Read tshwa Mitsengo 25 Bible Online

Mitsengo 25 - tshwa bible

Mitsengo 25

¹Laha va ka Israeli va nga wa tshamile le Xittime, a vanhu va lo bhaya ni vanhanyana va Moabi.

²A vaMoabi va lo ramba vanhu miphahlweni ya vanungungulu vabye, zonake a vanhu va loga, va khizama mahlweni ka vanungungulu vabye.

³Israeli i lo ti tlhanganyisa na Baali-Peori, zonake a zanga ya Jehova yi lo vura yi vukela Israeli. [67]

⁴Zinghaho Jehova i te ngalo ka Mosi: Vitana wontihe manghanakana ya vanhu, u hayeka lava vaonhi mahlweni ka Jehova laha munwini, kasi a zanga ya Jehova yi fela ku renga ka va ka Israeli.

⁵Zonake Mosi aku ka Valamuli va ka Israeli: Dayani vontlhe lava vanhu va ti tlhanganyisileko na Baali-Peori.

⁶Zalezo ku lo ta huma a munhu wa vanana va ka Israeli na a neha wasati wa muMidiani ka vamakabye vakwe kuwoneni ka Mosi ni tlhangano wontihe wa vanana va ka Israeli, laha na tlhangano wontihe wu kari wu rila laha nyangweni ya tenda ga mutlhangano.

⁷Zalezo Finiasi a nʼwana wa Eliazare wa mupristi Aroni, laha na mu wonile i lo suka laho tlhanganweni a ya teka tlhari canjeni gakwe.

⁸I lo lanza inaloye le tendeni gakwe, a ya va tlhava vontlhe hi wumbiri gabye a va patsa khatiginwe, muIsraeli ni wasati loye rumbyini gakwe. Zonake a ntungu wu lo khawula xikari ka vanana va ka Israeli.

⁹A vanhu lava va ngafa hi ntungu lowo va wa hi 24,000. [68]

¹⁰Zonake Jehova i lo wulawula ka Mosi, aku:

¹¹Fineasi a nʼwana wa Eliazare wa mupristi Aroni, i rengisile a zanga ya mina hehla ka vanana va ka Israeli, hakuva i lo nzi pinyamela xikari kabye; hikwalaho a nzi lovisangi a vanana va ka Israeli hi zanga ya mina.

¹²Hikwalaho u ta mu byela lezaku: Nzi maha zinwe na yena a xivumelwano xa kurula.

¹³Xi tava ka yena ni ka zizukulwana zakwe lexi xivumelwano xa wupristi legi ga kala kupinzuka, hakuva i pinyamele Nungungulu wakwe, a mahela a vanana va ka Israeli a nzhiho.

¹⁴A vito ga muIsraeli loyi a nga dawa ni wasati wa muMidiani i wa hi Zimri a nʼwana wa Salu, a hosana ya lixaka la ka Simeoni.

¹⁵A vito ga wasati wa muMidiani loyi a delweko i wa hi Kozbi a nʼwana wa Zuri, loyi a nga hi hosana ya yinwe ya tinyangwa ta vaMidiani.

¹⁶Jehova i lo wulawula kambe ka Mosi, aku:

¹⁷Hlokisani a vaMidiani, mu va daya;

¹⁸hakuva va mu xanisile, va mu xengetela hi mano yabye kota lezi va mu kanganyisileko hi timhaka ta Peori, ni mhakeni ya Kozbi, a nʼwana wa hosana yinwani ya muMidiani, a makabye wakwe loyi a nga dawa siku lego ga ntungu lowu wu nga huma hi kota ya Peori.