Read tshwa Mateu 23 Bible Online

Mateu 23 - tshwa bible

Mateu 23

¹Zonake Jesu i lo kanela ka zidlemo ni ka vapizani vakwe,

²aku: A vatsali ni vaFarisi va tshama xitshanwini xa Mosi. [369]

³Hikwalaho zontlhe lezi va mu byelako, zi maheni, mu zi gonga; kanilezi mu nga mahi mitiro yabye: hakuva vo wula, kanilezi a va mahi. [370]

⁴Ina, va boha minzhwalo yo binza, va yi rwexa makatleni ya vanhu; kanilezi a wutsumbu gabye a va na ku yi tshineta hi litiho. [371]

⁵A mitiro yabye yontlhe va yi maha kasi ku woniwa hi vanhu; hakuva va anamisa a mafilakterio yabye, va lehisa a machakafula ya tinguwo tabye. [372]

⁶Va ranza a zitshamu za le mahlweni lomu mibuzweni, ni zitshamu za le mahlweni masinagogeni,

⁷ni kuloswa wutshanwini go hlengeletana, ni ku vitanwa hi vanhu hiku: Rabi!

⁸Kanilezi nwina ngha mu nga vitanwi aku Rabi; hakuva munwe mugonzisi wa nwina, nwina nwentlhe mu vamakabye. [373]

⁹Mu nga vitani munhu laha misaveni muku i dadani; hakuva a Raru wa nwina munwe, hi loyi a nga le tilweni. [374]

¹⁰Mu nga vitanwi ku varangeli; hakuva murangeli wa nwina munwe, hi Kristu.

¹¹Kanilezi loyi a nga wahombe xikari ka nwina, i ta maha nanza ga nwina. [375]

¹²Loyi a ta nga ti kukumukisa i ta koramiswa; ni loyi a ti koramisako i ta kukumukiswa. [376]

¹³Kanilezi khombo a give ka nwina vatsali ni vaFarisi, nwina vaxengeteli! Hakuva mu valela vanhu a mufumo wa tilo; nwina wutsumbu a mu engheni, hambu ni ku va vumela va enghena lava va ranzako ku enghena.

¹⁴Khombo a give ka nwina vatsali ni vaFarisi, nwina vaxengeteli! Hakuva mu phanga tiyindlu ta tinoni, na mu kari mu khohlisa hi ku maha mikhongelo yo leha; mu ta amukela a kukoneka ka hombe.

¹⁵Khombo a give ka nwina vatsali ni vaFarisi, nwina vaxengeteli! Hakuva mu tsemakanya bimbi ni misava kasi ku ya maha munwe a kuva kholwa ga nwina; loku mu mu kumile, mu mu maha a nʼwana wa Gehena a ku hunza nwina hi kumbiri.

¹⁶Khombo a give ka nwina, varangeli va nga zikhumu, mu nge ngalo: Kani hi wihi a ta nga hlambanya hi tempeli, a hi nchumu; kanilezi loyi a ta nga hlambanya hi nzalama ya tempeli i tava ni nanzu wa ku tatisa a xifungo xakwe. [377]

¹⁷Nwina maphuphulu ni zikhumu; hi xihi xi nga xa hombe, a nzalama kutani a tempeli leyi yi basisako a nzalama ke? [378]

¹⁸Kambe muku; Kani hi wihi a ta nga hlambanya hi alati, a hi nchumu; kanilezi loyi a ta nga hlambanya hi munyikelo lowu wu nga ka gona i tava ni nanzu wa ku tatisa a xifungo xakwe.

¹⁹Nwina zikhumu, hi xihi xi nga xa hombe, a munyikelo kutani a alati legi gi basisako a munyikelo ke? [379]

²⁰Hikwalaho loyi a hlambanyako hi alati, i hlambanya ha gona ni zilo zontlhe zi nga ka gona.

²¹Ni loyi a hlambanyako hi tempeli, i hlambanya ha yona ni loyi a tshamako ka yona.

