Read tshwa Mitsengo 24 Bible Online

Mitsengo 24 - tshwa bible

Mitsengo 24

¹Laha Balaami a nga wona lezaku Jehova i xalaliswa hi ku katekisa Israeli, a nga lavangi kuya hi ku vumba khwatsi hi zinwani zikhati. Kanilezi i lo hunzulusa a nghohe yakwe a cuwuka a tlhelo ga le xiwuleni.

²Zonake Balaami i lo tlakusa a mahlo yakwe a wona a va ka Israeli na va tshamile matendeni yabye hi tinyangwa tabye, zonake a Moya wa Nungungulu wu lota hehla kakwe.

³I lo vumba, aku ngalo; A kufumba ka Balaami a nʼwana wa Beora; I gezu ga munhu loyi a vululweko mahlo;

⁴I gezu ga loyi a ingisako timhaka ta Nungungulu, Loyi a wonako mahanjalati ya Nyamintamu, Loyi a koramako, zonake a mahlo yakwe ma vululeka.

⁵O Jakobe, ma sasekisile kuyini matenda ya wena! A wuakelo ga wena, Israeli!

⁶Gi nava kule khwatsi minzhelelo, Khwatsi hi zizunze mbhirini ya congo, Kukotisa a mhangani wu byalilweko hi Jehova, Khwatsi hi tisinya ta sedari ti nga kusuhani ni mati.

⁷Ni mati ma ta khulunga hi lomu ka mabhaketi yakwe, Ni mbewu yakwe yi ta tsakamiswa hi mati yo tala. Ni hosi yakwe yi ta va wa hombe ku hunza Agagi, Ni mufumo wakwe wu tava ni ntamu.

⁸Nungungulu i mu humesile le Gipite, I mu nyikile a ntamu wa nyari, Yena i ta mbhetisa matiko ya valala vakwe; A tshova marambu yabye, a va lovisa hi mipaxa yakwe.

⁹Yena i baramile, a xiyelela khwatsi i nghala, Ni ku kota a pswele ga nghala; Himani a ta nga mu vuxa ke? A va katekiswe lava va ku katekisako, Va rukatelwa lava va ku rukatelako. [64]

¹⁰A zanga ya Balake yi lo vindluka yi vukela Balaami. Yena i lo phakata a mandla yakwe, aku ka Balaami: Mina nzi ku vitanele ku ta phunga valala va mina, kanilezi wena u va katekisile zikhati zinharu.

¹¹Makunu famba ka nwina, nzi wa ku byelile lezaku nzi ta ku mahela wudumo ga hombe nguvu; kanilezi Jehova i ku tsonile wudumo lego.

¹²Balaami i te ngalo ka Balake: Xana a nzi byelangi mitsumi ya wena leyi u nga yi ruma, nziku:

¹³Hambu loku Balake a nzi nyika a yindlu yakwe na yi tele hi siliva ni nzalama, nzi nga ta hambunyeta kuleletela ka Jehova, nzi ti lavela za mina zo saseka kutani zo biha; kanilezi lezi Jehova a ta nga ya nzi byela, hi zalezo nzi ta nga wula zona.

¹⁴Makunu mina nza famba ka hina. Kanilezi ngone nzi ta ku kombisa lezi zi ta nga mahiwa hi lava vanhu lomu tikweni ga wena ka masiku ma ha tako.

¹⁵Zonake i lo vumba aku ngalo: A gezu ga Balaami a nʼwana wa Beora, I gezu ga munhu loyi a vululweko mahlo,

¹⁶I gezu ga loyi a ingisako timhaka ta Nungungulu, Loyi a tivako a wutivi ga Loyi a Tlakukileko nguvu, Loyi a wonako mahanjalati ya Nyamintamu, Loyi a khizamako, zonake a mahlo yakwe ma vululeka.

¹⁷Mina nza mu wona, kanilezi a hi zalezi. Mina nza mu languta, kanilezi na a nga hi kusuhani. Ku ta huma nyeleti hi ka Jakobe, A nhonga ya wuhosi yi huma ka Israeli, Yi lamata a mareve ya Moabi, Yi mbhetisa vontlhe a vanana va vilinganya. [65]

¹⁸Edomi i ta fumelwa hi yena, Seir, a nala wakwe, i ta fuyiwa hi yena. Israeli i ta kombisa a ntamu wakwe,

¹⁹Hi ka Jakobe ku ta huma mufumeli, I ta lovisa lava va salako lomu mitini.

²⁰Balaami, na wona Amaleki, i lo vumba aku: Amaleki ngwa ku ranga ka mifumo, Kanilezi hi magumo i ta lobyiswa. Ekso. [66]

²¹Balaami na wona vaKeni, i lo vumba aku: A yindlu ya wena yi tiyile, Ni xisaka xa wena xi akilwe ribyeni.

²²Kanilezi a muKeni i ta hahlulwa, Kala Axur a ku yisa kule na u hi khumbi.

²³Balaami i lo engeta a vumba, aku ngalo: Khombo ka loyi a ta nga sala Laha Nungungulu a ta nga maha lezi.

²⁴A mataru ma tata hi le Kitimu, Ma ta ta hlokisa Axur, ma hlokisa Eberi; Na yenawu i ta lobyiswa.

²⁵Zonake Balaami i lo suka a famba kabye; yenawu Balake i lo tlhelela kaya kakwe.