Read tshwa Mateu 16 Bible Online

Mateu 16 - tshwa bible

Mateu 16

¹Ku lota vaFarisi ni vaSadusi, va ta mu ringa va kombela lezaku a va kombise a xiwoniso xa le tilweni. [265]

²Kanilezi i lo hlamula aku kabye: Laha na gi pelile mu ngalo: Yi taca, hakuva tilo gi pswhukile.

³Ni laha mixweni muku; Ku ta dzinza nyamutlha; hakuva a tilo gi pswhukile gi phuma. Ma zi tiva ku tsotsela a tshamela ga tilo, kanilezi ma tsanzeka ku tsotsela zikombiso za zikhati.

⁴A xizukulwana lexi xa kubiha xi nga kholekangiko xi lava a xiwoniso; kanilezi xi nga ta nyikiwa xiwoniso, sine xiwoniso xa Jona. Yena i lo va siya a famba. [266]

⁵Laha vapizani na va chikele tlhatukweni va lo khumbula lezaku va wa rivele ku teka zibaba. [267]

⁶Jesu aku ngalo kabye: Ti woneleni, mu tlharihela a comelo ga vaFarisi ni vaSadusi. [268]

⁷Va lo wulawulisana, vaku; A hi tekangi zibaba.

⁸Jesu na a zi tivile, aku ngalo: Nwina va kukholwa ku tsongwani, hi yini mu wulawulisanako xikari ka nwina, hilezi mu nga hava zibaba?

⁹A ma ha pimi ke, hambu ni ku alakanya a ntlhanu wa zibaba za 5,000 wa vavanuna, zirunzu zingani mu nga zi rolela ke? [269]

¹⁰Kutani a ntlhanu wa zibaba ni zimbiri za 4,000 wa vavanuna, zirunzu zingani mu nga zi rolela ke?

¹¹Hikuyini mu nga pimiko lezaku a nzi wulangi ka nwina hi zibaba? Kanilezi tlharihani a comelo ga vaFarisi ni vaSadusi.

¹²Zonake va lo pima lezaku i wa nga va byeli ku tlharihela a comelo ga zibaba, kanilezi a gonzo ya vaFarisi ni vaSadusi.

¹³Laha Jesu na chikele tlhelweni ga le Kesaria wa Filipi, i lo wutisa Vapizani vakwe, aku: A vanhu ve ngalo, hi yena mani a Nʼwana wa munhu? [270]

¹⁴Vaku ngalo; A vanwani ve ngalo hi Johani Mubapatizi; a vanwani vaku hi Elija; ni vanwani vaku hi Jeremia, kutani munwe wa vaprofeti. [271]

¹⁵Aku kabye: Nwinake mu ngalo hi mina mani?

¹⁶Simoni Pedro i lo hlamula aku ngalo: Wena u Kristu, Nʼwana wa Nungungulu a hanyako. [272]

¹⁷Jesu i lo hlamula aku ngalo ka yena: U katekile wena Simoni nʼwana Jona; hakuva a hi nyama ni nkhata zi nga ku vululela lezi, kanilezi hi Dadani wa mina wa le tilweni. [273]

¹⁸Na mina nziku ka wena: Wena u Pedro, a hehla ka ribye legi nzi ta aka handla ga mina; a tinyangwa ta Hayidesi ti nga ta gi hluta. [274]

¹⁹Nzi ta ku nyika a tipfhungulo ta mufumo wa tilo; kani hi xihi u ta nga xi boha laha misaveni, Xi ta bohiwa ni le tilweni; ni kani hi xihi u ta nga xi tlhatlha laha misaveni, xi ta tlhatlhiwa ni le tilweni. [275]

²⁰Zonake i lo laya vapizani lezaku va nga byeli munhu aku yena hi Kristu.

²¹Hi xikhati lexo Jesu i lo sangula ku tivisa a vapizani vakwe lezaku i fanele kuya Jerusalema, a ku ya xaniseka nguvu hi masingalakati, ni vapristi va hombe, ni vatsali, a dayiwa, a tlhela a vuka hi siku ga wunharu. [276]

²²Pedro i lo mu teka tlhelweni, a mu kawuka, aku: Hosi, u nga alakanyi a za kunghahi; lezi cima zi nga ta maheka ka wena.

²³Kanilezi yena i lo hunzuluka, aku ngalo ka Pedro: Suka ka mina, Satani; u xikhunguvanyiso ka mina; hakuva a maalakanyo ya wena a hi maalakanyo ya Nungungulu, kanilezi maalakanyo ya vanhu. [277]

²⁴Zonake Jesu i te ngalo ka vapizani vakwe: Loku munhu a ranza ku nzi lanzela, a ti tsike, a rwala xihambano xakwe a nzi lanzela. [278]

²⁵Hakuva kani hi wihi a ranzako ku hlayisa a kuhanya kakwe, i ta lahlekelwa ha kona; kanilezi loyi a lahlekelwako hi kuhanya kakwe hi kota ya mina; i ta ku kuma. [279]

²⁶Hakuva zi ta mu vuna yini munhu loku a bhinzula tiko gontlhe, a lahlekelwa hi muhefemulo wakwe ke?. A munhu i ta humesa yini ku tekisa muhefemulo wakwe ke? [280]

²⁷Hakuva a Nʼwana wa munhu i tata hi kungangamela ka Raru wakwe, zinwe ni tingelosi takwe; hi kwalaho i ta chachazela munwe ni munwani kotisa mitiro yakwe. [281]

²⁸Hizinene nziku ka nwina: Va kona vanwani va yimileko laha, va ta nga kala kuzwa kufa, va kala va wona a Nʼwana wa munhu na ata mufunweni wakwe. [282]