Read tshwa Mitsengo 28 Bible Online

Mitsengo 28 - tshwa bible

Mitsengo 28

¹Jehova i lo wulawula ka Mosi, aku:

²Leletela a vanana va ka Israeli, uku: Mu ta nzi nehela a munyikelo wa kuhiswa hi xikhati xa wona, lowu wu nga kuga ka mina, wu nga ni masema yo nuhela ka mina.

³U ta va byela uku: A miphahlo ya kuhiswa leyi mu ta nga nyikela ka Jehova hi leyi: Siku ni siku mu ta nyikela tihamba timbiri ta lembe ginwe a wukale, ti nga hiko na bawa. Wu tava munyikelo wa kuhiswa wa masiku ni masiku. [71]

⁴Laha mixweni u ta nyikela a hambana, laha gambyeni u nyikela yinwani hambana;

⁵zinwe ni munyikelo wa xipanze xa wukhume xa efa ya mapa ma nanaselweko, ma vuvilweko hi xipanze xa wumune xa hini ya mafura ma nene.

⁶Lowu muphahlo wa kuhiswa wa siku ni siku wu yimisilweko le xitsungeni xa Sinai; a kuva muphahlelo wa masema yo nanziha wu hiselwako Jehova.

⁷A munyikelo wa kona wa kunwa wu tava wa xipanze xa wumune xa hini, wu tava wa hambana yo ranga: a vinya gi nene gi ta chelelwa Jehova laha ka wutshamu go basa.

⁸Laha gambyeni u ta nyikela yinwani hambana; yi ta nyikelwa zinwe ni munyikelo wa kunwa khwatsi hi laha mixweni: wu tava muphahlelo wa kuhiswa wu nga ni masema yo nanziha ka Jehova.

⁹Hi siku ga sabado ku ta nyikelwa tihambana timbiri ta lembe ginwe a wukale, ti nga hiko na bawa, ni munyikelo wa xipanze xa wumbiri xa mapa ma nanaselweko ma vuvilweko hi mafura, zinwe ni munyikelo wa kunwa.

¹⁰Lowu hi muphahlo wa kuhiswa wa sabado yinwe ni yinwani, ahandle ka munyikelo wa kuhiswa wa siku ni siku, zinwe ni munyikelo wa kona wa kunwa.

¹¹Kusanguleni ka hweti yinwe ni yinwani mu ta nyikela ka Jehova a munyikelo wa kuhiswa wa tinkuzi timbiri, ni hamba, ni 7 wa tihambana ta lembe ginwe a wukale, ti nga hiko na bawa;

¹²ni xipanze xa wukhume xi wuyetilweko kanharu xa mapa ma nanaselweko ma vuvilweko hi mafura, a kuva wu longoloka ni nkuzi yinwe ni yinwani; ni xipanze xa wukhume xi wuyetilweko kambiri xa mapa ma nanaselweko ma vuvilweko hi mafura, a kuva munyikelo wu longolokako ni hamba yinwe ni yinwani;

¹³ni xipanze xa wukhume xa mapa ma nanaselweko ma vuvilweko hi mafura, a kuva munyikelo wu longolokako ni hambana yinwe ni yinwani; lowu munyikelo wa kuhiswa wa masema yo nanziha wu nyikelwako ka Jehova.

¹⁴A munyikelo wa kona wa kunwa i khihlanya ga hini ya vinya ka nkuzi yinwe ni yinwani, ni xipanze xa wunharu xa hini ka hamba yinwe ni yinwani, ni xipanze xa wumune xa hini ka hambana yinwe ni yinwani. Lowu hi munyikelo wa kuhiswa wa hweti; wu tava wa tihweti tontlhe ta lembe.

¹⁵Ni kambe ku ta nyikelwa a mhongo ka Jehova a kuva muphahlelo wa kuonha, ahandle ka munyikelo wa kuhiswa wa masiku wontihe, ni munyikelo wa kona wa kunwa.

¹⁶Zonake hi hweti yo sangula, hi siku ga 14 ku tava ni pasika ya Jehova. [72]

¹⁷Hi siku ga 15 ga hweti leyi ku tava ni mubuzo. Ntlhanu wa masiku ni mambiri ku ta giwa zibaba zi nga comelwangiko.

¹⁸Hi siku go sangula ku tava ni mutlhangano wa kubasa; mu nga dzuki mu tira a ntiro wo binza ha gona.

¹⁹Kanilezi mu ta nyikela ka Jehova a miphahlelo ya kuhiswa; mu nyikela tinkuzi timbiri, ni hamba, ni 7 wa tihambana ta lembe ginwe a wukale; mu teka leti ti nga hiko na bawa.

²⁰Zinwe ni munyikelo wa zakuga wu nga mapa ma nanaselweko ma vuvilweko hi mafura; mu ta nyikela hi xipanze xa wukhume xi wuyetilweko kanharu ka nkuzi yinwe ni yinwani, ni xipanze xa wukhume xi wuyetilweko kambiri ku longoloka ni hamba.

²¹U ta nyikela ka hambana yinwe ni yinwani a xipanze xa wukhume xa efa.

²²Mu ta nyikela ni mhongo a kuva muphahlelo wa kuonha, mu ti mahela a nzhiho wa nwina ha yona.

²³Mu ta yi nyikela zinwe ni munyikelo wa kuhiswa wa laha mixweni, lowu wu nga wa kala kupinzuka.

²⁴Mu ta nyikela lezo zilo siku ginwe ni ginwani kala 7 wa masiku, a kuva kuga ni muphahlelo wa kuhiswa wa masema yo nanziha ka Jehova. Mu ta nyikela zinwe ni munyikelo wa kuhiswa wa kala kupinzuka zinwe ni kunwa ka kona.

²⁵Hi siku ga wuntlhanu ni mambiri mu tava ni mutlhangano wa kubasa; mu nga dzuki mu tira ntiro yo binza ha gona.

²⁶Ni kambe hi siku ga mihanzu yo ranga, laha mu nyikelako mavele maswa ka Jehova, laha mubuzweni wa nwina wa maviki, mu tava ni mutlhangano wa kubasa; mu nga dzuki mu tira ntiro wo binza ha gona.

²⁷Kanilezi mu ta nyikela a munyikelo wa kuhiswa wu nga ni masema yo nanziha ka Jehova; mu ta nyikela hi tinkuzi timbiri ni hamba ni 7 wa tihambana ta lembe ginwe a wukale;

²⁸ni munyikelo wa zakuga wu tava a mapa ma nanaselweko ma vuvilweko hi mafura; ku tava xipanze xa wukhume xi wuyetilweko kanharu ka nkuzi yinwe ni yinwani, ni xipanze xa wukhume xi wuyetilweko kumbiri ka hamba yinwe ni yinwani;

²⁹ni xipanze xa wukhume xa efa ka hambana yinwe ni yinwani ka leti ta ntlhanu ni timbiri;

³⁰mu ta nyikela hi mhongo, mu ti mahela a nzhiho ha yona.

³¹Mu ta nyikela lezi zilo zinwe ni munyikelo wa kuhiswa wa kala kupinzuka ni munyikelo wa kona wa zakuga; mu ta zi basisa zi ngavi na bawa, zinwe ni munyikelo wa kona wa zakunwa.