Read tshwa Zakaria 4 Bible Online

Zakaria 4 - tshwa bible

Zakaria 4

¹A ngelosi leyi yi nga wulawula na mina yi lota kambe, yi ta nzi vuxa, khwatsi hi loku a munhu a vuxiwa wurongweni.

²Yiku ka mina: Xini u xi wonako? Nzi hlamula nziku: Nzi wona a meza ya tikandiya yo mahiwa hi nzalama basi; le hehla ka yona ku hi ni xibya xo chela kona mafura, na yi hi ni ntlhanu wa tikandiya ni timbiri; ku na ni ntlhanu wa mipuva ni mimbiri yi yako ka tikandiya ti nga hehla ka yona.

³Ku hi ni tisinya timbiri ta maoliva kusuhani ka yona, yinwe hi tlhelo ga xinene ga xibya, a yinwani hi tlhelo ga xibhabha.

⁴Nzi te ngalo ka ngelosi leyi yi nga wa wulawula na mina: Hosi yanga, zini lezi?

⁵A ngelosi leyi yi nga wulawula na mina yiku: A ku zi tivi lezi zilo ke? Nziku: A nzi zi tivi, hosi yanga.

⁶Yi lo hlamula yiku ka mina: A mhaka ya Jehova ka Zerubabeli hi leyi yaku; Zi nga ta mahiwa hi yimpi hambu hi ntamu, kanilezi hi Moya wa mina, ku wula Jehova wa tiyimpi.

⁷Wena xitsunga xa hombe, u xini mahlweni ka Zerubabeli? U ta maha livala ntsena. I ta veka a ribye ga le hehla na ku huwelelwa ku ngalo: A wuxinji, a wuxinji a give ka gona!

⁸A mhaka ya Jehova yi lota ka mina kambe, yiku:

⁹A mandla ya Zerubabeli ma vekile a xiseketelo xa yindlu leyi, a mandla yakwe ma ta yi mbheta: mu ta zi tiva lezaku Jehova wa tiyimpi i nzi rumile ka nwina.

¹⁰Himani a kanyisako a siku ga zilo zitsongwani? hakuva a mahlo lawa ya ntlhanu ni mambiri, ma nga ya Jehova, lawa ma cuwukako a misava yontlhe, ma ta tsaka loku ma wona a lipimo canjeni ga Zerubabeli.

¹¹Zonake mina nziku kakwe: Ta yini a tisinya leti timbiri ta maoliva tlhelweni ga xinene ni ga xibhabha ga meza ya tikandiya ke?

¹²Nziku kakwe khati ga wumbiri: Nja yini a maravi lawa ya mambiri ya maoliva ma nga kusuhani ni mipopi mimbiri ya nzalama yi humako mafura?

¹³Aku ka mina: A ku zi tivi lezaku zini lezi ke? Mina nziku: A nzi tivi, hosi yanga.

¹⁴Zonake yena aku: Lava mbatotiwa vambiri va yimileko mahlweni ka Hosi ya misava yontlhe.