Read tshwa Mitsengo 3 Bible Online

Mitsengo 3 - tshwa bible

Mitsengo 3

¹Hi lowu a pswalo wa Aroni na Mosi, a xikhatini lexo Jehova a nga wulawula na Mosi le xitsungeni xa Sinai.

²A mavito ya vananava Aroni hi laya: a matewula hi Nadabe, na Abihu, na Eleazare, na Itamare,

³laya hi mavito ya vana va Aroni, lava va nga hi vapristi va totilweko, va nga wa wumbelwe a ntiro wa wupristi.

⁴Kasike Nadabe na Abihu va lofa mahlweni ka Jehova, laha va nga nyikela hi nzilo wa hava mahlweni ka Jehova le xiwuleni xa Sinai; na vona va wa nga hi na varisanyana. Zonake Eleazare na Itamare va lo tira wupristi mahlweni ka Aroni; a raru wabye. [4]

⁵Zonake Jehova i lo byela Mosi, aku:

⁶Tshineta a lixaka la ka Levi, u li yimisa mahlweni ka mupristi Aroni, kasi va ta mu vuna.

⁷Va ta hlayisa lezi zi vekiwako ka yena, ni lezi zi vekiwako ka ntlhangano mahlweni ka tenda ga mutlhangano, na va ta tira a ntiro wa tabemakeli.

⁸Va ta hlayisa zontlhe a zibya za tenda ga mutlhangano, ni zontlhe lezi a vanana va ka Israeli va faneleko ku zi hlayisa; va ta tira a ntiro wa tabemakeli.

⁹U ta nyikela a vaLevi ka Aroni ni vana vakwe; va nyikelwa ka yena hakunene a xikari ka vanana va ka Israeli. [5]

¹⁰Kanilezi Aroni ni vana vakwe u ta va yimisa lezaku va tira a ntiro wa wupristi; kanilezi a wamatiko loye a ta nga tshinela laho i ta dawa.

¹¹Jehova i lo wulawula ka Mosi aku:

¹²Cuwuka, mina nzi hlawulile a vaLevi xikari ka vanana va ka Israeli, matshanwini ya matewula wontihe laya ma belekilweko hi vamamani va vanana va ka Israeli; lezaku kasi a vaLevi va tava va mina.

¹³Hakuva a matewula wontihe nja mina, kusukela a siku lego nzi nga daya a matewula wontihe le tikweni ga Gipite, nzi ti hlawulele matewula wontihe ya ka Israeli, ya vanhu ni ya zifuyo. Matewula nja mina: hi mina Jehova.

¹⁴Jehova i lo wulawula ka Mosi le xiwuleni xa Sinai, aku:

¹⁵Hlaya a vanana va vaLevi hi mingango ya vararu vabye, ni tinyangwa tabye; u ta hlaya vavanuna vontlhe, kusukela ka loyi wa hweti yinwe kala ka lava va nga le mahlweni.

¹⁶Zonake Mosi i lo hlaya a tsengo lowo khwatsi hi kuleletela ka Jehova.

¹⁷Lava hi vanana va Levi hi mavito yabye: Gerxoni, na Kohate, na Mirari. [6]

¹⁸A mavito ya vanana va Gerxoni hi mingango yabye hi laya: Libni na Ximei.

¹⁹A vana va Kohati hi mingango yabye: Amramu, na Izhare, na Hebroni, na Uzieli.

²⁰A vana va Merari hi mingango yabye: Mahli, na Muxi. Leti hi tona tinyangwa ta vaLevi hi tiyindlu ta vararu vabye.

²¹A vana va Gerxoni, wa nyangwa ya ka Libni, ni nyangwa ya va ka Ximei: leti hi tinyangwa ta va ka Gerxoni.

²²A ku hlaya vontlhe vavanuna kusukela ka lava va nga ni hweti yinwe a wukale kala ka lava va nga le mahlweni, va wa hi 7,500.

²³A tinyangwa ta va ka Gerxoni ti wa gova hi lenzhako ka tabemakeli, hi tlhelo ga Mupela-gambo.

²⁴A hosana ya nyangwa ya ka Gerxoni i wa hi Eliasafa, a nʼwana wa Laeli.

²⁵Lezi zi nga wa hlayiswa hi va ka Gerxoni lomu ka tenda ga mutlhangano, i tabemakeli, ni Tenda, ni langwa la kona, ni xisirelo xa nyangwa ya tenda ga mutlhangano;

²⁶ni tinguwo ta hubye, ni nguwo ya nyangwa ya hubye leyi yi renzetekelako a tabemakeli ni alati hi wontihe matlhelo, ni tingoti ta kona, ni zibya zontlhe za ntiro wa kona.

²⁷A vana va Kohati hi nyangwa ya ka Amramu, ni nyangwa ya ka Izhare, ni nyangwa ya ka Hebroni, ni nyangwa ya ka Uzieli; leti hi tinyangwa ta ka Kohati.

