Read tshwa Mitsengo 4 Bible Online

Mitsengo 4 - tshwa bible

Mitsengo 4

¹Jehova i lo wulawula ka Mosi na Aroni, aku:

²Hlayani a vana va Kohati a xikari ka vanana va vaLevi, hi tinyangwa tabye hi tiyindlu ta vararu vabye,

³lava va nga ni 30 wa malembe ni kuya mahlweni, kala ka lava va nga 50 wa malembe, vontlhe va faneleko ku enghena ntirweni wa tenda ga mutlhangano. [8]

⁴A ntiro wa vanana va ka Kohati, hi lomu tendeni ga mutlhangano, va hlayisa a zibya zi basileko.

⁵Loku a wugovelo gi andlamuka, Aroni ni vana vakwe va ta chisa a xisirelo, va fenengeta ha xona a arke ga wumboni,

⁶ni ku fenengeta hehla ka gona hi nkumba wa mabhebhe ya macalu ni ku andlala hehla ka wona hi nguwo ya wukuxe, va enghenisa ni mipingo.

⁷Ni ku fenengeta a meza ya zibaba za xikombiso hi nguwo ya wukuxe, va veka hehla ka yona a mingelo, ni minzheko, ni magombe, ni maguwana yo nwatsekela ha wona, ni zibaba za masiku ni masiku zi ta vekiwa hehla ka yona. [9]

⁸Zonake va ta fenengeta lezo zilo hi nguwo yo pswhuka; ni nguwo leyo va ta yi fenengeta hi nkumba wa mabhebhe ya macalu, zonake va ta enghenisa a mipingo ya kona.

⁹Va ta teka a nguwo ya wukuxe, va fenengeta ha yona a meza ya tikandiya, ni tikandiya ta kona, ni zitimo za tona, ni zibya za khuma, ni zibya zontlhe za mafura lezi va tirako ha zona a ntirweni wa kona.

¹⁰Va ta yi veka zinwe ni zontlhe zibya za yona lomu ka nkumba wa mabhebhe ya macalu, zonake va yi veka laha ka mpingo.

¹¹Va ta fenengeta a ganzelo ga nzalama hi nguwo ya wukuxe; va fenengeta kambe hi nkumba wa mabhebhe ya macalu, zonake va enghenisa mipingo ka gona.

¹²Va ta teka a zibya zontlhe za ntiro, lezi va tirako ha zona a mitiro ya wutshamu ga kubasa va zi veka lomu ka nguwo ya wukuxe, va engeta va fenengeta hi nkumba wa mabhebhe ya macalu, zonake va zi veka laha ka mpingo.

¹³Va ta susa a khuma lomu ganzelweni, zonake va gi fenengeta hi nguwo yo zirila;

¹⁴le hehla ka gona va ta veka zontlhe zibya lezi va tirako ha zona a ntiro wa ganzelo; a zimbitana za libani, ni mafoloko, ni mafoxola, ni, minzheko, zontlhe zibya za ntiro wa alati, va ta zi fenengeta hi nkumba wa mabhebhe ya macalu, zonake va ta enghenisa mipingo ka gona.

¹⁵Loku Aroni ni vana vakwe va mbhetile ku fenengeta a wutshamu ga kubasa ni zontlhe zibya za kona, a wugovelo gi ta andlamuka; zonake a vanana va ka Kohati va ta ta rwala. Kanilezi va nga ta zi khumba, hakuva zilo zi basileko, va ngafa. Lowu wu tava ntiro wa vanana va ka Kohati, a ku rwala a zibya za tenda ga mutlhangano.

¹⁶A ntiro wa Eleazari a nʼwana wa mupristi Aroni hi ku hlayisa mafura ya tikandiya, ni libani lo nuhela, ni muphahlo wa mapa siku ni siku, ni mafura yo tola; i ta hlayisa ni tabemakeli gontlhe, ni zontlhe zi nga ka gona, a wutshamu go basa ni zibya za gona.

¹⁷Jehova i lo wulawula ka Mosi na Aroni, aku:

¹⁸Chelani kota lezaku a nyangwa ya tiyindlu ta ka Kohati yi nga dzuki yi tsemiwa xikari ka vaLevi.

¹⁹Kanilezi lezi mu ta nga va mahela hi lezaku va hanya, va ngafi, a xikhati lexo va tshinelako ka wutshamu ga kubasa, mu ta maha lezi: Aroni ni vana vakwe va ta yimisa munwe ni munwani ka ntiro wakwe ni ka nzhwalo wakwe.

²⁰Kanilezi va nga engheni va cuwuka a zilo lezi zi basileko, hambu ni kutsongwani, va ngafa. [10]

²¹Jehova i lo wulawula kambe ka Mosi, aku;

²²Hlaya a vanana va ka Gerxoni, hi tiyindlu ta vararu vabye, ni tinyangwa tabye.

