Read tshwa Mateu 22 Bible Online

Mateu 22 - tshwa bible

Mateu 22

¹Jesu i lo engeta a kanela kabye hi mifananiso, aku: [351]

²A mufumo wa tilo wu fanana ni hosi yo kari, leyi yi nga mahela a nʼwana wa yona a mubuzo wa muchado.

³Yi lo rumela a malanza ya yona a ku ya vitana lava va rambilweko mubuzweni; kanilezi va lo ala kuta.

⁴Yi lo engeta yi ruma manwani malanza, yiku: Byelani lava va rambilweko, muku: Nzi longisile a zakuga za mina; a tinkavi ta mina ni zifuyo za mina zi nonileko zi tlhabyilwe; zontlhe zi longile. Tanani mubuzweni.

⁵Kanilezi va lo honisa, va ti fambela; munwani masinwini yakwe, ni munwani mabhinzwini yakwe.

⁶A vanwani va lo khoma malanza, va ma wisa tingana, va ma daya.

⁷Zonake a hosi yi lo zangara; yi lo rumela tiyimpi ta yona, ti ya lovisa vadayi lavo, ni ku hisa muti wabye. [352]

⁸Zonake yiku ka malanza ya yona: A mubuzo wu longile, kanilezi lava va nga rambilwe va wa nga faneli. [353]

⁹Hikwalaho fambani mahanzakanyeni ya tindlela, mu ya ramba vontlhe lava mu ta nga va kuma.

¹⁰A malanza lawo ma lo famba tindleleni, ma ya tsombanyisa vontlhe lavo ma va kumako, a va kubiha, ni vo saseka ni yindlu ya mubuzo yi lo tala hi lava va tshamileko kugeni.

¹¹Kanilezi na yi enghenile hosi a ku wona lava va tshamileko kugeni, yi lo wona a munhu loyi a nga ambalangiko a nguwo ya muchado. [354]

¹²Yi te ngalo kakwe: Xaka, u enghenisile kuyini laha na u nga hi na nguwo ya muchado ke? Yena a su kaye.

¹³Zonake a hosi yi te ngalo ka malanza: Mu boheni mawoko ni milenge, mu mu hoxa munyameni wa lahandle, laha ku ta ngava ni mikosi ni kugetsela ka meno.

¹⁴Hakuva mbanyingi va rambilweko, kanilezi va tsongwani va hlawulilweko.

¹⁵Zonake a vaFarisi va lo famba va ya tsema khungo lezaku va ta mu dembelisa kuyini kuwulawuleni kakwe. [355]

¹⁶Va lo ruma ka yena a vapizani vabye zinwe ni va ka Herodi, va yaku: Mugonzisi, ha zi tiva lezaku wena u wa zinene, u gonzisa a ndlela ya Nungungulu hi zinene; a ku khatali hi munhu, hakuva a ku cuwuki a xiyimo xa vanhu.

¹⁷Hikwalaho, hi nga hi byela, U alakanya lezaku hi fanele ku yisa nzhuvo ka Kesari, kutani hi nga yisi ke?

¹⁸Kanilezi Jesu i lo tiva a kubiha kabye, aku: Mu nzi ringela yini, nwina vaxengeteli?

¹⁹Ma nga nzi kangetani a mali ya nzhuvo. Va lo tisa kakwe a denario.

²⁰I lo va wutisa, aku: Ngwa mani a mufananiso lowu ni mutsalo lowu ke?

²¹Vaku ka yena: Za Kesari. Zonake i te ngalo kabye: Tlhelisani ka Kesari lezi zi nga za Kesari, ni ka Nungungulu lezi zi nga za Nungungulu. [356]

²²Laha na va zi zwile va lo hlamala, va mu siya, va ti fambela.

²³Gwalego siku ku lota kakwe a vaSadusi, lava va nge ngalo a ku kona kuvuka hi ka vafileko. Va lo mu wutisa, [357]

²⁴vaku: Mugonzisi, Mosi i te ngalo: Loku munhu afa na a nga hi na vana, a nakulobye i ta hlambela sati wakwe kasi ku vuxela nakulobye a mbeleko. [358]

²⁵Makunu ku wa hi kona ka hina a ntlhanu wa vanakulobye ni vambiri; loyi wa nhonzwa i lo teka sati, a sufa. Lezo a nga kala a nga hi na nʼwana, i lo siya sati wakwe ka nakulobye;

²⁶i lo maha lezo a wa wumbiri kambe, ni wa wunharu, ku kala ka vantlhanu ni vambiri.

²⁷Anzhako ka vona vontlhe ku lofa ni wasati wa kona.

²⁸Lezi a nga mahile sati wabye vontlhe, laha kuvukeni ka vafileko i ta maha sati wa mani ka lava va ntlhanu ni vambiri?

²⁹Jesu i lo hlamula, aku ngalo kabye: Nwina mu lahlekile, lezi mu nga tiviko mitsalo, hambu ni ntamu wa Nungungulu. [359]

³⁰Hakuva a kuvukeni ka vafileko a va nga ta teka hambu hi ku tekiwa, kanilezi va ta kota tingelosi ta le tilweni. [360]

³¹Kanilezi hi ku kumbuka a kuvuka hi ka vafileko, a mu gonzangi lezi zi nga wulawuliwa ka nwina hi Nungungulu ke, aku:

³²Mina nzi Nungungulu wa Abrahama, ni Nungungulu wa Isaka, ni Nungungulu wa Jakobe? Nungungulu a hi Nungungulu wa vafileko, kanilezi ngwa vahanyako. [361]

³³Laha zidlemo na zi zwile, zi lo hlamaliswa hi kugonzisa kakwe.

³⁴Laha a vaFarisi va ngazwa lezaku i miyetile a vaSadusi, va lo tsombana khatiginwe. [362]

³⁵A munwe wa vona, loyi a nga hi mugonzisi wa nayo, i lo wutisa Jesu hi ku mu ringa, aku: [363]

³⁶Mugonzisi, a nayo wa hombe milayweni yontlhe hi wihi?

³⁷I te ngalo kakwe: U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontihe, ni kupima ka wena kontlhe. [364]

³⁸Lowu hi nayo wa hombe ni wa kuranga.

³⁹Ni wa wumbiri wu fananako na wona, hi lowu: U ta ranza wakelene na wena kota lezi u ti ranzako wena. [365]

⁴⁰A milayo leyi mimbiri hi tshinya ga milayo yontlhe ni vaprofeti.

⁴¹Makunu na va ha tsombene a vaFarisi, Jesu i lo va wutisa, [366]

⁴²aku: Mu alakanya yini nwina hi Kristu? I nʼwana mani ke? Vaku ngalo kakwe: I nʼwana Davida.

⁴³Aku ngalo kabye: Loku zi hi tano, hikuyini Davida a wulako hi Moya a mu vitana Hosi, aku:

⁴⁴A Hosi yi te ngalo ka Hosi ya mina: Tshama hi le reveni ga mina ga xinene; Kala nzi veka a valala va wena lahasi ka mikonzo ya wena? [367]

⁴⁵Loku Davida a mu vitana aku Hosi, i nʼwana wakwe hikuyini ke?

⁴⁶Ku wa nga hi na munhu a zi kotako ku mu hlamula nchumu, ku wa nga hi kona ni munwe a nga tiya ku mu wutisa nchumu kusukela siku lego. [368]