Read tshwa Mitsengo 26 Bible Online

Mitsengo 26 - tshwa bible

Mitsengo 26

¹Anzhako ka ntungu Jehova i te ngalo ka Mosi na Eliazare, a nʼwana wa mupristi Aroni:

²Hlayani wontihe tlhangano wa vanana va ka Israeli, kusukela ka lava va nga ni 20 wa malembe ni ku hunza, mu va hlaya hi tinyangwa tabye, mu hlaya vontlhe vavanuna va ka Israeli lava va zi kotako ku hloma matlhari.

³Zonake Mosi na mupristi Eliazare va lo wulawula navo le libaleni la le Moabi kusuhani ni Jordani ni Jeriko, vaku:

⁴Nwina mu ta hlayiwa kusukela ka lava va nga ni 20 wa malembe ni ku hunza, kota lezi Jehova a leleteleko ka Mosi ni ka vanana va ka Israeli lava va nga huma hi le Gipite.

⁵Rubeni a matewula ya Israeli. A vana va Rubeni hi Hanoki, a nyapanze wa yindlu ya ka Hanoki; na Palu, a nyapanze wa yindlu ya ka Palu;

⁶na Hezroni, a nyapanze wa yindlu ya ka Hezroni; na Karmi, a nyapanze wa yindlu ya ka Karmi.

⁷Leti hi tiyindlu ta ka Rubeni. Lava va hlayilweko xikari ka vona va wa hi 43,730.

⁸A nʼwana Palu hi Eliabe.

⁹A vana va Eliabe hi Nemueli na Datani, na Abiramu. Datani na Abiramu hi vona va nga wa dumile lomu ka tlhangano, hi vona va nga vukela Mosi na Aroni, na va hi nzeni ka xikungo xa Kora, siku lego va nga vukela Jehova;

¹⁰laha a misava yi ahlama nomu wa yona yi va mita vontlhe zinwe na Kora, laho ku ngafa a tlawa wa hombe; ni laho a nzilo wu nga hisa a 250 wa vanhu kasi ku maha a xikombiso.

¹¹Kanilezi a vana va Kora va wa nga fangi.

¹²A vana va Simeoni hi tiyindlu tabye hi lava: Nemueli, a nyapanze wa yindlu ya ka Nemueli; va ka Jamina, va yindlu ya ka Jamina; va ka Jakina, va yindlu ya ka Jakina;

¹³va ka Zera, va yindlu ya ka Zera; va ka Xaule, va yindlu ya ka Xaule.

¹⁴Leti hi tiyindlu ta ka Simeoni: va wa hi 22,200.

¹⁵A vana va ka Gadi hi tiyindlu tabye: va ka Zefoni, va yindlu ya ka Zefoni; va ka Hagi, va yindlu ya ka Hagi; va ka Xuni va yindlu ya ka Xuni;

¹⁶va ka Ozni va yindlu ya ka Ozni; va ka Eri va yindlu ya ka Eri;

¹⁷va ka Arodi va yindlu ya ka Arodi; va ka Areli va yindlu ya ka Areli.

¹⁸Leti hi tiyindlu ta vana va Gadi hi mitsengo yabye: va wa hi 40,500.

¹⁹A vana va Juda: hi Eri na Onani: Eri na Onani va fele tikweni ga le Kanani. [69]

²⁰A vana va Juda hi tiyindlu tabye hi lava: va ka Xela va yindlu ya ka Xela; va ka Perezi va yindlu ya ka Perezi; va ka Zera va yindlu ya ka Zera.

²¹Ni vana va Perezi hi lava: va ka Hezroni va yindlu ya ka Hezroni; va ka Hamula va yindlu ya ka Hamula.

²²Leti hi tiyindlu ta ka Juda ni tsengo wa kona: va wa hi 76,500.

²³A vana va ka Isakari hi tiyindlu tabye: va ka Tola va yindlu ya ka Tola; va ka Puva va yindlu ya ka Puni;

²⁴va ka Jaxuba va yindlu ya ka Jaxuba; va ka Ximroni va yindlu ya ka Ximroni.

²⁵Leti hi tiyindlu ta ka Isakari ni tsengo wa kona: va wa hi 64,300.

²⁶A vana va ka Zebuloni hi tiyindlu tabye: va ka Serede va yindlu ya ka Serede; va ka Eloni va yindlu ya ka Eloni; va ka Jahleeli va yindlu ya ka Jahleeli.

²⁷Leti hi tiyindlu ta ka Zebuloni ni tsengo wa kona: va wa hi 60,500.

²⁸A vana va Josefa hi tiyindlu tabye: hi Manasa na Efraime.

²⁹A vana va Manase: va ka Macira va yindlu ya ka Macira. Makira i lo beleka Gileade: va ka Gileade va yindlu ya ka Gileade.

³⁰Lava hi vana va Gileade: va ka Jezere va yindlu ya ka Jezere; va ka Heleke va yindlu ya ka Heleke;

³¹va ka Asrieli va yindlu ya ka Asrieli; va ka Xekemi va yindlu ya ka Xekemi;

³²va ka Xemida va yindlu ya ka Xemida; va ka Hefera va yindlu ya ka Hefera.

³³Makunu Zelofehade a nʼwana wa Hefera i wa nga hi na vafana, saseka vanhanyana basi, a mavito yabye ma nga lawa: Mahla, Noa, Hogla, Milka na Tirza.

³⁴Leti hi tiyindlu ta ka Manase; lava va nga wa hlayilwe va wa hi 52,700.

