Read tshwa Mika 1 Bible Online

Mika 1 - tshwa bible

Mika 1

¹A mhaka ya Jehova leyi yi tileko ka Mika wa le Moraxte, masikwini ya Jotamu, na Ahazi, na Hezekia, a tihosi ta ka Juda, leyi a nga nyikwa xungetano na Samaria na Jerusalema.

²Nwina matiko wontlhe, ingisani! Zwana wena misava, ni zontlhe lezi zi nga ka wena! Hosi Jehova i na ni wukustumunyu go mu vukela, yona a Hosi leʼyi nga tempeleni ya yona yo basa. [1]

³Hakuva Jehova i huma wutshanwini gakwe, a relela, a ta fambafamba matshanwini ma tlakukileko ya misava.

⁴A zitsunga zi ta nyeka lahasi kakwe, ni mikova yi ta khayeka khwatsi i sera mahlweni ka nzilo, ni kukotisa mati loku ma halatwa laha nzhelelweni. [2]

⁵Zontlhe lezo zi ta maheka hi kota ya zihambunyeto za Jakobe ni zionho za yindlu ya ka Israeli, A xihambunyeto xa Jakobe xi huma kwihi? A hi le Samaria ke? Hi wahi a matshamu yo tlakuka ya ka Juda? A hi Jerusalema ke?

⁶Hikwalaho nzi ta hunzula Samaria a maha a nhulu ya maribye lomu masinwini, lomu ku nga byaliwa kona a zivina. Nzi ta chulula a maribye ya kona le nkoveni, nzi funungula a ziseketelo za kona.

⁷A zifananiso zakwe zontlhe zi vatlilweko zi ta fayetelwa, ni minzhiho leyi a yi amukeleko hi wubhayi yi ta hiswa hi nzilo, nzi khungumulela a zifananiso zakwe za vanungungulu; hakuva i zi kumile hi nzhiho wa wubhayi, zi ta tlhela zi maha hakhelo ya xibhayi. [3]

⁸Hi kota ya lezi nzi ta rila, nzi hlomula; nzi ta famba na nzi nga hi na zilato na nzi hi ximbyiri. Nzi ta rila ku fanana ni, hlolwa, nzi maha hlomulo khwatsi nzi mbuwu.

⁹Hakuva a timbanga takwe a ti chumeki, ti chikele ni le ka Juda, ti chikela ni le nyangweni ya tiko ga mina le Jerusalema. [4]

¹⁰Mu nga dzuki mu zi kumbuka le Gate, ni ku rila mu nga rili. Le Bet-le-Afra nzi puluwunzile lomu tshurini. [5]

¹¹Wena loyi u akileko le Xafira, suka na u hi ni wumbyiri ni tingana. Muaki wa le Zaanani wa chava ku huma, a nkosi wa. Bet-ezeli wa mu hetela a kutsumba.

¹²A muaki wa le Marote wa rinzela a kuhanyiswa hi lixuve la hombe, hakuva a khombo gisukile hi ka Jehova gi relela gi chikela nyangweni ya Jerusalema.

¹³Wena muaki wa le Lakixe, panisa a mahaxi ya mazambo laha kareteni, hakuva hi wena a masangulo ya xionho xa nhanyana wa le Zioni, a zihambunyeto za Israeli zi kumilwe ka wena. [6]

¹⁴Hikwalaho u ta hambana na Morexete-gate. A tiyindlu ta le Akziba ti ta maha a xibuka xi pswhileko ka tihosi ta ka Israeli.

¹⁵Wena muaki wa le Marexa, nzi ta tlhela nzi ku nehela loyi a ta nga maha a nwinyi wa wena; a vahombe va Israeli va ta chavela le Addulama. [7]

¹⁶Halula misisi, halulela a vanana va wena va ranzekako, halula a hloko ya wena yi fanana ni ya koti, hakuva va yiswa wukhumbini kule na wena.