Read tshwa Mateu 21 Bible Online

Mateu 21 - tshwa bible

Mateu 21

¹Laha va nga tshinela Jerusalema, na va chikele Betfage le xitsungeni xa maOliva, Jesu i lo ruma vapizani vambiri, [329]

²aku kabye: Fambani zimutaneni xi nga mahlweni ka nwina, mu ta ya kuma a mbongola na yi khungilwe na yi hi ni ximbongolana; ti tlhatlheni muta nato ka mina.

³Loku munhu a wula nchumu ka nwina, mu taku: A Hosi ya ti lava; i ta ti rumela zalezi.

⁴Makunu lezi zi mahekile, kasi ku fela ku tatiseka lezi zi nga kanetwa hi muprofeti, aku:

⁵Byelani a nhanyana wa Zioni, muku: Languta, a Hosi ya wena yata ka wena, Yi rulile, yi khilele mbongoleni, A role ga pswele ga mbongola.

⁶A vapizani va lo famba, va ya maha kota lezi Jesu a nga va layile.

⁷Va lo neha a mbongola ni ximbongolana, va tlhateka a tinguwo tabye hehla ka tona, Jesu a tshama hehla ka tinguwo leto. [330]

⁸A vanyingi Va xidlemo va lo andlala a tinguwo tabye ndleleni; vanwani va gawula maravi ya tisinya, va ma andlala ndleleni. [331]

⁹Ni zidlemo lezi zi nga rangile ni lezi zi nga lanzela, zi lo kanyuluka, ziku: Hozana ka Nʼwana Davida; a ku khesiwe yena loyi a tako vitweni ga Hosi; Hozana ka le hehla-hehla. [332]

¹⁰Laha na a chikele Jerusalema, a muti wontihe wu lo maha nyenganyenga, vaku: Himani loyi ke? [333]

¹¹Ni zidlemo ziku ngalo: Loyi hi Jesu, a muprofeti wa le Nazareta wa Galilea. [334]

¹²Jesu i lo enghena tempeleni ya Nungungulu, a hlongola vontlhe lava va nga kari va xavisa ni ku xava tempeleni; i lo khubhunyeta a timeza ta vaxavisi va mali, ni zitshamu za lava va nga Xavisa zipomba; [335]

¹³aku ngalo ka vona: Ku tsalilwe ku ngalo: A yindlu ya mina yi ta tibyiwa ku ngalo i yindlu ya kukhongela; kanilezi nwina mu yi mahile a bako ga vaphangi. [336]

¹⁴A zikhumu ni zilema zi lota kakwe lomu tempeleni, a zi hanyisa.

¹⁵Kanilezi laha a vapristi va hombe ni vatsali va nga wona a zirewukiso lezi a nga zi maha, ni vanana lava va nga kanyuluka lomu tempeleni, vaku: Hozana ka Nʼwana Davida, va lo zangara,

¹⁶vaku ka yena: Wa zizwa lezi va zi wulako ke? Jesu aku kabye: Ina, cima a mu gonzangi a gezu legi gi nge ngalo: Hi milomu ya zihlangana ni tisana u ti longisele kudzunziwa? [337]

¹⁷Yena i lo va siya, a huma mutini aya Betania, a ya etlela kona.

¹⁸Ni mixo na a ha wuya le mutini i lozwa ndlala. [338]

¹⁹Laha ha a wona a sinya ya nkuwu hi le tlhelweni ga ndlela, i loya ka wona, kanilezi a nga kumangi nchumu ka wona, sine matluka ntsena. Aku ka wona: Kusukela lezi ngha u nga ha pswali mihanzu kala kupinzuka. Zalezo a sinya ya nkuwu yi lo woma.

²⁰Laha vapizani na va zi wonile, va lo hlamala, vaku: A nkuwu wu omisile kuyini hi kuhatlisa ke?

²¹Jesu i lo hlamula, aku ngalo kabye: Hizinene nziku ka nwina: Loku mu hi ni kukholwa, mu nga kanakani, mu nga ta maha ntsena lezi zi mahilweko ka nkuwu, kanilezi hambu muku ka lexi xitsunga: Kunuka, u ya ti hoxa bimbini, zi ta maheka. [339]

²²Ni zilo zontlhe mu ta nga zi kombela hi kukhongela, na mu kholwa, mu ta amukeliswa. [340]

²³Laha na a enghenile tempeleni, a vapristi va hombe ni masingalakati ya vanhu va lota ka yena laha a nga kari a gonzisa, va taku ngalo: I ntamu muni u mahako ha wona lezi zilo ke? Himani a nga ku nyika lowu ntamu ke? [341]

²⁴Jesu i lo hlamula, aku ngalo kabye: Minawu nzi ta mu wutisa mhaka yinwe, loku mu nzi hlamula, minawu nzi ta mu byela a ntamu lowu nzi mahako ha wona lezi zilo.