³⁵Lava hi vana va ka Efraime hi tiyindlu tabye: va ka Xutela va yindlu ya ka Xutela; va ka Bekera va yindlu ya ka Bekera; va ka Tahana va yindlu ya ka Tahana.

³⁶Ni vana va ka Xutela hi lava: va ka Erani va yindlu ya ka Erani.

³⁷Leti hi tiyindlu ta va ka Efraime ni tsengo wa kona: va wa hi 32,500. Hi vona a vana va Josefa hi tiyindlu tabye.

³⁸Ni vana va ka Benjamini hi tiyindlu tabye hi lava: va ka Bela va yindlu ya ka Bela; va ka Axbeli va yindlu ya ka Axbeli; va ka Ahiramu va yindlu ya ka Ahiramu;

³⁹va ka Xefufami va yindlu ya ka Xefufami; va ka Hufami va yindlu ya ka Hufami.

⁴⁰A vana va Bela ku wa hi Arda na Naamani; va ka Arda va yindlu ya ka Arda; va ka Naamani va yindlu ya ka Naamani.

⁴¹Lava hi vana va ka Benjamini hi tiyindlu tabye: lava va hlayilweko va wa hi 45,600.

⁴²Lava hi vana va ka Dani hi tiyindlu tabye: va ka Xuhama va yindlu ya ka Xuhama. Leti hi tiyindlu ta ka Dani.

⁴³Tontlhe tiyindlu ta ka Xuhama, a tsengo wabye va wa hi 64,400.

⁴⁴A vana va ka Axeri hi tiyindlu tabye hi lava: Va ka Imna va yindlu ya ka Imna; va ka Ixvi va yindlu ya ka Ixvi; va ka Beria va yindlu ya ka Beria.

⁴⁵A vana va ka Beria: va ka Heberi va yindlu ya ka Heberi; va ka Melkieli va yindlu ya ka Melkieli.

⁴⁶A vito ga nhwana wa Axeri i wa hi Sera.

⁴⁷Leti hi tiyindlu ta vana va ka Axeri, ni tsengo wabye va wa hi 53,400.

⁴⁸A vana va Naftali hi tiyindlu tabye: va ka Jahzeeli va yindlu ya ka Jahzeeli; va ka Guni va yindlu ya ka Guni;

⁴⁹va ka Jezera va yindlu ya ka Jezera; va ka Xilemi va yindlu ya ka Xilemi.

⁵⁰Leti hi tiyindlu ta ka Naftali hi mingango yabye: lava va hlayilweko va wa hi 45,400.

⁵¹Lowu hi tsengo wa vanana va ka Israeli: va wa hi 601,730 wa vavanuna.

⁵²Jehova i lo wulawula ka Mosi, aku:

⁵³Lava hi lava va ta nga avelwa a tiko, kasi gi maha a tshomba yabye: va ta avelwa kukotisa wunyingi ga mavito yabye.

⁵⁴A lixaka la hombe u ta li nyika a tshomba yo tala; leli li nga litsongwani u ta li nyika a tshomba yitsongwani; linwe ni linwani li ta nyikiwa tshomba khwatsi hi wunyingi ga lona.

⁵⁵Ntsena lezaku a tiko gi ta avelwa hi ku hlahluva; va ta amukela xiavelo xabye hi mavito ya tixaka ta vararu vabye.

⁵⁶Lezo ti ta avelwa hi ku hlahluva xikari ka leti ta hombe ni leti ta titsongwani.

⁵⁷A tsengo wa vaLevi hi lowu hi tiyindlu tabye: va ka Gerxoni va yindlu ya ka Gerxoni; va ka Kohati va yindlu ya ka Kohati; va ka Merari va yindlu ya ka Merari.

⁵⁸Leti hi tiyindlu ta va ka Levi: a yindlu ya ka Libni, ni yindlu ya ka Hebroni, ni yindlu ya ka Mahli, ni yindlu ya ka Muxi, ni yindlu ya ka Kora.

⁵⁹Kohati i lo beleka Amramu; a sati wa Amramu i wa hi Jokebede, a nhanyana wa Levi, loyi Levi a nga mu beleka le Gipite. Hi yaloye Amramu a nga beleka naye Aroni na Mosi ni makabye wabye Miriamu.

⁶⁰Aroni i lo beleka Nadabe na Abihu, na Eliazare na Itamari.

⁶¹Makunu Nadabe na Abihu va wa file xikhatini lexi va nga nyikela mahlweni ka Jehova hi nzilo wa hava.

⁶²A tsengo wabye va wa hi 23,000, vontlhe vavanuna, kusukela ka lava va nga hi ni hweti yinwe a wukale ni ku hunza; hakuva vona a va patsiwangi ka tsengo wa vanana va ka Israeli, hilezi vona a va avelwangi tshomba zinwe ni vanana va ka Israeli.

⁶³Lowu hi tsengo wa vanana va ka Israeli lowu Mosi na mupristi Eliazare va hlayileko le libaleni la le Moabi, ngomama ni Jordani ni Jeriko.

⁶⁴Kanilezi xikari kabye ku hava ni munwe wa vanana va ka Israeli, wa lava va hlayilweko hi Mosi na mupristi Aroni le xiwuleni xa Sinai.

⁶⁵Hakuva Jehova i wa wulile ha vona, aku: Va tafa le xiwuleni. Hikwalaho a ku salangi ni munwe wabye, saseka Kalebi a nʼwana wa Jefuna na Joxua a nʼwana wa Nuni.