Read tshwa Habakuka 2 Bible Online

Habakuka 2 - tshwa bible

Habakuka 2

¹Nzi kona laha wurinzelweni ga mina, nzi yima le hehla ka khokhola, nzi rinzela kasi kuzwa lezi Jehova a ta nga zi wulawula hi mina, ni lezi a ta nga hlamula hi kota ya xirilo xa mina.

²Jehova i lo nzi hlamula, aku: Tsala a muwoniso, u wu dlunyatisa laha ka timbila, kasi loyi a wu gonzako a wu pima hi xihatla.

³Hakuva a muwoniso lowu wa ha rinzele a xikhati xi yimisilweko, kanilezi wu hatlisa wuya kumbheleni, na wu nga hi wa mawunwa. Hambu loku wu hlwela, wu rinzele, hakuva wu tata futsi, wu nga ta tindeka.

⁴Languta, a muhefemulo wakwe wu kukumukile, a wu lulamangi nzeni kakwe. Kanilezi loyi a lulamileko! ta hanya hi kukholwa kakwe. [3]

⁵Tlhatakumbiri, a vinya gi khohlisa, a wamatshanza a nga na ku tshamiseka mutini. I ahlamisa a nomu wakwe khwatsi Xeole, i na ni mahlokoti khwatsi hi lufo, wa ti tsombanyisela wontihe matiko, a ti hlengeletela tixaka tontlhe.

⁶A matiko wontihe lawo ma nga ta wulawula ha yena hi kufananisa, ni vingu ga xiruko ke? Va taku: Khombo a give ka loyi a ti anziselako lezi zi nga hiko zakwe! I ta zi maha kala rini, yena loyi a ti rwexako miseve ya milanzu?

⁷Va nga ta vuka hi xitshuketi lava va ta nga ku lonza ke? Va nga ta vuka lava va ta nga ku karata, uva pfimba wabye ke?

⁸Kota lezi u phangileko a matiko yo tala, hizalezo a matiko wontihe manwani ma ta ku phangawu, hi kota ya nkhata wa vanhu, ni hi kota ya mitiro ya kanu leyi u yi maheleko matiko ni miti ni ka vontlhe lava va akileko ka yona.

⁹Khombo a give ka loyi a fumisako a yindlu yakwe hi bhinzu go biha, kasi a aka a xisaka xakwe le hehla, a ti ponisa khombyeni.

¹⁰A yindlu ya wena yi tawa tingana hi makungo ya wena, hi ku lovisa a matiko manyingi u onhele a moya wa wena nwinyi.

¹¹Hakuva a ribye gi ta kanyuluka na gi hi laha khurisini, ni naneko wu ta gi hlamula na wu hi le langweni.

¹²Khombo a give ka loyi a akako muti hi nkhata, a yimisako a doropa hi kubiha.

¹³Kasi a hi Jehova wa tiyimpi a nge ngalo: A matiko ma tirela lezi zi ta nga hiswa hi nzilo, ni mifumo yi ti karatela mahala?

¹⁴Hakuva a misava yi ta tala hi ku tiva a wukulu ga Jehova, kota lezi a kueta ka bimbi ku fenengetwako hi mati.

¹⁵Khombo a give ka wena loyi u nwisako byala a muakelwane wa wena, u xanganyela a wuxungu ga wena lomo, u mu popisa kasi ku cuwuka a wumbyiri gakwe!

¹⁶U xurile hi tingana na ku nga hi wukosi. Nwana wena nwinyi kasi u kombisa a wukhuna ga wena. A gombe gi nga canjeni ga xinene ga Jehova gi ta hendleletwa ka wena, ni tingana ti ta nyenyezisa a wudumo ga wena.

¹⁷Hakuva u ta welwa hi kuhahlulwa ko fana ni loku ku mahilweko le Lebanoni, ni kulobyiswa ka zihari ku ta ku chavisa, hi kota ya nkhata wa vanhu, ni hi kota ya mitiro ya kanu leyi u yi maheleko matiko ni miti ni ka vontlhe lava va akileko ka yona.

¹⁸Xi vuna yini a xifananiso lezi a muvatli wa xona a xi vatlileko; ni xifananiso xi chululweko, lexi xi gonzisako mawunwa, lezi a mumahi wa xona a xi tsumbako, lezaku a zi maha na zi hi timbeveve ke?

¹⁹Khombo a give ka yena loyi ange ka sinya: Vuka! aku ka ribye ga mbeveve: Suka! A xilo xa kunghahi xi nga gonzisa nchumu ke? Kunene xi nameketelwe a nzalama ni siliva, kanilezi a ku na moya nzeni ka xona.

²⁰Kanilezi Jehova i lomu tempeleni yakwe yi basileko, a misava yontlhe ngha yi rutisa mahlweni kakwe! [4]