Read tshwa Mitsengo 23 Bible Online

Mitsengo 23 - tshwa bible

Mitsengo 23

¹Balaami i te ngalo ka Balake: Nzi akele kwalaha 7 wa maalati, zonake u nzi longisela 7 wa tinkuzi ni 7 wa tihamba.

²Balake i lo maha khwatsi hi lezi Balaami a wulileko; zonake Balake na Balaami va lo tlhava a nkuzi ni hamba hehla ka alati ginwe ni ginwani.

³Zonake Balaami aku ngalo ka Balake: Yima kwalaho kusuhani ni muphahlo wa wena wo hiswa, mina nzi taya tlhelweni; kutani Jehova i tata woneka ka mina; zonake nzi ta ku byela lezi a ta nga nzi kombisa. I lo tlakukela kuya laha ku basileko.

⁴Nungungulu i lo woneka ka Balaami, Balaami aku ka yena: Nzi longisile a maalati lawa ya ntlhanu ni mambiri, nzi nyikela a nkuzi ni hamba hehla ka alati ginwe ni ginwani.

⁵Zonake Jehova i lo veka timhaka nonwini wa Balaami, aku ngalo: Tlhela uya ka Balake uya mu byela lezi ni lezi.

⁶I lo tlhela aya kakwe, a ya mu kuma na a yimile kusuhani ni muphahlo wakwe wa kuhiswa, zinwe ni tihosana tontlhe ta maMoabi.

⁷Zonake Balaami i lo vumba, aku: Balake i nzi vitanile na nzi hi le Arama, A hosi ya Moabi yi nzi relelisile zitsungeni za le Mutsuwuka-gambo, aku: “Ngone u ta nzi phungela Jakobe! Ngone u ta zangarela Israeli!” [60]

⁸Nzi ta mu phungisa kuyini loyi Nungungulu a nga mu phungangiko ke? Nzi ta mu zangarelisa kuyini loku Jehova a nga mu zangarelangi ke?

⁹Hakuva nza mu wona na nzi hi hehla ka ribye, Nzi mu cuwuka na nzi hi zitsungeni. Langutani, i vanhu lava va tshamako tlhelo, Lava va nga ti hlayiko ku fanana ni manwani matiko.

¹⁰Himani a ta nga hlaya Jakobe a teleko kota tshuri ke? Hambu ku tiva tsengo wa xipanze xa wumune xa vaIsraeli ke? A nzife hi kufa ka valulamileko, Ni kugumesa ka mina a ku kote ka vona! [61]

¹¹Balake i te ngalo ka Balaami: Hikuyini u nzi mahela lezi ke? Mina nzi ku vitanele ku ta phunga valala va mina, kanilezi wena wo va katekisa!

¹²Yena i lo hlamula, aku ngalo: Xana a nzi faneli ku wula ntsena lezi Jehova a vekileko nonwini wa mina ke?

¹³Balake i te ngalo kakwe: Mina nza ku khongotela, a hi fambe hi ka ginwani tlhelo laha u ta nga va wona xipanzana xabye, na u nga va woni vontlhe; u ta va phunga na u hi laho.

¹⁴I lo mu yisa masinwini ya le Zofima, le hehla ka Pisga, laho i lo aka a 7 wa maalati, a tlhava a nkuzi ni hamba hehla ka alati ginwe ni ginwani.

¹⁵Zonake Balaami aku ngalo ka Balake: Yima laha kusuhani ni muphahlo wa wena wa kuhiswa, mina nzi taya tlhangana na Jehova lahaya.

¹⁶Jehova i lo woneka ka Balaami, a veka timhaka nonwini wakwe, aku ngalo: Tlhela uya ka Balake, u taya mu byela lezi ni lezi.

¹⁷Zonake i lo tlhela aya ka yena, aya mu kuma na yimile kusuhani ni munyikelo wakwe wa kuhiswa, ni tihosana ta maMoabi ti wa hi zinwe na yena. Balake i te ngalo kakwe: Jehova i te yini?

¹⁸Balaami i lo vumba, aku: Vuka Balake, u ingisa! Demba ndleve, wena nʼwana wa Zipore!

¹⁹Nungungulu a hi munhu a hembako, Ge a hi nʼwana wa munhu a hunzulukako. Kasi hi yena wo wula a wuya a nga mahi ke? Xana ngwo wula a wuya a nga mbhelelisa ke? [62]

²⁰Hakunene i nzi leletele ku katekisa; I katekisile, cima nzi nga ta hunzulusa.

²¹A nzi kumi khombo ka Jakobe, Hambu ni ku wona kukarateka ka Israeli. Jehova, Nungungulu wakwe, i zinwe na yena, I Hosi yabye leyi va mahako guwa ga ku yi tsakela.

²²Nungungulu i va humesile le Gipite. Yena i va nyikile a ntamu wa nyari,

²³Hakuva ku hava wutumbe go vukela Jakobe; A ku na wungoma go vukela Israeli. Ku ta wuliwa ha Jakobe na Israeli hi xikhati xa zona, Zini lezi Nungungulu a nga zi mahangiko!

²⁴Mbanhu lava va vukako kota pswele ga nghala, Va ta yima khwatsi matsune wa nghala. Yi nga ta etlela na yi nga se kuga a pfimba wa yona, Ni kunwa a nkhata wa lava va delweko. [63]

²⁵Zonake Balake aku ngalo ka Balaami: Loku u nga lavi ku va phunga, u nga va katekisi!

²⁶Balaami aku ngalo ka Balake: Xana a nzi ku byelangi mina, lezaku zontlhe lezi Jehova a ta nga zi wula nzi ta zi maha ke?

²⁷Balake aku ngalo ka Balaami: Ngone hi famba hi ka ginwani wutshamu; kutani Nungungulu i ta vumela ku va fumba ka gona.

²⁸Balake i lo yisa Balaami le hehla ka Peora, ngomama ni xiwula.

²⁹Balaami aku ka Balake: Nzi akele khwalaha a 7 wa maalati, u nzi longisela a 7 wa tinkuzi ni 7 wa tihamba.

³⁰Balake i lo maha kota lezi Balaami a mu byelileko; i lo tlhava a nkuzi ni hamba hehla ka alati ginwe ni ginwani.