Read tshwa Nahume 3 Bible Online

Nahume 3 - tshwa bible

Nahume 3

¹Khombo a give ka muti lowu wa nkhata! Wu tele hi mawunwa ni tihanyi ni kudaya: a ku tsikiwi ku phanga.

²Ka zwala kurotlola ka xisephu, ni guwa ga maranzani ya tikareta, ni kudlaladlaleka ka mahaxi, ni kutlula ka tikareta.

³Hi nga wonani a mahaxi ma tsutsumiswako hi vakhileli va wona, ni tisupado ti phatimako, ni matlhari ma kwezimako, ni wunyingi ga lava va delweko, tinhulu ta zirumbi. A zirumbi a zi mbheli, va khunguvanyeka hi zirumbi zabye!

⁴Hi kota ya wunyingi ga wuoswi ga xibhayi lexi xi na nga ni wumbhuri, loyi a tlharihileko hi wuloyi, loyi a xavisako matiko hi wubhayi gakwe, ni zibongo hi wuloyi gakwe,

⁵nzi ta ku vukela, ku wula Jehova wa tiyimpi, nzi ta tlakusa a nguwo ya wena yi vala a nghohe ya wena, nzi kombisa a matiko a wumbyiri ga wena, ni mifumo a tingana ta wena.

⁶Nzi ta ku phatsekela chaka, nzi ku nyenyezisa, nzi ku maha a xilo xi rewukisako.

⁷Zonake vontlhe lava va ku wonako, va ta ku tsutsuma, vaku: Niniva i hahlukile! Himani a ta nga mu rilela? Nzi ta ku kumela kwihi a vachaveleli?

⁸Kasi u chukwana ku hunza Noamoni a muti lowu wu nga ranzelwa hi micongo ya le Gipite, lowu wu nga bhiyelwe hi bimbi, lowu a khurisi ga wona gi nga hi bimbi ke?

⁹A maEtiopia ni maGipite va wa hi ntamu wakwe, a xidlemo xa tsanzavahlayi; Puti na Lubima va wa hi vavuneteli va wena. 2 Kro. 12:3; 14:9

¹⁰Hambulezo, i lo khomiwa a yiswa wukhumbini, ni vana vakwe va lo pswhandlaswa lomu maphangweni; va lo hlahluvela a vavanuna vakwe va dumileko, a vahombe vakwe vontlhe va bohiwa hi mangenje.

¹¹Na wena kambe u ta popiwa, u ti fihla; u ta lava a wuchavelo u tsutsuma valala va wena.

¹²A makhokhola ya wena wontlhe ma ta ku khwatsi mikuwu yi nga ni mihanzu yi buvileko kuranga; loku yi jujiwa yi wela kanwini ka mugi.

¹³Languta, a vavanuna va nga ka wena mbavasati ntsena, a tinyangwa ta tiko ga wena ti vululelwe a valala va wena; a nzilo wu hisile a zikwinyaro za wena.

¹⁴Ti khele mati, hakuva u ta vimbezelwa; tiyisa a makhokhola ya wena; enghena wumbeni u vuva nzhope, u aka a nhulu ya zitini za ku hiswa.

¹⁵Laho a nzilo wu ta ku hisa, a supado yi ku lovisa, yi ta ku lovisa ku fanana ni zidodwani, hambu loku u tele kukotisa zidodwani, u anza kukotisa humbi.

¹⁶A vamahungani va wena va anzile ku hunza a tinyeleti ta le tilweni, a zidodwani zi gwimba tipapa zi puruma zi famba,

¹⁷A tihosana ta wena ti khwatsi i humbi, ni vatongi va wena ve khwatsi i tsunzu wa bhanzala, legi gi tshamako lomu makhuhwini hi siku go titimela, kanilezi loku a gambo gi huma gi hangalaka, gi nga tibyiwi laha gi yileko kona.

¹⁸Wena hosi ya le Assiria, a varisi va wena va etlele, a tinhenha ta wena ti le kuhumuleni. A vanhu va wena va hangalakile lomu xitsungeni, a nga kona a nga va tsombanyisako. [5]

¹⁹A mbanga ya wena a yi na ku kanzetelwa, i mbanga; ya kufa. Vontlhe lava va zwako ha wena va ta phakatela mandla hi litsako; hakuva himani a kiyeleko a kubiha ka wena?