Read tshwa Mika 5 Bible Online

Mika 5 - tshwa bible

Mika 5

¹Makunu tsombanyisa a mabutho ya wena, wena nhanyana wa tiyimpi! Va hi ranzele matlhelo wontlhe; vaba a hlaya ya mulamuli wa ka Israeli hi nhonga.

²Kanilezi wena Betlehema Efrata, loyi u nga tsongwani xikari ka mingango ya ka Juda, ku ta huma hi ka wena ata ka mina loyi a ta ngava hosi ya ka Israeli, loyi a nga hi kona kaleloko, kusukela xikhatini xa pinzukewa. [17]

³Hikwalaho i ta va nyikela valala kala xikhatini lexo loyi a lunwako a ta nga hefemula ha xona; zonake a Vanakulobye lava va seleko va ta tlhelela ka vana va ka Israeli.

⁴I ta yima a gisa a tlhambi hi ntamu wa Jehova, ni wukulu ga vito ga Jehova a Nungungulu wakwe. Va ta aka hi kurula, hakuva lezo i tava wa hombe kala magemetamusi ya misava.

⁵I ta neha kurula. Laha a muAssiria a ta nga enghena tikweni ga hina, a kanziha lomu ziluvelweni za hina, hi ta mu vuxela ntlhanu wa varisi ni vambiri, ni ntlhanu ni tinharu a tihosana ta vanhu.

⁶Va ta kaputa a tiko ga Assiria hi supado, ni tiko ga Nimrode kala tinyangweni ta gona. I ta hi tlhatlhisa mandleni ya maAssiria laha a ta nga enghena tikweni ga hina, ni laha a ta nga tlula a mimbhingano ya hina.

⁷A misalela ya ka Jakobe yi tava xikari ka matiko manyingi, khwatsi i nzhokati yi tako hi ka Jehova, ni ku khwatsi madona ya vula laha ka byanyi, leyi yi nga yimiswiko hi munhu, hambu ku rinzela a vana va vanhu.

⁸A misalela ya ka Jakobe yi tava xikari ka matiko ni ka tixaka to tala a ku khwatsi i nghala a xikari ka zihari za khwati, khwatsi i nghalana yi nga xikari ka mitlhambi ya tiyivu, leyi yi nge loku yi hunza yi kanzihela yi hanzula, na ku hi hava loyi a nga ponisako.

⁹Ngha a canja ga wena gi tlakuswa hehla ka lava va ku vukelako, a valala va wena vontlhe ngha va lova. Israeli i ta basiswa.

¹⁰Jehova i ngalo: Hi siku lego nzi ta lovisa a mahaxi ya wena lomu tikweni ga wena, nzi tshoveletela ni tikareta ta wena. [18]

¹¹Nzi ta hahlula a miti ya tiko ga wena, nzi khungumula a makhokhola ya wena wontlhe.

¹²Nzi ta fuvisa a wutumbe canjeni ga wena, u nga ha ta kuva ni vavumbi kambe.

¹³Nzi ta fuvisa a zifananiso za wena zi vatlilweko, ni timhinga ti nga xikari ka wena, u nga ta ha khozela a mitiro ya mandla ya wena.

¹⁴Nzi ta tsuwula a maAxera lawa ma nga xikari ka wena, nzi lovisa a miti ya wena.

¹⁵Nzi ta ti photela hi zanga ni khulo hehla ka matiko lawa ma nga ingisiko.