Read tshwa Mateu 13 Bible Online

Mateu 13 - tshwa bible

Mateu 13

¹Hi lego siku Jesu i lo huma ndlwini, a ya tshama hi le bimbini.

²Ku lo tsombana kakwe a zidlemo za hombe, kala a enghena ngalaveni, a tshama ka yona; ni zontlhe zidlemo zi lo yima fungwini. [218]

³I lo kanela kabye a timhaka to tala hi mifananiso, aku: Ku lo huma muxwanyi a ku ya xwanya. [219]

⁴Na a kari a xwanya a tinwani timbewu ti lo wela ndleleni; ku lo chikela tinyanyani ti ta jowotela.

⁵Timbewu tinwani ti wela wutshanwini ga maribye, laha ku nga hi hava misava yo tala; ti lo mila hi xihatla, hilezi ti wa nga hi na misava yi etileko.

⁶Laha na gi tsuwukile gambo, ti lo tlahuka, ti wuna, hakuva ti wa nga hi na mitsu.

⁷Tinwani ti lo wela xikari ka mizwa: a mizwa yi kula, yi ti tlimba.

⁸Kanilezi tinwani ti lo wela misaveni yo saseka, ti pswala mihanzu; a tinwani ti lo pswala hi 100, tinwani hi 60, tinwani hi 30.

⁹Loyi a nga ni tindleve, ngha a ingisa.

¹⁰A vapizani va lo tshinela, vaku kakwe: Hi yini u wulawulako kabye hi mifananiso ke?

¹¹I lo hlamula aku ngalo kabye: Hakuva nwina mu nyikilwe ku tiva mifihlakalo ya mufumo wa tilo, kanilezi vena a va nyikiwangi. [220]

¹²Hakuva loyi a nga nazo, i ta nyikiwa, ava ni za kutala; kanilezi loyi a nga hiko nazo, i ta tekelwa ni lezi a nga nazo. [221]

¹³Hikwalaho nza kanela ka vona hi mifananiso, hakuva hambu va wona, a va wonisisi, hambu vazwa a va zwisisi, ge ni ku pima.

¹⁴Ku tatiseka ka vona a xiprofeto xa Isaya, xi nge ngalo: Hi kuzwa mu tazwa, kanilezi mu nga ta pima; Hi kuwona mu ta wona, kanilezi mu nga ta zi tiva. [222]

¹⁵Hakuva a timbilu ta lava vanhu ti nonohile, A tindleve tabye a ti hatlisi ku ingisa, Ni mahlo yabye ma tsimbile; Ku nga taku va wona hi mahlo yabye, Vazwa hi tindleve tabye, Va pima hi timbilu tabye, Va hunzuluka, nzi va hanyisa. [223]

¹⁶Kanilezi ma katekile a mahlo ya nwina, hakuva ma wona; ni tindleve ta nwina, hakuva tazwa.

¹⁷Hizinene nziku ka nwina: A vaprofeti vanyingi ni vanhu va lulamileko va wa xuva ku wona a zilo mu zi wonako, a va zi wonangi; ni kuzwa lezi mu zi zwako, a va zi zwangi.

¹⁸Hikwalaho ingisani a timhaka ta mufananiso wa muxwanyi. [224]

¹⁹Laha munhu a zwako a mhaka ya mufumo a nga yi pimi, kuta kakwe loyi wa kubiha, a ta wutla lexi xi xwanyilweko lomo mbilwini yakwe. Loyi hi yena a xwanyilweko ndleleni.

²⁰Loyi a nga xwanyiwa maribyeni, hi yena loyi a zwako mhaka, a hatla a yi amukela hi kutsaka;

²¹kasi yena wutsumbu a nga na mitsu, e tiya xikhatanyana ntsena; kanilezi loku ku chikela a kukarateka kutani kuxaniseka hi kota ya mhaka, a khunguvanyeka zalezo.

²²Loyi a nga xwanyiwa xikari ka mizwa, hi yena loyi a zwako mhaka, kanilezi a kukaratekela a zilo za tiko, ni kukhohlisa ka xuma, ku tlimba a mhaka, lezaku yi nga pswali mihanzu. [225]

²³Kanilezi loyi a nga xwanyiwa misaveni yo saseka, hi yena loyi a zwako mhaka, a yi pima; yena wa pswala mihanzu, a munwani i pswala hi 100, a munwani hi 60, ni munwani hi 30.

²⁴I lo kanela munwani mufananiso kabye, aku: A mufumo wa tilo wu fanana ni munhu loyi a nga xwanya a timbewu ti nene sinwini gakwe.

²⁵Kanilezi na va etlele vanhu, ku lota nala wakwe a ta xwanyawu a nyasavari xikari ka mavele, a ti fambela.

²⁶Kanilezi laha a timbewu na ti milile, ti pswala, zonake ku lo woneka ni nyasavari kambe.

²⁷A malanza ya nwinyi ma lota ma taku: Hosi, a ku xwanyangi timbewu ti nene sinwini ga wena ke? Makunu ita hi kwihi a nyasavari loyi?

²⁸Aku ngalo kabye: I nala a nga maha lezi. A malanza maku kakwe: A ku zi ranzi hi ya tsuwulela hi mu hlengeletela ke?

²⁹Kanilezi aku kabye: Kokwihi; ku ngaku laha mu hlengeletelako a nyasavari, mu mu tsuwula ni mavele.

