Read tshwa Malaki 2 Bible Online

Malaki 2 - tshwa bible

Malaki 2

¹Makunu a xileletelo lexi xa nwina vapristi.

²Loku mu nga xi ingisi, ni loku mu nga xi veki timbilwini ta nwina, lezaku mu dzunza vito ga mina, ku wula Jehova wa tiyimpi, zoriake nzi ta rumela a nzhukano hehla ka nwina, nzi rukatela a makatekwa ya nwina. Ina, nzi sina nzi ma rukatele, hakuva a mu xi khataleli. [4]

³Nzi ta goha a woko ga nwina, nzi xwanya koho tinghoheni ta nwina, wu nga koho wa miphahlo ya nwina, mu hoxiwa handle nawo.

⁴Zonake mu ta zi tiva lezaku hi mina nzi mu rumeleko a xileletelo lexi, kasi a xivumelwano xa mina na Levi xi fela ku tiya, ku wula Jehova wa tiyimpi. [5]

⁵A xivumelwano xa mina na yena xi wa hi xa kuhanya ni kurula; nzi mu nyikile xona kasi a fela ku nzi chava; i nzi chavile, a rurumela hi kota ya vito ga mina.

⁶A nayo wa zinene wu wa hi nonwini wakwe, a kubiha ku wa nga hi kona milonwini yakwe. I wa famba zinwe na mina hi kurula ni kululama, a hunzulukisa votala kugoheni.

⁷Hakuva a milomu ya mupristi yi fanele ku hlayisa a wutivi, a nayo wu ta labyiwa nonwini wakwe, hakuva hi yena ntsumi wa Jehova wa tiyimpi: [6]

⁸Kanilezi nwina mu hambukile; hi kugonzisa ka nwina mu khunguvanyisile vanyingi; mu wonhile a xivumelwano xa Levi, ku wula Jehova wa tiyimpi.

⁹Hikwalaho nzi mu mahile mu soleka ni kuva vo biha mahlweni ka vanhu vontlhe, hakuva a mu hlayisi a tindlela ta mina, kanilezi mu cuwuka a nghohe ya munhu loku mu tlhamusela a nayo. [7]

¹⁰A hi vana va dadani munwe ke? A hi Nungungulu munwe a hi vangileko ke? Hikuyini munwe ni munwani wa hina a khohlisako nakulobye, hi tshova a xivumelwano xa vadadani va hina? [8]

¹¹Juda a nga tsumbekangi, ku mahiwa manyalataniso lomu tikweni ga ka Israeli ni le Jerusalema. Hakuva Juda i hanahanisile a wutshamu gi basileko ga Jehova, legi a gi ranzako, a tlhela a teka vanhanyana va nungungulu mumbe.

¹²A munhu loyi a mahako lezo, Jehova i ta fuvisa vontlhe lava va ka kabye, a mu humesa tendeni ga Jakobe, zinwe ni loyi a nehako munyikelo ka Jehova wa tiyimpi.

¹³A xinwani lezi mu zi mahako hi lezi; Mu tata a alati ga Jehova hi mihloti, ni kurila ni kutsikwila, laha kaku a nga ha khatali hi minyikelo ya nwina, hambu ku amukela hi litsako lezi zi humako mandleni ya nwina.

¹⁴Makunu muku; Hikuyini? Nziku: Hakuva Jehova i kustumunyu xikari ka wena ni sati ga wuswa ga wena loyi u nga tsumbekangiko kakwe, kasilezo munghana wa wena, a sati wa xivumelwano xa wena. [9]

¹⁵A hi na muvangi munwe loyi a ranzako ku hlayisa a moya wa hina ke? Ni loyi wa munwe i xuva yini? I wa lava a lixaka ti basileko, hikwalaho ti woneleni mimoyeni ya nwina, ngha a nga hi kona ni munwe a to kala a nga tsumbeki ka sati wa wuswa gakwe.

¹⁶Hakuva nza venga a kuhlongola, ku wula Jehova, a Nungungulu wa Israeli, ni loyi a hlayisako a sati wakwe hi tihanyi, ku wula Jehova wa tiyimpi. Hikwalaho ti woneleni mimoyeni ya nwina, lezaku mu nga mahi za kukhohlisa. [10]

¹⁷Mu rerile Jehova hi kuwulawula ka nwina. Kasike mu ngalo: Hi mu rerile hi yini? Hi lezi mu nge: Munwe ni munwani loyi a mahako kubiha i lulamile kuwoneni ka Jehova, niku, wa xalaliswa hi vakunghahi. Ni loku muku: I kwihi a Nungungulu wa nongameto?