Read tshwa Habakuka 1 Bible Online

Habakuka 1 - tshwa bible

Habakuka 1

¹A xiprofeto, a muwoniso lowu Habakuka a wu wonileko.

²Jehova, nzi ta rila kala rini, na wena u nga zizwi ke? Nza rila ka wena hi kota ya tihanyi ta vanhu, kanilezi a ku hanyisi!

³Hiyini u nzi kombisako kubiha, u nzi wonisa hlokiselelo? Hakuva a kuphanga ni tihanyi zi le mahlweni ka mina; ku na ni timholova, ku vuka ni kukanetisana.

⁴Hakuva a nawo a wa ha hi na ntamu, a ka ha lamuliwi hi nongameto; hakuva a vakubiha va ranzela a valulamileko, hikwalaho a kulamula ku byeketwa.

⁵Cuwukani xikari ka matiko, mu hlamala muku kaye! hakuva masikwini ya nwina ku tiriwa a ntiro, lowu mu to kala mu nga wu kholwi hambu loku mu byeliwa. [1]

⁶Hakuva nzi ta vuxa a maKaldea, a tiko go leva ga tihanyi, legi gi tsemakanyako a misava yontlhe, kasi ku ya teka a wuakelo legi gi nga hiko gabye.

⁷Va tshisa, va chaveka; va maha ni zihi lezi va zi ranzako.

⁸A mahaxi yabye ma tsutsuma ku hunza tiyingwe, ma tshisa ku hunza mahlolwa ni wusiku; a vakhileli va wona va famba hi ku ti kulisa. Ina, a vakhileli vabye va mahaxi vata hi le kule, va puruma khwatsi i gama legi gi hatliselako a pfimba wa gona. [2]

⁹Vontlhe va tela ku ta phanga, a tinghohe tabye ti komama mahlweni, va gotsovanyisa tihloko khwatsi i seke.

¹⁰Va tseketsela a tihosi, ni tihosana ti hi xihlekiso kabye; va hlakana hi makhokhola wontihe, hakuva va vingeretela a tshuri va enghena ka wona.

¹¹Zonake va hunza kukotisa a mheho, va ti rwexa milanzu, hakuva a ntamu wabye wu mahile nungungulu wabye.

¹²Kasi a ku sukeli kupinzukeni, wena Jehova Nungungulu wa mina, Loyi a Basileko wa mina ke? Hi nga tafa! Jehova, wena u va vekele kulamulwa; wena u nga Ribye ga hina, u va yimisele a kutsayiswa.

¹³Wena wa mahlo ma basileko, laha ka kuva u hluleka ku cuwuka kubiha, lawa ma nga zi kotiko ku wona kutsimbeketwa, hikuyini u cuwukako a vamahi va kubiha, u miyela loku a wakubiha a mita loyi a mu hunzako hi kululama ke?

¹⁴U mahile vanhu va fanana ni zidluwani za bimbi, khwatsi hi zikokakoka lezi zi nga hiko na mufumeli.

¹⁵Wa va tlukula vontlhe hi ximemba, a va khoma hi likoka lakwe, a va phasa lomu ka masole yakwe; hikwalaho a bhuma hi kutsaka.

¹⁶Zonake a phahlela a likoka lakwe, a hisela masole yakwe a libani, hakuva hi zona zi nonisako a xiavelo xakwe, ni zakuga zakwe zi nanziha.

¹⁷Xana i ta simama a chulula a likoka lakwe, na a nga tsiki ku daya matiko?