Read tshwa Mateu 1 Bible Online

Mateu 1 - tshwa bible

Mateu 1

¹A bhuku ga lixaka la Jesu Kristu, a nʼwana Davida, wa Abrahama. [1]

²Abrahama i lo beleka Isaka, Isaka a beleka Jakobe, Jakobe a beleka Juda ni vanakulobye, [2]

³Juda na Tamare va beleka Perezi na Zera; Perezi a beleka Hezroni, Hezroni a beleka Aramu, [3]

⁴Aramu a beleka Aminadaba, Aminadaba a beleka Nasoni, Nasoni a beleka Salimoni,

⁵Salimoni na Rahabi va beleka Boazi, Boazi na Rute va beleka Obedi, Obedi a beleka Jesse,

⁶Jesse a beleka hosi Davida. Davida ni loyi a nga hi kata Uria va lo beleka Solomoni. [4]

⁷Solomoni a beleka Rehoboamu, Rehoboamu a beleka Abija, Abija a beleka Asa, [5]

⁸Asa a beleka Jehoxafati, Jehoxafati a beleka Joramu, Joramu a beleka Uzzia,

⁹Uzzia a beleka Jotamu, Jotamu a beleka Ahazi, Ahazi a beleka Hezekia,

¹⁰Hezekia a beleka Manase, Manase a beleka Amoni, Amoni a beleka Josia, [6]

¹¹Josia a beleka Jekonia ni vanakulobye, hi xikhati lexi va nga khonwa va yiswa Babuloni. [7]

¹²Anzhako na va yisilwe Babuloni, Jekonia i lo beleka Salatieli, Salatieli a beleka Zerubabeli, [8]

¹³Zerubabeli a beleka Abiudi, Abiudi a beleka Eliakimu, Eliakimu a beleka Azori,

¹⁴Azori a beleka Sadoki, Sadoki a beleka Akimu, Akimu a beleka Eliudi,

¹⁵Eliudi a beleka Eleazari, Eleazari a beleka Matani, Matani a beleka Jakobe,

¹⁶Jakobe a beleka Josefa a nuna wa Maria, loyi a nga beleka Jesu loyi va nge hi Kristu.

¹⁷Hi zalezo zizukulwana zontlhe zi sukelako ka Abrahama kala ka Davida, i 14 wa zona; kusukela ka Davida kala xikhati xa kukhonwa va yiswa Babuloni, i 14 wa zona; kusukela xikhati xa kukhonwa va yiswa Babuloni kala ka Kristu, i 14 wa zona.

¹⁸Makunu a kubelekiwa ka Jesu Kristu ku mahisile lezi: Laha a nyine wakwe Maria a nga wa wutilwe hi Josefa, hi mahlweni na va nga se ku tlhangana i lo xura nyimba hi Moya wa ku Basa. [9]

¹⁹Kanilezi Josefa, a nuna wakwe, kota lezi a nga hi munhu a lulamileko, i wa nga ranzi a ku mu wisa tingana, i lo alakanya ku mu tsika xihundleni. [10]

²⁰Na a ha alakanya lezo, a ngelosi ya Jehova yi lo woneka kakwe hi noro, yiku; Josefa, nʼwana Davida, u nga chavi a ku teka Maria, a sati wa wena; hakuva a nyimba leyi a nga nayo nja ka Moya wa ku Basa. [11]

²¹I ta beleka nisanyana, u ta mu chula vito gakwe aku hi Jesu (hi lezaku Muhanyisi); hakuva hi yena loyi a ta nga hanyisa a vanhu vakwe zionhweni zabye. [12]

²²Makunu zontlhe lezi zi mahekile aku kasi ku fela ku tatiseka lezi a Hosi yi nga wula hi muprofeti, ku ngalo:

²³Langutani, a nhwana i ta xura nyimba, i ta beleka nisanyana, Va ta mu chula vito gakwe aku hi Immanueli; lezo hi ku tlhamusela zi wula ku ngalo: Nungungulu i na hina. [13]

²⁴Laha Josefa na vukile kuetleleni kakwe, i lo maha kota lezi a ngelosi ya Hosi yi nga mu laya; i lo teka sati wakwe, a mu yisa kaya kakwe.

²⁵Kanilezi a nga mu tivangi kala a beleka a nwanana; i lo mu chula a vito gakwe aku hi Jesu. [14]