Read tshwa Mika 2 Bible Online

Mika 2 - tshwa bible

Mika 2

¹I khombo ka vona lava va alakanyelako kubiha, va hlota xikungo xo biha masengweni yabye, va zi maha loku gi cile, hakuva zi le ntanwini wa mandla yabye.

²Va navela masimu ni tiyindlu, va zi teka; va tsimbeketa a munhu ni yindlu yakwe, ni munhu loyi a nga ni tshomba yakwe. [8]

³Hikwalaho Jehova i ngalo: Langutani, nza alakanyela a khombo hehla ka lixaka leli, legi mu to kala mu nga zi koti ku humesa a tinhamu ta nwina ka gona, mu nga ha ta famba hi matshanza, hakuva a xikhati xi bihile.

⁴A siku lego va ta mu xelembenza hi lisimu, va taba nkosi hi lisimu la xirilo, vaku: Hakunene hi Iovile! I nyikela vanwani a tshomba ya tiko ga hina. Hikuyini a nzi wutleleko gona? I avele a masimu ya hina ka lava va hluwukileko. [9]

⁵Hikwalaho u nga tava naye wo ku hoxela a lingoti lo pima xipetso na u hi lomu hlengeletanweni ya Jehova.

⁶Va profeta vaku: Mu nga profeteni! Ngha va nga byabyatsi hi lezi zilo; a tinzhukano tabye a ti mbheli!

⁷Wena yindlu ya Jakobe, xana a Moya wa Jehova wu hatla ku zangara ke? A matirela yakwe hi walawo ke? A timhaka ta mina a ti na wunene ka loyi a fambako hi kululama ke?

⁸Kanilezi a masiku laya a tiko ga mina gi nzi mahile a nala wa gona. Mu runzuwulela a mikumba ya vanhu lava va hunzako hi kurula lava va nga ranziko ku holova.

⁹Mu hlongola a vavasati va tiko ga mina tindlwini tabye to tsakisa, a vanana vabye mu va tekela a wukosi ga mina kala kupinzuka.

¹⁰Sukani mu famba, hakuva a mu na wuhumulelo laha, hi kota ya ku nga hlazeki loku ku yisako kulobyisweni ka hombe.

¹¹Loku a munhu a famba hi moya wa kukhohlisa, a hemba wunwa aku: Nzi ta ku profetela hi vinya ni byala, a muprofeti loye i sasekele lava vanhu. [10]

¹²Nzi ta tsombanyisa a vanhu vontlhe va wena Jakobe, nzi hlengeletela a misalela ya ka Israeli, nzi ta va tlhanganyisa wutshamu ginwe khwatsi tiyivu lomu rangeni, kukotisa tlhambi laha wuriselweni ga wona, va ta maha guwa ga hombe hi kota ya wunyingi ga vona.

¹³A mubhoxi wa ndlela i rangile mahlweni kabye; va bhoxile va chikela nyangweni, va andlamuka hi yona; a hosi yabye yi va rangela, yena Jehova a va rangela.