Read tshwa Mateu 10 Bible Online

Mateu 10 - tshwa bible

Mateu 10

¹I lo vitana a vapizani vakwe va khume ni vambiri, a va nyika ntamu wa ku hlula a mimoya ya kubiha ni ku yi humesa; ni ku chuma tontlhe tixaka ta tinghumbe ni tixaka tontlhe ta mababyi. [149]

²A mavito ya vapostoli va khume ni vambiri hi lawa: A wo ranga hi Simoni, a vitwako Pedro, na Andreu nakulobye; na Jakobe a nʼwana Zabedi, na Johani nakulobye; [150]

³Filipu, na Bartolomeu; Tomasi, na Mateu muhlengisi; Jakobe a nʼwana Alfeu, na Tadeu;

⁴na Simoni muKanani, na Judasi Iskarioti, loyi a nga tokometa Jesu. [151]

⁵Jesu i lo ruma lava va khume ni vambiri, a va laya, aku: Mu ngayi ka vamatiko, hambu ku enghena ka muti wa vaSamaria. [152]

⁶Kanilezi yanani ka tiyivu ti lahlekileko ta yindlu ya ka Israeli. [153]

⁷Kufambeni ka nwina kanelani muku: A mufumo wa tilo wu tshinele. [154]

⁸Hanyisani lava va babyako, mu vuxa a vafileko, mu basisa tihlokonho, mu humesa madimoni. Mu amukele hi matsenya, nyikani hi matsenya.

⁹Mu nga weleli mali ya nzalama ni siliva ni suku lomu mabhandeni ya nwina. [155]

¹⁰Mu nga teki kwama pfhumbeni ga nwina, hambu mabhaji mambiri, hambu zilato ni nhonga; hakuva a xitiri xi fanelwe hi kuga ka xona. [156]

¹¹Kani hi wihi muti ni mutana mu to enghena ka wona, mu ta wutisa lezaku himani a faneleko ku mu amukela; tshamani ka yena mu kala mu suka.

¹²Laha na mu enghenile ndlwini mu ta yi losetela.

¹³Loku a yindlu yi fanele, a kurula ka nwina a ku tshame ka yona; kanilezi loku yi nga faneli, ngha kurula ka nwina ku tlhelela ka nwina.

¹⁴Kani hi wihi a ta nga kala ku mu amukela, hambu ku ingisa a timhaka ta nwina, a xikhati mu humako ka yindlu leyo kutani muti lowo, phumunhani a ntshuri wa mikonzo ya nwina. [157]

¹⁵Hizinene nziku ka nwina: Hi siku ga kulamula a kutsayiswa ka muti lowo ku ta hunza ka Sodoma ni Gomora.

¹⁶Langutani, nza mu ruma na mu fanana ni tiyivu xikari ka timhisi; hikwalaho, tlharihani kota tinyoka, mu ku khwatsi mu matuva, mu ngavi na wumbyori. [158]

¹⁷Ti woneleni hi vanhu, hakuva va ta mu nyikela tihubyeni, va mu xupula masinagogeni yabye. [159]

¹⁸Ina, mu ta yisiwa mahlweni ka vafumeli ni tihosi hi kota ya mina, a kuva mu kustumunya ha mina ka vona ni ka vamatiko.

¹⁹Kanilezi loku va mu nyikela kabye, mu nga kanakani muku mu ta wulawulisa kuyini niku zini mu ta nga wulawula, hakuva zi ta nyikiwa ka nwina hi xikhati lexi mu ta nga wulawula. [160]

²⁰Hakuva a hi nwina mu ta nga wulawula, kanilezi hi Moya wa Raru wa nwina wu to wulawula hi nwina. [161]

²¹A munhu i ta nyikela nakulobye kufeni, ni raru i ta nyikela nʼwana wakwe; a vanana va ta vukela vabeleki vabye, va va dayisa.

