Read tshwa Mateu 14 Bible Online

Mateu 14 - tshwa bible

Mateu 14

¹Hi lexo xikhati Herodi loyi a nga hi mwamangulu i lozwa wudumo ga Jesu, [239]

²aku ngalo ka malanza yakwe: Loyi hi Johani Mubapatizi; i vukile hi ka vafileko; hikwalaho a mintamu leyi yi hlamalisako yi tira ha yena:

³Hakuva Herodi i wa khomile Johani, a mu boha, a mu valela paxweni hi kota ya Herodia, a sati wa nakulobye Filipu. [240]

⁴Hakuva Johani i wa te ngalo kakwe: A ku fanelangi a ku mu teka.

⁵Laha a nga ngha a lava ku mu daya, i lo chava vanhu, hakuva va waku muprofeti.

⁶Kanilezi hi siku ga kupswalwa ka Herodi, a nhanyana wa Herodia i lo kina mahlweni ka vanhu, a tsakisa Herodi,

⁷laha kakuva a mu tsumbisa hi kuhlambanya a ku mu nyika ni xihi lexi a ta nga xi kombela.

⁸A nhanyana na a kucetelwe hi nyine wakwe, aku: Nzi nyike lomu ngelweni lowu a hloko ya Johani Mubapatizi.

⁹A hosi yi lo xaniseka, kanilezi hi kota ya kuhlambanya kakwe ni ya lava a nga hi navo mezeni, i lo laya a kuva a nyikiwa yona.

¹⁰I lo rumela mhaka paxweni, lezaku ku tsemiwa a hloko ya Johani.

¹¹A hloko yakwe yi lo nehiwa hi ngelo, yi nyikiwa ka nhwana; yena i lo yi yisa ka nyine wakwe.

¹²A vapizani vakwe va lo ta teka xirumbi xakwe, va xi lahla; va lo famba va ya bikela Jesu.

¹³Laha Jesu na zi zwile, i lo suka laho hi ngalava, aya wutshanwini ga xiwula na hi yece. Kanilezi laha zidlemo na zi zwile, zi lo mu lanzela hi milenge zita hi le mitini.

¹⁴Loku a huma ngalaveni a wona a xidlemo xa hombe, i lo xi zwela wusiwana, a hanyisa vababyako vabye. [241]

¹⁵Laha gambyeni a vapizani va lota kakwe, va taku: A wutshamu legi xiwula, ni gambo gi pelile; tlhelisa zidlemo, kasi zi fela kuya mitini, zi ya ti xavela zakuga. [242]

¹⁶Kanilezi Jesu aku ngalo kabye: A zi laveki a kuva va famba, va heni zakuga nwina.

¹⁷Va te ngalo kakwe: A hi na nchumu laha, saseka ntlhanu wa zibaba ni zidluwani zimbiri.

¹⁸Aku ngalo; Zi neheni laha ka mina.

¹⁹Loku a byelile zidlemo a ku tshama lahasi byanyini, i lo teka a ntlhanu wa zibaba ni zidluwani zimbiri, a cuwuka tilweni a zi katekisa, a khema zibaba a zi nyika ka vapizani, a vapizani va avela zidlemo.

²⁰Vontlhe va loga va xura. Zonake ku lo rolelwa a matlhatlha ma seleko, ku tala khume ga zirunzu ni zimbiri.

²¹Lava va ngaga i 5,000 wa vavanuna, ku nga hlayiwi a vavasati ni vanana.

²²Zalezo Jesu i lo kurumeta a vapizani ku enghena ngalaveni, va ranga va tlhatuka, yena a sala a kala a tlhelisa zidlemo.

²³Laha na a tlhelisile zidlemo, i loya xitsungeni na hi yece ku ya khongela. Gi lohlwa na hi kwalaho yece. [243]

²⁴Kanilezi a ngalava yi wa hi xikari ka bimbi, na yi ndlengandlengiswa hi mabyandlati; hakuva a mheho yi wa hambene navo.

²⁵Hi xirinzo xa wumune xa wusiku Jesu i lota kabye, na a famba hehla ka mati.

²⁶Laha vapizani va nga mu wona na a famba hehla ka mati, va lo dzuka, vaku: Xigono; vaba huwa hi kuchava. [244]

²⁷Kanilezi Jesu a hatla a va byela, aku: Tiyani-hlana, hi mina; mu nga chavi.

²⁸Pedro i le mu hlamula, aku: Hosi, loku u ngha u hi wena, nzi vitane nzita ka wena hehla ka mati.

²⁹Aku ngalo: Tana. Pedro i lo chika hi lomo ngalaveni, a famba hehla ka mati, aya ka Jesu.

³⁰Kanilezi pa a wona mheho yi tshinga, i lo chava; zonake loku a sangula ku wela i loba huwa, aku: Hosi, nzi ponise.

³¹Zalezo Jesu i lo nawuluta a canja gakwe, a mu khoma, aku: Wena wa, kukholwa ku tsongwani, hi yini u kanakanako ke?

³²Laha na va enghenile ngalaveni a mheho yi lo gawuka.

³³Ni lava va nga hi lomu ngalaveni va lo mu khizamela, vaku: Hizinene u Nʼwana wa Nungungulu. [245]

³⁴Laha na va tlhatukile, va lo chikela le Genesareta. [246]

³⁵Ni laha vanhu va kona na va mu tivile, va lo rumisa tikweni lego gontlhe, lezaku va neha kakwe vontlhe lava va nga kari va babya.

³⁶Va lo mu khongotela lezaku va fela ku khumba machakafula ya nguwo yakwe, ni vontlhe lava va nga ma khumba va lo hanyiswa.