³⁰Ngha na mu zi tsika zi kula zinwe ku kala ku chikela kutshovela. Hi xikhati xa kutshovela nzi taku ka vatshoveli: A kuranga wungeletelani a nyasavari, mu mu boha hi tinyanza, mu mu hisa; kanilezi a mavele mu ma hlengeletela magombeni ya mina. [226]

³¹I lo kanela munwani mufananiso kabye, aku: A mufumo wa tilo wu fanana ni mbewu ya xinapi, leyi a nga yi teka munhu, a yi byala sinwini gakwe. [227]

³²Kunene yi tsongwani ku hunza timbewu tontlhe; kanilezi laha na yi kulile yi hunza khubyanyi wontihe, yi maha sinya yaku a zinyanyani za tilo zita zi zumba maravini ya yona.

³³I lo kanela munwani mufananiso kabye, aku: A mufumo wa tilo wu fanana ni comelo, lexi a nga xi teka wasati, a xi chela lomo ka zipimo zinharu za mapa, ma kala ma vita wontihe. [228]

³⁴Tontlhe leti timhaka Jesu i lo ti kanela ka zidlemo hi mifananiso; a nga wulangi nchumu ka vona ahandle ka mufananiso;

³⁵Kasi ku fela ku tatiseka lezi zi nga kanelwe hi muprofeti, aku: Nzi ta vulula nomu wa mina hi mifananiso; Nzi ta humesela a timhaka ti fihlilweko hi kusanguleni ka tiko. [229]

³⁶Zonake i lo siya xidlemo, a enghena ndlwini; a vapizani vakwe va lota kakwe, va taku: Hi tlhamusele a mufananiso wa nyasavari lomu sinwini.

³⁷I lo hlamula aku ngalo: Loyi a xwanyako a mbewu yi nene hi Nʼwana wa munhu;

³⁸a simu hi tiko; a mbewu yi nene hi vana va mufumo; ni nyasavari hi Vana va loyi wa kubiha; [230]

³⁹a nala loyi a nga va xwanya hi Satani; a kutshovela hi kugumesa ka tiko; ni vatshoveli hi tingelosi. [231]

⁴⁰Kota lezi a nyasavari a hlengeletelwako a hiswa hi nzilo, ku tava nghaho kugumeseni ka tiko.

⁴¹A Nʼwana wa munhu i ta ruma a tingelosi takwe, ti ta wungeletela ti humesa mufunweni wakwe zontlhe lezi zi khunguvanyisako, ni lava va mahako kubiha, [232]

⁴²ti ta va hoxa phingweni ga nzilo; laho ku tava kona a mikosi ni kugetsela ka meno. [233]

⁴³Zonake a valulamileko va ta ngangamela kotisa gambo mufunweni wa Raru wabye. Loyi a nga ni tindleve, ngha a ingisa. [234]

⁴⁴A mufumo wa tilo wu fanana ni tshomba yi fihlilweko sinwini, leyi a nga yi kuma munhu, a yi tumbeta; zonake kutsakeni kakwe a famba a ya xavisa zontlhe a nga nazo, a xava simu lego. [235]

⁴⁵Kambe a mufumo wa tilo wu fanana ni mahungani a lavako maperola yo saseka;

⁴⁶na a kumile a perola gi nga ni tsengo wa hombe, a ya xavisa zontlhe a nga nazo, a gi xava.

⁴⁷Kambe a mufumo wa tilo wu fanana ni likoka, lolu li nga petiwa bimbini, li kukuta tixaka tontlhe; [236]

⁴⁸loku li tele, va li kokela fungwini, va tshama hasi va hlengeletela lezi zi nene zibyeni, kanilezi va cukunyeta lezi zo biha.

⁴⁹Ku tava nghaho kugumeseni ka tiko; a tingelosi ti ta huma, ti avanyisa a vakubiha xikari ka valulamileko,

⁵⁰ti va hoxa phingweni ga nzilo; laho ku tava kona a mikosi ni kugetsela ka meno.

⁵¹Mu ti pimile a timhaka tontlhe leti ke? Vaku ka yena: Ina!

⁵²Aku ngalo kabye: Makunu kani hi wihi mutsali loyi a gonzisilweko hi za mufumo wa tilo i fanana ni munhu loyi a nga nwinyi wa yindlu, loyi a humesako mabakweni yakwe a zilo ziswa ni zilo za kale.

⁵³Laha Jesu na mbhetile mifananiso leyi, i lo suka laho.

⁵⁴Na a tile tikweni gabye i lo va gonzisa sinagogeni gabye, laha kakuva va hlamala, vaku: Inaloyi i gi kumile kwihi a wutlhari legi, ni zirewukiso lezi zita hi kwihi? [237]

⁵⁵Xana loyi a hi yena a nʼwana wa muvatli ke? A nyine wakwe a hi yena a tibyiwako Maria; ni vanakulobye a hi Jakobe, na Josefa, na Simoni, na Juda ke?

⁵⁶Ni vamakabye vakwe a va kona vontlhe laha na hina ke? Makunu zita hi kwihi zontlhe lezi a nga nazo ke?

⁵⁷Va lo khunguvanyeka ha yena. Kanilezi Jesu aku ngalo kabye: A muprofeti a nga vumali wudzunzo ahandle ka lomu tikweni gabye, ni ie ndlwini yabye. [238]

⁵⁸A nga mahangi zirewukiso zinyingi laho, hi kota ya kungakholwi kabye.