²²Mu ta vengiwa hi vanhu vontlhe hi kota ya vito ga mina; kanilezi loyi a timiselako kala magumo, hi yena a ta nga hanyiswa. [162]

²³Kanilezi loku va mu xanisa mutini wo kari, chavelani ka munwani; hakuva hizinene nziku ka nwina: Mu nga ta kala mu mbheta a miti ya vaIsraeli, na Nʼwana wa munhu a nga se ku chikela. [163]

²⁴Mupizani a nga hunzi mugonzisi wakwe, ni nanza a gi hunzi a hosi ya gona.

²⁵Zi ringene a mupizani loku a kota mugonzisi wakwe, ni nanza loku gi kotisa hosi ya gona. Loku va vitanile a nwinyi wa yindlu vaku hi Belzebuba, a va ngango wakwe va ta hunzeleta ku vitaniswa lezo. [164]

²⁶Kanilezi mu nga va chavi; hakuva a ku na xilo xi fenengetilweko, xi ta nga kala ku funungulwa, ni xi fihlilweko xi ta nga kala ku tibyiwa. [165]

²⁷Lezi nzi mu byelako munyameni, zi wulawuleni kuwonekeleni; ni lezi zi hlebyiwako tindleveni ta nwina, banani hungu ha zona le hehla ka tiyindlu.

²⁸Mu nga chavi lava va dayako miri, na va nga hi na ntamu a ku daya muhefemulo; kanilezi chavani loyi a nga ni ntamu a ku lovisa a muhefemulo ni miri le Gehena. [166]

²⁹A vamanjingiri vambiri a va xaviswi hi capawu ke? Kasi lezo a nga kona ni munwe wa vona a wako hasi loku a nga zi ranzi a Dadani wa nwina.

³⁰Kanilezi nwina, hambu ni misisi ya tihloko ta nwina yi hlayilwe. [167]

³¹Hikwalaho mu nga chavi, ma va hunza nguvu a vamanjingiri vanyingi.

³²Kani hi mani loyi a ta nga nzi vumela mahlweni ka vanhu, minawu nzi ta mu vumela mahlweni ka Dadani wa mina loyi a nga le tilweni. [168]

³³Kanilezi loyi a ta nga nzi ala mahlweni ka vanhu, minawu nzi ta mu ala mahlweni ka Dadani wa mina loyi a nga le tilweni.

³⁴Mu nga alakanyi muku nzi tile a ku neha kurula misaveni; a nzi telangi ku neha kurula, kanilezi a supado. [169]

³⁵Hakuva nzi tele ku ta hambanyisa a munhu ni raru wakwe, a nhanyana ni mamani wakwe, a katamwane ni nwingi wakwe; [170]

³⁶ni va le ngangweni wa munhu va ta maha valala vakwe. [171]

³⁷Loyi a ranzako raru kutani nyine a ku hunza mina a nga nzi faneli; ni loyi a ranzako mufana wakwe kutani nhanyana wakwe a ku hunza mina a nga nzi faneli.

³⁸Loyi a nga rwaliko a xihambano xakwe a nzi lanzela, a nga nzi faneli. [172]

³⁹Loyi a hlayisako a kuhanya kakwe i ta lahlekelwa ha kona; kanilezi loyi a lahlekelweko hi kuhanya kakwe hi kota ya mina i ta ku kuma. [173]

⁴⁰Loyi a mu amukelako, wa nzi amukela mina, ni loyi a nzi amukelako wa amukela loyi a nzi rumileko. [174]

⁴¹Loyi a amukelako muprofeti hi ku mu tiva lezaku muprofeti, i ta amukela a nchachazelo wa muprofeti; ni loyi a amukelako munhu wo lulama hi ku mu tiva lezaku i munhu wo lulama, i ta amukela a nchachazelo wa munhu wo lulama.

⁴²Kani hi mani a nyikako ka munwe wa lava va tsongwani a khokho ga mati yo titimela ntsena, hi ku tiva lezaku mupizani, hizinene nziku ka nwina, a nga ta lahlekelwa hi nchachazelo wakwe. [175]