Read tshwa Mika 3 Bible Online

Mika 3 - tshwa bible

Mika 3

¹Zonake nzi te ngalo: Zwanani nwina tihosi ta ka Jakobe, na nwina vafumeli va ka Israeli: A hi nwina mu faneleko a ku tiva nongameto ke?

²Nwina mu venga zinene, mu ranza kubiha; nwina mu yewula a hlonge yabye, mu hletela a nyama marambyini yabye.

³Kambe vaga a nyama ya vanhu va mina, va sunzuwula a dewu gabye, va tshova ni matambu yabye; ina, va va chupulela zipanzana khwatsi va laʼku chela mbiteni, khwatsi i nyama bhoteni.

⁴Hikwalaho Jehova a nga ta va hlamula loku va rila kakwe. Xikhatini lexo i ta va fihlela a nghohe yakwe hi kota ya zimaho zabye zi bihileko. [11]

⁵I wula lezo Jehova xungetano ni vaprofeti lava va pengisako a vanhu va mina; loku va hi ni nchumu xo tlukuluta hi meno yabye, vaku: Kurula! kanilezi loku va nga nyikwangi nchumu, va va vuxela yimpi.

⁶Hikwalaho mu ta humelwa hi wusiku, kasi mu nga hi na miwoniso; ku tava munyama ka nwina kasi mu nga ha vumbi. A gambo gi ta pelela a vaprofeti, ni hlikanhi wu ta phuma hehla kabye.

⁷A zitumbe zi tawa tingana, a vangoma va ta kanganyiseka; vontlhe va ta vala milomu, hakuva ku hava hlamulo wu tako hi ka Nungungulu. [12]

⁸Kanilezi mina nzi tele hi ntamu hi wona Moya wa Jehova, nzi tele hi nongameto ni wunhenha a kuva nzi tlhatlhambutela ka Jakobe a zihambunyeto zakwe ni ka Israeli a kuonha kakwe.

⁹Zwanani lezi nwina tihosi ta ka Jakobe, na nwina vafumeli va ka Israeli, nwina mu nyenyako nongameto, mu bihisako kontlhe kululama.

¹⁰Nwina mu akako Zioni hi nkhata ni Jerusalema hi kubiha. [13]

¹¹A tihosi ta kona ti lamula hi ku xavelelwa, a vapristi va kona va gonzisa hi ku fela nzhiho, a vaprofeti va kona va vumbela mali: kanilezi va ti seketela ha Jehova, vaku: Kasi Jehova a nga xikari ka hina ke? a kubiha a ku na ku hi wela!

¹²Hikwalaho hi kota ya nwina, Zioni i ta rimiwa khwatsi i simu, na Jerusalema i ta maha tinhulu ta maribye, ni xitsunga xa tempeli xi tava xitsunga xa khwati. [14]