Read tshwa Mateu 24 Bible Online

Mateu 24 - tshwa bible

Mateu 24

¹Jesu i lo huma tempeleni, a ti fambela. Zonake a vapizani vakwe va lota kakwe, va mu komba a tiyindlu ta tempeli.

²Kanilezi yena aku kabye: A mu zi woni zontlhe lezi ke? Hizinene nziku ka nwina: Laha ku nga ta siyiwa a ribye ginwe hehla ka ginwani, legi gi ta nga kala gi nga khungumulwa [389]

³Na a tshamile xitsungeni xa maoliva, a vapizani va lota kakwe na va hi voce, va taku: Hi byele a xikhati zi ta nga maheka ha xona lezi zilo, u hi tivisa ni xiwoniso xa kuwuya ka wena ni xa kugumesa ka tiko.

⁴Jesu i lo hlamula aku ngalo kabye: Ti woneleni kasi mu nga pengiswi hi munhu. [390]

⁵Hakuva vanyingi va tata hi vito ga mina, na vaku: Hi mina Kristu; va ta pengisa vanyingi. [391]

⁶Mu tazwa kulwa ni wudumo ga kulwa; ti woneleni lezaku mu nga dzukiswi. Lezi zilo zi fanele a kuva zi maheka, kanilezi a hi kona kugumesa.

⁷Hakuva a tiko gi ta vukela tiko, ni mufumo wu ta vukela mufumo; ku tava kona tindlala ni kutsekatseka ka misava matshanwini ma tsalangeneko. [392]

⁸Kanilezi zontlhe lezi kusangula ntsena ka kuxaniseka.

⁹Hi xikhati lexo va ta mu nyikela kuxanisekeni, va mu daya; mu ta vengiwa hi matiko wontihe hi kota ya vito ga mina. [393]

¹⁰Kwalaho ku ta khubeka vanyingi; va ta nyiketana ni ku vengana.

¹¹Ku ta huma vaprofeti vanyingi va mawunwa, va pengisa votala. [394]

¹²A liranzo la vanyingi li ta titimela hi kota ya kuenzeleka ka kuonha.

¹³Kanilezi loyi a timiselako kala kugumesa, yaloye i ta hanyiswa. [395]

¹⁴A ivangeli leyi ya mufumo yi ta kanetwa misaveni yontlhe, kasi yiva wukustumunyu ka matiko wontihe; hi kona ku ta nga chikela a kugumesa. [396]

¹⁵Hikwalaho, loku mu wona a manyalataniso ya mbhangalakasa, lawa ma nga kanetwa hi muprofeti Danyeli, na ma yimile wutshanwini go basa (loyi a gonzako lezi ngha a pima), [397]

¹⁶zonake lava va nga le Judia a va chavele zitsungeni;

¹⁷loye a nga hehla ka yindlu a nga ha chiki a ku ya teka lezi zi nga lomu ndlwini yakwe;

¹⁸ni loye a nga le masinwini ngha a nga tlheli a ya teka a nguwo yakwe,

¹⁹Va tava ni khombo lava va nga ni tinyimba ni lava va anwisako hi lawo masiku. [398]

²⁰Khongelani lezaku a chawo wa nwina wu nga mahiwi hi mawuyakaya, hambu hi sabado;

²¹hakuva hi xikhati lexo ku tava kona a kuxaniseka ka hombe, loku ku nga ngha ku nga hi kona hi kusanguleni ka misava kala makunu, cima ku nga ta ku va kona kambe. [399]

²²Loku lawo masiku ma wa nga komiswangi, ngha ku nga hi kona ni munwe a hanyisilweko; kanilezi hi kota ya vahlawulilweko a masiku lawo ma ta komiswa. [400]

²³Hi xikhati lexo loku munhu aku ka nwina: Mangabye, hi loyi Kristu; kutani: Hi gaya; mu nga kholwi; [401]

²⁴hakuva ku ta huma vanhu va ta nga ti wula Kristu hi ku hemba, ku huma ni vaprofeti va mawunwa; va ta maha ziwoniso za hombe ni zirewukiso, kasi ku pengisa ni vahlawulilweko loku zi koteka. [402]

²⁵Langutani, nzi mu byelile hi mahlweni.

