Read tshwa Zakaria 8 Bible Online

Zakaria 8 - tshwa bible

Zakaria 8

¹A mhaka ya Jehova wa tiyimpi yi lota ka mina, yiku:

²Jehova wa tiyimpi i ngalo: Nzi na ni xiluse xa hombe ha Zioni, nzi gi lusela hi khulo ga hombe.

³Jehova i ngalo: Nzi ta tlhelela Zioni, nziya aka xikari ka Jerusalema. Jerusalema i ta vitanwa ku Muti wu tsumbekileko; a xitsunga xa Jehova wa tiyimpi xi ta vitanwa ku Xitsunga xi Basileko.

⁴Jehova wa tiyimpi i ngalo: Ka ha tava kona a zikhosana za vavanuna ni za vavasati lomu maphangweni ya Jerusalema khwatsi hi kale, munwe ni munwani na hi ni chetengelo hi kota ya wukale.

⁵A maphango ya muti ma ta tala hi vafana ni vanhanyana, va hlakanela kona.

⁶Jehova wa tiyimpi i ngalo: Hambu loku a mhaka leyi yi nga tsanza a kuwoneni ka misalela ya vanhu lava a masikwini lawo, yi wa ta tsanza mahlweni ya minawu ke? ku wula Jehova wa tiyimpi.

⁷Jehova wa tiyimpi i ngalo: Langutani, nzi ta ponisa a vanhu va mina ka tiko ga Mutsuwuka-gambo, ni ka tiko ga Muhlwa-gambo.

⁸Nzi ta va wuyisa, va ta tshama xikari ka Jerusalema; va tava vanhu va mina, mina nzi maha Nungungulu wabye, hi zinene ni kululama.

⁹Jehova wa tiyimpi i ngalo: Tiyani hlana, nwina lava mu zwako a timhaka leti ti humako milonwini ya vaprofeti lava va nga kanela masikwini lawa ku nga sanguliwa ha wona a yindlu ya Jehova wa tiyimpi, lezaku ku akiwa a tempeli.

¹⁰Hakuva hi mahlweni ka masiku lawo a ntiro wa munhu wu wa nga hi na bhinzu, ni zihari zi wa tira mahala; lava va humako ni lava va enghenako va wa nga hi na kurula hi kota ya valala. Hakuva nzi wa kuce-tela vanhu lezaku munwe ni munwani a vukela a muakelane wakwe.

¹¹Kanilezi makunu nzi nga ta maha ka misalela ya vanhu lava khwatsi hilezi nzi nga maha masikwini ya kale, ku wula Jehova wa tiyimpi.

¹²A mbewu ya kurula yi tava kona; a vina wu ta humesa a mihanzu ya wona, ni misava yi ta humesa a pfuno wa yona, ni tilo gi ta vanga nzhokati ya gona. Zontlhe lezi nzi ta zi nyika ka misalela ya vanhu lava a kuva tshomba yabye.

¹³Khwatsi hilezi mu nga hi xiruko xikari ka matiko, nwina yindlu ya ka Juda ni ya ka Israeli, lezo nzi ta mu hanyisa, muva xikatekiso. Mu nga chavi, kanilezi tiyani hlana.

¹⁴Hakuva Jehova wa tiyimpi i ngalo: Khwatsi hilezi nzi nga xuva ku mu mahela kubiha laha a vadadani va nwina va nga vindlusa a zanga ya mina, nzi nga va tsetsi, ku wula Jehova wa tiyimpi,

¹⁵zinghaho nzi xuvile masikwini lawa a ku mahela wunene ka Jerusalema ni ka yindlu ya ka Juda; mu nga chavi!

¹⁶A zilo lezi mu ta nga zi maha hi lezi: Munwe ni munwani a wule zinene ka muakelwane wakwe; lamulani hi nongameto ni kurula lomu tihubyeni ta nwina; [8]

¹⁷ngha munwe ni munwani a nga hi na xikungo xo vukela muakelane wakwe, mu nga ranzi ku hlambanyela mawunwa, hakuva zontlhe lezo zilo nza zi venga, ku wula Jehova.

¹⁸A mhaka ya Jehova wa tiyimpi yi lota ka mina, yiku:

¹⁹Jehova wa tiyimpi i ngalo: A masiku ya kuyila ka hweti ya wumune, ni ka ya wuntlhanu, ni ka ya wuntlhanu ni timbiri, ni ka ya wukhume, ma ta maha masiku ya litsako ni kunengela ka yindlu ya ka Juda ni mibuzo yo saseka; hikwalaho ranzani a zinene ni kurula.

²⁰Jehova wa tiyimpi i ngalo: Ka ha tata laha a vanhu ni vaaki va miti yinyingi.

²¹A vaaki va muti munwe va taya ka wunwani va yaku: A hi yeni hi ya khongeta Jehova, hi hlota Jehova wa tiyimpi. Minawu nzi taya!

²²Ina, a matiko yo tala ni mifumo ya ntamu yi tata ku ta hlota Jehova wa tiyimpi lomu Jerusalema, ni ku khongela Jehova.

²³Jehova wa tiyimpi i ngalo: Masikwini lawo khume ga Vavanuna va tirimi ti tsalangeneko ta matiko, va ta khomelela nzhungweni wa nguwo wa muJuda, vaku: Hi ta famba na nwina, hakuva hi zwile lezaku Nungungulu i na nwina.