Read tshwa Mateu 19 Bible Online

Mateu 19 - tshwa bible

Mateu 19

¹Laha Jesu na mbhetile leti timhaka, i lo suka Galilea, aya matlhelweni ya Judia tlhatukweni wa Jordani.

²Ni zidlemo za hombe zi lo mu lanzela, i lo zi hanyisa laho.

³A vaFarisi na va lava ku mu ringa, va lota kakwe, va taku; Zi fanele ka wanuna ku hlongola a sati wakwe hi cumbu hi mhaka ke?

⁴I lo hlamula aku ngalo: Xana a mu gonzangi, lezaku loyi a nga va maha kusanguleni i lo va maha a wanuna ni wasati?

⁵Aku ngalo: Hikwalaho a wanuna i ta siya a raru wakwe ni nyine wakwe, a namarela ka sati wakwe; lava vambiri va ta maha nyama yinwe. [308]

⁶Lezo a va ha hi vambiri, va hi nyama yinwe. Hikwalaho lexi Nungungulu a xi tlhanganyisileko, ngha xi nga hambanyiswi hi munhu.

⁷Vaku ka yena: Loku zi hi lezo, hi yini Mosi a nga laya ku nyika a papilo ga kuhambana ni ku mu hlongola ke? [309]

⁸I lo hlamula, aku: Mosi i lo mu vumela ku hlongola a vasati va nwina hi kota ya kunonoha ka timbilu ta nwina; kanilezi hi kusanguleni ku wa nga hi lezo.

⁹Mina nziku ka nwina: Kani hi wihi a ta nga hlongola a sati wakwe ahandle ka kubhaya, a teka munwani, wa bhaya; ni loye a tekako loyi a hlongolweko wa bhaya. [310]

¹⁰A vapizani vaku ka yena: Loku zi hi lezo a mhaka ya wanuna ni sati wakwe, a hi zinene ku teka.

¹¹Kanilezi i te ngalo kabye; A hi vanhu vontlhe va zi kotako ku amukela mhaka leyi, ntsena lava ku nyikilweko kabye.

¹²Hakuva yi kona mithenwa leyi yi nga belekiswa lezo hi le marumbyini ya vanyine; va kona lava va nga theniwa hi vanhu; kambe va kona lava va nga ti maha mithenwa hi kota ya mufumo wa tilo. Loyi a zi kotako ku yi amukela, a yi amukele. [311]

¹³Zonake ku lo nehiwa kakwe a vanana va tsongwani, lezaku a tlhateka mandla hehla kabye, a va khongelela; a vapizani va lo tsimbetela lava va va nehako. [312]

¹⁴Kanilezi Jesu aku ngalo: Tsikani a vanana, mu nga va beleteli a kuta ka mina, hakuva a mufumo wa le tilweni ngwa va kunghahi.

¹⁵Loku a va tlhatekile mandla i lo suka laho.

¹⁶Ku lota munhu kakwe, a taku: Mugonzisi, xini xo saseka nzi ta nga xi maha kasi nza fela kuva ni wutomi ga pinzukelwa ke? [313]

¹⁷Jesu aku kakwe: Hikuyini u wutisako mina hi lexi xi sasekileko ke? Munwe ntsena loyi a nga nene. Kanilezi loku u ranza ku enghena wutomini, gonga milayo.

¹⁸Aku ka yena: Hi yihi ke? Jesu aku ngalo: U nga dayi, U nga bhayi, U nga yivi, U nga mahi wukustumunyu ga mawunwa, [314]

¹⁹chava raru wa wena ni nyine wa wena, niku, Ranza muakelane wa wena kota lezi u ti ranzako wena. [315]

²⁰A jaha legi giku ka yena: Zontlhe lezo nzi zi hlayisile; nza ha kiyelelwa hi yini ke? [316]

²¹Jesu i te ngalo ka yena: Loku ti ranza kuva loyi a mbheleleko, famba u ya xavisa lezi u nge nazo, u nyika zisiwana; kwalaho u tava ni tshomba le tilweni; zonake tana, u nzi lanzela.

²²Kanilezi laha na gi zwile gezu lego, a jaha gi lo suka na gi karatekile, hakuva gi wa hi ni titshomba to tala.

²³Jesu i te ngalo ka vapizani vakwe; Hizinene nziku ka nwina: Za nonoha ka munhu a fumileko ku enghena mufunweni wa le tilweni. [317]

²⁴Kambe nziku ka nwina: Za hehuka ka kameli ku enghena nonwini wa chingani, ku hunza munhu a fumileko ku enghena mufunweni wa Nungungulu.

²⁵A vapizani loku va zizwa, va lo hlamala nguvu, vaku: Zonake himani a ta nga hanyiswa ke?

²⁶Jesu i lo va cuwuka, aku: Ka vanhu a zi koteki, kanilezi zilo zontlhe za koteka ka Nungungulu. [318]

²⁷Zonake Pedro aku ngalo ka yena: Hina hi siyile zontlhe, hi ku lanzela; a nchachazelo wa hina hi wihi ke?

²⁸Jesu i lo va hlamula, aku: Hizinene nziku ka nwina: Hi xikhatini xa ku vuxetwa luswa ka zontlhe, laha a Nʼwana wa munhu a ta nga tshama xitshanwini xakwe xa wuhosi, nwina lava mu nzi lanzeleko mu ta tshama ka 12 wa zitshamu za wuhosi, mu lamula a 12 wa tixaka ta Israeli.

²⁹Zonake ni wihi loyi a siyileko tiyindlu, kutani vanakulobye, kutani vamakabye, kutani raru, kutani nyine, kutani vanana, kutani zipetso hi kota ya vito ga mina, i ta kuma a za kutala ku hunza, i taga a tshomba ya wutomi ga pinzukelwa.

³⁰Kanilezi a vanyingi va lava va kuranga, va tava a vo gumesa, ni lava vo gumesa va tava va kuranga.