²²Ni loyi a hlambanyako hi tilo, i hlambanya hi xitshamu xa wuhosi xa Nungungulu, ni loyi a tshamako ka xona. [380]

²³Khombo a give ka nwina vatsali ni vaFarisi, nwina vaxengeteli! Hakuva mu nyikela a za wukhume a minte ni anase ni kumine, kasi mu tsikile a tshinya ga nayo, gi nga nongameto, ni wuxinji, ni kukholeka; kanilezi mu wa fanelwe hi ku maha lezi zo ranga, mu nga tsiki zinwani. [381]

²⁴Nwina varangeli va fileko mahlo, mu hlutelako wunuwunwani, kasi mu mita kameli.

²⁵Khombo a give ka nwina vatsali ni vaFarisi, nwina vaxengeteli! Hakuva mu hlaza lahandle ka gombe ni ngelo, kasi hi lomu nzeni zi tele hi kuphanga ni kubiha ko hunzeleta. [382]

²⁶Xikhumu-nzi-wena muFarisi! kuranga hlaza lomu nzeni ka gombe ni ngelo, kasi lahandle ka zona ku fela ku basawu.

²⁷Khombo a give ka nwina vatsali ni vaFarisi, nwina vaxengeteli! Hakuva mu fanana ni zilahla zi basisilweko, lezi zi wonekako na zi sasekile khwatsi hi lahandle, kanilezi lomu nzeni na zi tele hi marambu ya vanhu va fileko, ni kungahlazeki kontlhe. [383]

²⁸Hizalezo na nwina, lahandle ka nwina mu woneka ka vanhu na mu lulamile, kanilezi lomu nzeni mu tele hi kuxengetela ni kubiha.

²⁹Khombo a give ka nwina vatsali ni vaFarisi, nwina vaxengeteli! Hakuva mu aka minkele ya vaprofeti, mu bombisa a zilahla za vanhu vo lulama,

³⁰muku: Loku ku wo khwatsi hi wa hi kona a masikwini ya vadadani va hina, ngha hi nga hlengelangi navo a ku halata nkhata wa vaprofeti.

³¹Hilezo mu maha wukustumunyu nwina wutsumbu, lezaku mu vana va lavo va nga daya vaprofeti. [384]

³²Hizona, tatisani a lipimo la vadadani va nwina.

³³Nwina tinyoka, a pswalo wa maphiri, mu ta ponisa kuyini a kulamulwa ka Gehena ke?

³⁴Hikwalaho nzi ta mu rumela a vaprofeti, ni vanhu vo tlhariha, ni vatsali; a vanwani va vona mu ta va daya, mu va belela; ni vanwani mu ta va xupula masinagogeni ya nwina, mu va hlongolisa ka muti munwe ni munwani; [385]

³⁵Lezaku ku fela kuta hehla ka nwina a nkhata wontihe wu lulamileko lowu wu nga halatiwa misaveni, kusukela nkhateni wa Abeli a lulamileko, kala ka nkhata wa Zakaria nʼwana Barakia, loyi mu nga mu daya xikari ka tempeli ni alati. [386]

³⁶Hizinene nziku ka nwina, zontlhe lezi zi tata hehla ka lexi xizukulwana.

³⁷Jerusalema, Jerusalema, loyi u dayako vaprofeti, ni ku gandla hi maribye lava va rumelweko ka wena! Zikhati zingani nzi nga lava ku wungeletela a vanana va wena, kota a pswele gi wungeletelako a zihukwana za gona lahasi ka tipapa ta gona, kanilezi a mu vumelangi. [387]

³⁸Langutani, mu ta siyelwa a yindlu ya nwina, na yi hi rumbi.

³⁹Hakuva nziku ka nwina: Kusukela lezi mu nga ha ta nzi wona kambe mu kala muku: A khesiwe loyi a tako hi vito ga Hosi! [388]