²³U ta va hlaya kusukela ka lava va nga ni 30 wa malembe ni kuya mahlweni, kala ka lava va nga 50 wa malembe a wukale; vontlhe va faneleko ku enghena ntirweni wa tenda ga mutlhangano.

²⁴A nitro wa tinyangwa ta ka Gerxoni hi ku tira ni ku rwala, hi lowu:

²⁵va ta rwala a tinguwo ta tabemakeli, ni tenda ga mutlhangano ni zifulelo za kona, ni zifulelo za mabhebhe ya macalu, lezi zi tlhatekwako hi le hehla, ni xisirelo xa laha nyangweni ka tenda ga mutlhangano;

²⁶ni tinguwo ta hubye, ni xisirelo xa nyangwa ya hubye yi nga kusuhani ka tabemakeli ni alati ka matlhelo wontihe; ni tingoti ta kona ni zibya zontlhe za mitiro ya kona; va ta tira yontlhe mitiro ya kona.

²⁷A mitiro yontlhe ya vanana va ka Gerxoni yi ta rumiwa hi Aroni ni vana vakwe, hambu lezi va ta nga rwala, hambu ni lezi va ta nga tira: mu ta va yimisa a ku hlayisa zontlhe lezi va ta nga rwala.

²⁸Lowu wu tava ntiro wa tinyangwa ta va ka Gerxoni, a tendeni ga mutlhangano ni lezi zi yimiselweko vona; va ta tira na va hi lahasi ka Itamari a nʼwana wa mupristi Aroni.

²⁹U ta hlaya a vanana va Merari hi tinyangwa tabye, ni tiyindlu ta vararu vabye.

³⁰U ta va hlaya kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe va faneleko ku enghena ntirweni wa tenda ga mutlhangano.

³¹Hi lezi va ta nga zi rwala ntirweni wabye lomu tendeni ga mutlhangano: hi mapulango ya tabemakeli, ni tivalelo ta kona, ni timhanze ta kona, ni zikhato za kona;

³²ni timhanze ta hubye ya matlhelo wontihe, ni zikhato za tona, ni zikhongwani, ni tingoti, ni zilo zontlhe zi longiselweko a ntiro wa kona; mu ta zi veka mandleni yabye, mu hlaya mavito ya zilo lezi va faneleko ku zi hlayisa ni ku zi rwala.

³³Lowu wu tava ntiro wa tinyangwa ta vanana va ka Merari; a ntiro wabye wontihe tendeni ga mutlhangano, wu ta rangelwa hi Itamari a nʼwana wa mupristi Aroni.

³⁴Zonake Mosi na Aroni ni tihosana ta ntlhangano, va lo hlaya a vanana va ka Kohati hi tinyangwa tabye, ni tiyindlu ta vararu vabye.

³⁵Va lo sangula hi lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe lava va faneleko a ntiro wa tenda ga mutlhangano.

³⁶A tsengo wabye hi tinyangwa tabye va wa hi 2,750.

³⁷Hi valavo va hlayilweko va tinyangwa ta ka Kohati; vontlhe lava va nga tira a ntiro wa tenda ga mutlhangano, na va hi lava va hlayilweko hi Mosi na Aroni, hi kuleletela ka Jehova hi canja ga Mosi.

³⁸A tsengo wa vanana va ka Gerxoni hi tinyangwa tabye, ni tiyindlu ta vararu vabye,

³⁹kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe lava va faneleko a ntiro wa tenda ga mutlhangano,

⁴⁰a tsengo wabye hi tinyangwa tabye, ni tiyindlu ta vararu vabye, va wa hi 2,630.

⁴¹Hi valavo va hlayilweko va tinyangwa ta vanana va ka Gerxoni, vontlhe lava va zi kotako ku tira ntiro wa tenda ga mutlhangano, na va hi lava va hlayilweko hi Mosi na Aroni, hi kuleletela ka Jehova.

⁴²A tsengo wa vanana va ka Merari hi tinyangwa tabye, ni tiyindlu ta vararu vabye,

⁴³kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe lava va faneleko a ntiro wa tenda ga mutlhangano.

⁴⁴A tsengo wabye hi tinyangwa tabye, va wa hi 3,200.

⁴⁵Hi valava va hlayilweko va tiyindlu ta ka Merari, lava Mosi na Aroni va va hlayileko hi kuleletela ka Jehova ha Mosi.

⁴⁶A tsengo wa vontlhe vaLevi, lava Mosi na Aroni ni tihosana ta ka Israeli va va hlayileko hi tinyangwa tabye, ni tiyindlu ta vararu vabye,

⁴⁷kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale, na va hi lava vontlhe va zi kotako ku tira a ntiro, ni lava va rwalako a tenda ga mutlhangano.

⁴⁸Lava va hlayilweko xikari kabye va wa hi 8,580.

⁴⁹Vona va hlayilwe hi Mosi, khwatsi hi kuleletela ka Jehova, loyi ni loyi i lo nyikwa a ntiro wakwe, kutani a nzhwalo wakwe; va lo hlayiwa kota kuleletela ka Jehova ka Mosi.