Read tshwa Hagai 2 Bible Online

Hagai 2 - tshwa bible

Hagai 2

¹Hi hweti ya wuntlhanu ni timbiri, hi siku ga 21 ga hweti, ku lota a mhaka ya Jehova hi nomu wa Hagai a muprofeti, yiku:

²wulawula ka Zerubabeli a nʼwana Xealtieli, a mwamangulu wa le Juda, ni ka Joxua a nʼwana Jehozadaki, a mupristi wa hombe, ni ka misalela ya vanhu, uku;

³Himani a seleko xikari ka nwina, loyi a nga wona a yindlu leyi a wukosini ga yona go ranga ke? Makunu mu yi wonisa kuyini lezi? Kuwoneni ka nwina, leyi a yo khwatsi a hi nchumu ke?

⁴Hambulezo tiyisa, Zerubabeli, ku wula Jehova; tiyisa na wena Joxua nʼwana Jehozadaki, mupristi wa hombe; tiyisani nwina nwentlhe vanhu va tiko, ku wula Jehova, mu tira, hakuva nzi na nwina, ku wula Jehova wa tiyimpi,

⁵khwatsi hi xivumelwano xa mina lexi nzi nga maha na nwina laha mu nga huma hi le Gipite, ni Moya wa mina, wu tshamile xikari ka nwina: mu nga chavi!

⁶Hakuva Jehova wa tiyimpi i ngalo: Ka hi xikhatanyana xitsongwani, nza ha ta tsekatsekisa kanwe a tiko ni misava, ni bimbi ni misava yi womileko. [3]

⁷Nzi ta tsekatsekisa a matiko wontlhe, ni titshomba tontlhe ta matiko ti ta nehiwa lomu; mina nzi ta tata a yindlu leyi hi wukosi, ku wula Jehova wa tiyimpi.

⁸A siliva nja mina, ni nzalama nja mina, ku wula Jehova wa tiyimpi.

⁹A wukosi go gumesa ga yindlu leyi gi tava ga hombe ku hunza leʼgo ranga, ku wula Jehova wa tiyimpi; a ka wutshamu legi nzi ta nyika kurula, ku wula Jehova wa tiyimpi.

¹⁰Hi Siku ga 24 ga hweti ya wuntlhanu ni mune, hi lembe ga wumbiri ga kufuma ka Dariusi, ku lota a mhaka ya Jehova hi nomu wa muprofeti Hagai, yiku:

¹¹Jehova wa tiyimpi i ngalo: Makunu wutisa vapristi xungetano ni nayo, uku:

¹²Loku a munhu a welela a nyama yo basa hi nguwo yakwe, a wuya a henya a xibaba hi yona nguwo, kutani matsawu, kutani vinya, kutani mafura, ni lihi lixaka la zakuga, zi ta basa ke? A vapristi va lo hlamula, vaku: Ahihi!

¹³Zonake Hagai aku: Loku a munhu a ti nyenyezisileko hi ku khumba a xirumbi a henya ni xihi xa zilo lezi, xa nyenyeziswa ke? A vapristi vaku: Xa nyenyeziswa. [4]

¹⁴Zonake Hagai aku: Zi nghaho ni vanhu lava, zi nghaho ni lixaka leli mahlweni ka mina, ku wula Jehova. Zi nghaho ni mitiro yontlhe ya mandla yabye; ni zontlhe lezi va zi nyikelako lahaya, a zi hlazekangi.

¹⁵Makunu nza mu kombela, lezaku mu ehleketa lezaku ku wa mahisa kuyini kusukela nyamutlha kuya nzhako, hi mahlweni na ku nga se vekiwa a ribye ginwe hehla ka ginwani a tempeleni ya Jehova;

¹⁶a masikwini lawo loku a munhu ata ka nhulu yi nga, ni 20 wa tipimo ta mavele, i wa kuma 10 ntsena; loku ata muphongolweni wa vinya a ku takha 50 wa tipimo, i wa kuma a 20 ntsena.

¹⁷Nzi lo muba hi xikobani, ni kukura, ni maralala, mitirweni yontlhe ya mandla ya nwina; kanilezi a mu tlhelelangi ka mina, ku wula Jehova.

¹⁸Nza mu kombela lezaku mu ehleketa kusukela nyamutlha kuya nzhako, kusukela siku ga 24 ga hweti ya wuntlhanu ni mune kala a siku legi a xiseketelo xa yindlu ya Jehova xi nga yimisiwa ha gona, ehleketani lezaku ku wa mahisa kuyini.

¹⁹Ya ha hi kona a mbewu lomu gombeni ke? ge hambu a xivina, ni mikuwu, ni sinya ya pomegranada, ni sinya ya maoliva, a zi na nga pswala nchumu. Kanilezi kusukela nyamutlha nzi ta mu katekisa.

²⁰A mhaka ya Jehova yi lota ga wumbiri ka Hagai hi siku ga 24 ga hweti, yiku:

²¹Byela Zerubabeli a mwamangulu wa le Juda, uku: Nzi ta tsekatsekisa a tilo ni misava.

²²Nzi ta khungumula a zitshamu za wuhosi za mifumo, nzi ta fuvisa a ntamu wa mifumo ya vamatiko; nzi ta hangalasa a tikareta ni vakhileli va tona; a mahaxi ni vakhileli va wona va ta dawa munwe ni munwani hi supado ya nakulobye.

²³A siku lego, ku wula Jehova wa tiyimpi, nzi ta ku teka wena Zerubabeli, nanza ga mina, nʼwana Xealtieli, ku wula Jehova, nzi ta ku maha kota xifungo; hakuva nzi ku hlawule, ku wula Jehova wa tiyimpi.