²⁵A kubapatiza ka Johani, ku wata hi kwihi ke? Ku wata hi le tilweni, kutani hi ka vanhu ke? Va lo wulawulisana xikari kabye, vaku: Loku hi ku ngalo: Hi le tilweni, i taku ngalo ka hina: Hi yini mu nga kala ku kholwa ka yena ke?

²⁶Kanilezi loku hiku: Hi ka vanhu, ha chava vanhu; hakuva vontlhe a vaku, Johani muprofeti. [342]

²⁷Va lo hlamula vaku: A hi zi tivi. Yenawu aku kabye: Minawu nzi nga ta mu byela hi ntamu lowu nzi mahako ha wona lezi zilo.

²⁸Kanilezi mu yini nwina ke hi mhaka leyi? A munhu i wa hi ni vana vambiri; i loya ka nhonzwa, a yaku ngalo: Nwananga, famba u ya tira xivineni nyamutlha.

²⁹I lo hlamula, aku: Nyawowe; kanilezi hi lenzhako i lo hunzuluka, aya kona.

³⁰Zonake i loya ka nzisana, a ya wulisa za lezo. I lo hlamula, aku: Nzi taya, hosi; kanilezi a nga yangi.

³¹Hi wihi wa lava vambiri a nga maha kuranza ka raru wakwe ke? Vaku: Hi loyi wa kuranga. Jesu aku kabye: Hizinene nziku ka nwina: A vahlengisi ni zibhayi va mu rangela ku enghena mufunweni wa Nungungulu.

³²Hakuva Johani i lota, a ta mu tivisa a ndlela ya kululama, a mu mu kholwangi; kanilezi a vahlengisi ni zibhayi va lo mu kholwa; hambu lezi mu nga zi wona, a mu hunzulukangi, kasi mu fela ku kholwa hi yena. [343]

³³Ingisani munwani mufananiso: Ku wa hi kona a nwinyi wa yindlu, a nga byala a xivina, a xi bhiyela lihlavu, a kehla xigowolo xo kamela mihanzu ya kona, ni ku aka tshala; i lo xi nyikela mandleni ya varimi, a enzela ginwani tiko. [344]

³⁴Laha a nguva ya mihanzu yi nga tshinela, i lo ruma malanza yakwe ka varimi, kasi ku ya amukela mihanzu yakwe.

³⁵Kanilezi a varimi va lo khoma a malanza yakwe, vaba ginwe, ginwani va gi daya, ni ginwani va gi gandla hi maribye. [345]

³⁶I lo engeta a rumela a malanza manwani, yo tala ku hunza laʼyo ranga; va lo maha ka wona kota lawa yo ranga.

³⁷A kala a rumela nʼwana wakwe, na aku: Vona va tava ni xichawo ka nʼwana wa mina.

³⁸Kanilezi a varimi, laha na va wonile a nʼwana wakwe, vaku xikari kabye: Hi yena mugi wa tshomba, ngonani, hi mu daya, higa tshomba yakwe. [346]

³⁹Va lo mu khoma, va mu humesa sinwini ga xivina, va mu daya. [347]

⁴⁰Loku ata a nwinyi wa xivina, i ta maha yini ka varimi lavo ke?

⁴¹Va lo mu hlamula, vaku: I ta va lovisa vaku bhi a vanhu lava va kubiha; zonake i ta nyikela xivina ka vanwani varimi, lava va ta nga mu nyika a mihanzu hi tinguva ta yona. [348]

⁴²Jesu aku kabye: Xana a mu gonzangi Mitsalweni ku ngalo: A ribye legi gi nga aliwa hi vaaki, Gi mahile a hloko ya magumo; Lexi xi mahilwe hi Hosi, Xa hlamalisa mahlweni ya hina. [349]

⁴³Hikwalaho nziku ka nwina: A mufumo wa Nungungulu wu ta tekiwa ka nwina, wu nyikiwa a tiko ginwani legi gi ta nga humesa a mihanzu ya wona.

⁴⁴Loyi a ta ngawa hehla ka ribye legi i ta pswhandleka zipanzana; kanilezi loyi gi ta ngawa hehla kakwe gi ta mu silisisa. [350]

⁴⁵Laha a vapristi va hombe ni vaFarisi na va yi zwile a mifananiso yakwe, va lo zi tiva lezaku i wulawula ha vona;

⁴⁶va lo lava ku mu khoma, kanilezi va chava a zidlemo, hakuva a vanhu a vaku muprofeti.