Read tshwa Malaki 3 Bible Online

Malaki 3 - tshwa bible

Malaki 3

¹Langutani, nza rumela a ntsumi wa mina, lowu wu ta nga nzi longisela a ndlela. Zonake a Hosi leyi mu yi hlotako yi tata hi xitshuketi tempeleni ya yona. Langutani, wata a ntsumi wa xivumelwano lowu mu wu langutelako, ku wula Jehova wa tiyimpi. [11]

²Kanilezi himani a nga tiyelako a siku ga kuta kakwe? Himani a ta nga yima a kutani kakwe? Hakuva yena i ta kotisa a nzilo wa munyekisi, ni ku kotisa a sabawu ya vahlazi.

³I ta tshama a nyekisa ni ku basisa a siliva; i ta basisa a vana va ka Levi, a va hluta khwatsi i nzalama ni siliva, zonake va ta humesa minyikelo ka Jehova hi nongameto.

⁴Zonake Jehova i ta xalaliswa hi minyikelo ya Juda na Jerusalema khwatsi hi masikwini ya kale, malembeni ya kaleloko.

⁵Nzi ta tshinela ka nwina a ku ta lamula. Nzi tava kustumunyu yi hatlisako ku vukela zitumbe, ni zibhayi, ni lava va hlambanyako hi mawunwa, ni lava va kanganyisako a xitiri hakhelweni ya xona, ni lava va tsimbeketako tinoni ni zisiwana, ni lava va gohako a mhaka ya muluveli, ni lava va nga nzi chaviko, ku wula Jehova wa tiyimpi. [12]

⁶Hakuva mina Jehova a nzi hunzuki, hi lexi xi nga maha nwina vana va Jakobe mu nga lovi, [13]

⁷Kusukela masikwini ya vararu va nwina mu hambukile milayweni ya mina, a mu yi hlayisangi. Tlhelelani ka mina, na mina nzi ta tlhelela ka nwina, ku wula Jehova wa tiyimpi. Kanilezi nwina mu ngalo: Hi ta tlhelela yini?

⁸A munhu a nga zi kota ku yivela Nungungulu ke? kasike nwina ma nzi yivela. Kanilezi mu ngalo: Xini hi ku yiveleko? Hi zawukhume ni minyikelo. [14]

⁹Mu rukilwe hi nzhukano, hakuva mu nzi yivela, nwina nwentlhe va tiko legi.

¹⁰Nehani zontlhe za wukhume a ndlwini ya kuveketela, kasi ku fela kuva ni zakuga ndlwini ya mina, mu nzi ringa ha zona, ku wula Jehova wa tiyimpi, kasi ku wona loku nzi ta kala nzi nga mu vululeli a tinjhanela ta tilo nzi mu chululela a makatekwa yo tlhela mu vumala ni wutshamu go chela kona.

¹¹Nzi ta mu hawukela a humbi, kasi yi nga mu dayeli a mihanzu ya misava ya nwina; ni mivina ya nwina yi nga ta tlhatlheka hi mahlweni ka xikhati lomu masinwini, ku wula Jehova wa tiyimpi.

¹²A matiko wontlhe ma ta mu wula ku mu katekile, hakuva mu tava tiko gi tsakisako, ku wula Jehova wa tiyimpi.

¹³A magezu ya nwina ma wa nzi vukela hi ntamu, ku wula Jehova. Kanilezi mu ngalo: Zini hi zi wulileko zo vukela wena?

¹⁴Mu te ngalo: A zi vuni nchumu ku tirela Nungungulu! Hi kanyarile yini hi ku hlayisa zileletelo za yena, ni lezi hi nga famba na hi ambele tinguwo ta xirilo mahlweni ka Jehova wa tiyimpi?

¹⁵Makunu hi ngalo a vamatshanza va katekile. Ina, va vuvuma lava va mahako kubiha; va phika Nungungulu, va huluka.

¹⁶Zonake lava va chavako Jehova va wulawula munwe ka munwani, na Jehova i dembile ndleve a ingisela, ku tsaliwa a bhuku ka xialakanyiso mahlweni kakwe, ku tsaliwa lava va chavako Jehova ni lava va alakanyako vito gakwe.

¹⁷Jehova wa tiyimpi i ngalo: Va tava vanhu va mina a sikwini legi nzi ta nga tira a ntiro wa mina, vava tshomba ya mina; nzi ta va tsetselela kukotisa a munhu loyi a tsetselelako a nʼwana loyi a mu tirelako. [15]

¹⁸Zonake mu ta tlhela mu wona a kuhambana ku nga kona ka loyi a lulamileko ni wakubiha, xikari ka loyi a tirelako Nungungulu ni loyi a nga mu tireliko.