chikela ka Balaami va mu hlawutela timhaka ta Balake. [59]

⁸Balaami i te ngalo kabye: Etlelani laha wusiku legi, zonake nzi ta ta mu hlamula kota lezi Jehova a ta nga nzi byela. Zinghaho a tihosana ta maMoabi ti lo etlela ka Balaami.

⁹Nungungulu i lota ka Balaami, a taku: Mbamani lava vanhu va nga na wena ke?

¹⁰Balaami i te ngalo ka Nungungulu: Balake a nʼwana wa Zipore, a hosi ya maMoabi, i rumele lava vanhu laha ka mina, aku:

¹¹Languta a vanhu lava va tako hi le Gipite va kona, va fenengetile misava! Ngone lokuloku u tava phunga; kutani nzi ta zi kota ku va hlasela, nzi va hlongola lomu tikweni.

¹²Nungungulu i te ngalo ka Balaami: U nga fambi navo. U ngayi u ya phunga lavo vanhu, hakuva va katekisilwe.

¹³Balaami i lo vuka ni mixo, aku ka tihosana ta Balake: Tlhelani mu famba ka nwina, hakuva Jehova wa nzi beletela ku famba na nwina.

¹⁴Zonake a tihosana ta ka Moabi ti lo suka ti tlhelela ka Balake, ti yaku ngalo: Balaami i alile ku wuya na hina.

¹⁵Balake i lo engeta a ruma tinwani tihosana ti dumileko ku hunza leti to ranga.

¹⁶Laha na ti chikele ka Balaami, ti te ngalo kakwe: Balake a nʼwana wa Zipore i ngalo: Nza ku khongotela lezaku u nga khameki kuta seno ka mina.

¹⁷Nzi ta ku mahela wudumo ga hombe; zontlhe lezi u ta nga zi wula ka mina nzi ta zi maha. Ngone u ta nzi phungela lava vanhu!

¹⁸Balaami i lo hlamula a malanza ya Balake, aku ngalo: Hambu loku Balake a nzi nyika a yindlu yakwe na yi tele hi siliva ni nzalama, cima nzi nga ta hambunyeta a gezu ga Jehova, Nungungulu wa mina, nzi maha xilo xitsongwani hambu xa hombe.

¹⁹Hikwalaho tshamani laha legi wusiku, kala nzi tiva lezi Jehova a ta nga engeta a nzi byela.

²⁰Zonake Nungungulu i lota ka Balaami ni wusiku, a ta ku ngalo kakwe: Lezi a vanhu lava va tako va ta ku vitana, famba navo; ntsena lezaku u taya maha lezi nzi ta nga ya ku byela zona.

²¹Balaami i lo vuka ni mixo, a gabhatsela a mbongola yakwe, a famba zinwe ni tihosana ta ka Moabi.

²²Kanilezi a zanga ya Nungungulu yi lo mu vukela hi lezi a nga suka a famba navo. A ngelosi ya Jehova yi lo yima laha ndleleni, yi mu valela ndlela. Balaami i wa khilele a mbongola yakwe, na hi ni malanza yakwe ya mambiri.

²³Laha a mbongola yi nga wona a ngelosi ya Jehova na yi yimile laha ndleleni ni supado yo kariha canjeni ga yona, yi lo hambukela lomu masinwini. Balaami i loba mbongola kasi ku yi wuyisa laha ndleleni.

²⁴Kanilezi a ngelosi ya Jehova yi wa yimile xikari ka ndlela yo hlongana, leyi yi tsemakanyako hi lomu xikari ka zivina na ku hi ni libhiyo tlhelo ni tlhelo ga ndlela.

²⁵A mbongola, hi ku wona a ngelosi ya Jehova, yi lo ti khweketa laha libhiyweni, Balaami a manyiwa nenge; i lo engeta a yiba.

²⁶A ngelosi ya Jehova yi lo tshinela mahlweni, yi ya yima hi laha ka wutshamu go hlongana, ku nga hava wutshamu go hambukela kona xineneni ni xibhabheni.

²⁷A mbongola loku yi wona a ngelosi ya Jehova yi lowa lahasi; a zanga ya Balaami yi lo vindlukelana, a teka a nhonga a yiba.

²⁸Zonake Jehova i lo vulula a nomu wa mbongola, yi ku ngalo ka Balaami: Nzi ku onhele yini lezi u nzi bileko makhati lawa ya manharu?

²⁹Balaami i te ngalo ka mbongola: Hi lezi u hlakanako ha mina. Loku nzi wa hi ni tlhari mandleni, ngha nzi ku tlhava zalezi.

³⁰A mbongola yi ku ngalo ka Balaami: Xana a hi mina a mbongola ya wena leyi u yi khilelako xontlhe xikhati kala nyamutlha ke? Xana nzi tshama nzi maha lezi ke? Yena aku ngalo: Eye!

³¹Zonake Jehova i lo vulula a mahlo ya Balaami, lezaku a wona a ngelosi ya Jehova na yi yimile laha ndleleni, na yi khomile a supado yo kariha canjeni ga yona. Zonake i lo khizama a koramisa nghohe yakwe misaveni.

³²A ngelosi ya Jehova yi te ngalo ka yena: U bele yini a mbongola ya wena zikhati zinharu ke? Hi mina nzi nga ta ku tsanga, hakuva nzi wonile lezaku a ndlela leyi yi ku yisa mhangweni.

³³A mbongola yi lo nzi wona, yi hambuka zikhati zinharu mahlweni ka mina. Loku yi wa nga hambukangi mahlweni ka mina, ngha nzi ku dele wena; kanilezi yona ngha nzi yi tsikile yi hanya.

³⁴Balaami i te ngalo ka ngelosi ya Jehova: Nzi onhile, hakuva a nzi zi tivangi lezaku u yimile mahlweni ka mina laha ndleleni. Makunu loku zi bihile mahlweni ka wena, nzi ta tlhela nzi famba kaya.

³⁵A ngelosi ya Jehova yi ku ngalo ka Balaami: Famba navo a vanhu lavo, kanilezi u taya wula ntsena lezi nzi ta nga ku byela. Zonake Balaami i lo famba ni tihosana ta ka Balake.

³⁶Laha Balake a nga wa zwile lezaku Balaami wata, i lo mu khinga le Ir-Moabi, legi gi nga le mbhinganweni wa Amoni, hi le magumo ka tiko.

³⁷Zonake Balake aku ngalo ka Balaami: Xana a nzi rumangi a vanhu vo ta ku vitana ke? Hikuyini u nga kala kuta? A nzi zi koti ku ku mahela wudumo ga hombe ke?

³⁸Balaami aku ngalo ka Balake: Cuwuka, nzi tile ka wena, kanilezi a nzi zi koti ku wula lezi nzi zi ranzako. A gezu legi a ta nga gi veka Nungungulu nonwini wa mina, hi gwalego nzi ta nga gi wula.

³⁹Zonake Balaami i lo famba na Balake, vata le Kiriat-Kutsote.

⁴⁰Balake i lo tlhava tihomu ni tiyivu, a rumela a nyama ka Balaami ni ka tihosana leti ti nga hi zinwe naye.

⁴¹Ni mixo Balake i lo ya teka Balaami, a mu kanzihisa le Bamoti-Baali, kasi a wona magumo ya wugovelo ga va ka Israeli na hi kwaleyo.