²⁸A tsengo wa vontlhe vavanuna kusukela ka lava va nga ni hweti yinwe, kala ka lava va nga le mahlweni hi wukale, va wa hi 8,600, lava va hlayisako za wutshamu go basa.

²⁹A tinyangwa ta vana va Kohati ti wa gova hi tlhelweni ga tabemakeli, hi tlhelo ga le Dzongeni.

³⁰A hosana ya yindlu ya ka Kohati ku wa hi Elizafani a nʼwana wa Uzieli.

³¹Lava va wa hlayisa a arke, ni meza, ni meza ya tikandiya, ni maalati, ni zibya za ntiro wa wutshamu ga kubasa, ni xisirelo, ni zontlhe zilo za koha.

³²A hosi ya tihosana ta va ka Levi ku wa hi Eleazari a nʼwana wa mupristi Aroni. I wa rangela lava va hlayisako wutshamu ga kubasa.

³³A vana va Merari: hi nyangwa ya va ka Mahli, ni nyangwa ya va ka Muxi; leti hi tinyangwa ta va ka Merari.

³⁴A tsengo wa vavanuna vontlhe kusukela ka lava va nga ni hweti yinwe a wukale, kala ni ka lava va nga le mahlweni, va wa hi 6,200.

³⁵A hosana ya tiyindlu ta tinyangwa ta ka Merari, hi Zurieli a nʼwana wa Abihaili. Vona va wa gova tlhelweni ga tabemakeli hi tlhelo ga Nwalungu.

³⁶A vana va Merari va wa hlayisa mapulango ya tabemakeli ni tivalelo ta kona, ni timhanze ta kona, ni zitshamu za gona, ni zontlhe zibya za ntiro wa gona;

³⁷ni timhanze ta hubye yi renzetekelako matlhelo wontihe, ni zitshamu za kona, ni xikhongwani ni tingoti ta kona.

³⁸Kanilezi Mosi na Aroni ni vana vakwe va wa gova le mahlweni ka tabemakeli tlhelo ga Mutsuwuka-gambo, va hlayisela a vanana va ka Israeli a wutshamu ga kubasa; kanilezi a wamatiko loyi a tshinelako ka gona i ta dawa.

³⁹A tsengo wa vontlhe vaLevi, lava va hlayilweko hi Mosi na Aroni hi tinyangwa tabye kota kuleletela ka Jehova, vontlhe vavanuna kusukela ka lava va nga ni hweti yinwe a wukale, kala ka lava va nga le mahlweni, va wa hi 22,000.

⁴⁰Zonake Jehova i te ngalo ka Mosi: Hlaya wontihe matewula ya xinuna ya vanana va ka Israeli, kusukela ka lava va nga ni hweti yinwe, kala ka lava va nga le mahlweni hi wukale, u va hlaya hi mavito yabye.

⁴¹U ta nzi tekela a vaLevi matshanwini ya wontihe matewula ya vanana va ka Israeli hakuva hi mina Jehova; ni zifuyo za vaLevi, matshanwini ya zifuyo za vanana va ka Israeli.

⁴²Zonake Mosi i lo hlaya wontihe matewula ya vanana va ka Israeli kota lezi Jehova a mu leleteleko.

⁴³A tsengo wa wontihe matewula ya xinuna, lava va hlayilweko hi mavito kusukela ka lava va nga ni hweti yinwe a wukale, kala ka lava va nga le mahlweni, va wa hi 22,273.

⁴⁴Jehova i lo wulawula kambe ka Mosi, aku:

⁴⁵Teka a vaLevi matshanwini ya matewula wontihe ya vanana va ka Israeli, u teka ni zifuyo za vaLevi matshanwini ya zifuyo zabye; hilezi a vaLevi va tava va mina: hi mina Jehova.

⁴⁶Kasi ku tirula a matewula ya 273 lava va hunzako a vaLevi, u ta teka ntlhanu wa maxekeli hi hloko yinwe ni yinwani; [7]

⁴⁷u ta ringanyisa hi xekeli ga wutshamu go basa; a xekeli legi gi nga ni 20 wa magera.

⁴⁸U ta nyika Aroni a mali leyo, a ku tirula lava va va hunzileko hi wunyingi.

⁴⁹Zonake Mosi i lo teka a mali ya ku tirula lava va va hunzako hi wunyingi lava va tirulweko hi vaLevi;

⁵⁰i lo nyikwa a mali leyo ya ku tirula a matewula ya vanana va ka Israeli; a 1,365 wa maxekeli, hi tsengo wa xekeli ga wutshamu ga kubasa.

⁵¹Mosi i lo nyikela ka Aroni ni ka vana vakwe a mali leyo ya ku tirula a matewula, kota lezo Jehova a lelete leko Mosi.