²⁶Hikwalaho loku vaku ka nwina: Langutani, i le xiwuleni, mu ngayi kona; kutani, Langutani, i le tindlwini, mu nga va kholwi.

²⁷Hakuva kota lezi a kuhatima ku humako hi Mutsuwuka-gambo, ku woneka ni le Muhlwa-gambo, ku tava nghaho a kuwuya ka Nʼwana wa munhu.

²⁸Laha ku nga kona xirumbi, a makoti ma ta tsombana kona.

²⁹Loku ku mbhelile a kuxaniseka ka lawo masiku; a gambo gi ta pfhupeliswa, ni hweti yi nga ta humesa a kuwoninga ka yona, ni tinyeleti ti tawa hi le tilweni, ni mintamu ya matilo yi ta tsekatsekiswa, [403]

³⁰Zonake ku ta woneka le tilweni a xiwoniso xa Nʼwana wa munhu; kwalaho a tixaka tontlhe ta misava ti ta rila loku ti wona a Nʼwana wa munhu na ata hi marefu ya tilo ni ntamu ni kungangamela ka hombe. [404]

³¹Yena i ta ruma a tingelosi, takwe na tiba mimpunzu yo vuma nguvu; ti ta tsombanyisa a vahlawulilweko vakwe hi ka mune wa matlhelo ya misava, kusukela magemeta-musi ya tilo kala ka manwani magemeta-musi. [405]

³²Makunu gonzani hi sinya ya nkuwu a mufananiso wa wona: Loku a ravi ga wona gi nyuka, gi hluka matluka, ma zi tiva lezaku a ximumu xi le kusuhi;

³³hizalezo na nwina, laha na mu wona zontlhe lezi, zi tiveni lezaku Nʼwana wa munhu i le kusuhi, kona tinyangweni. [406]

³⁴Hizinene nziku ka nwina: Lexi xizukulwana xi nga ta hunza, na zi nga se ku maheka lezi zilo zontlhe, [407]

³⁵A tilo ni misava zi ta hunza, kanilezi a timhaka ta mina ti nga ta hunza. [408]

³⁶Kanilezi lego siku ni lexo xikhati a ku na munhu a zi tivako,, hambu tingelosi ta tilo, hambu ni Nʼwana, sine Dadani yece. [409]

³⁷Kota lezi ku nga maheka masikwini ya Noa, ku tava nghaho a kuwuyeni ka Nʼwana wa munhu.

³⁸Hakuva khwatsi hi lezi va ngaga, vanwa, va teka, ni ku tekiwa, a masikwini lawo ya mahlweni ka ntalo, ku kala siku lego Noa a nga enghena ha gona lomo tarwini, [410]

³⁹a va nga tivi nchumu kala wuta ntalo, wu va kukuleta vontlhe; ku tava nghaho a kuwuyeni ka Nʼwana wa munhu.

⁴⁰Hi xikhati lexo a vavanuna vambiri va ta ngha va hi le masinwini, a munwe i ta tekiwa, munwani a siyiwa;

⁴¹a vavasati vambiri va ta ngha va kari va gaya xigayweni, a munwe i ta tekiwa, munwani a siyiwa.

⁴²Hikwalaho rinzelani, hakuva a mu gi tivi a siku legi yi ta ngata ha gona a Hosi ya nwina. [411]

⁴³Kanilezi tivani lezi: Loku a nwinyi wa yindlu a wa xi tivile a xikhati a khamba gi ta ngata ha xona, ngha a rinzele, ngha a nga vumelangi a yindlu yakwe yi bhoxiwa, [412]

⁴⁴Hikwalaho na nwina, tshamani mu longile, hakuva a Nʼwana wa munhu wata hi xikhati lexi mu nga xi alakanyiko.

⁴⁵Hi wihi loyi a nga nanza gi tsumbekileko ni go tlhariha, loye a hosi yakwe yi gi yimisileko hehla ka malanza ya yona, kasi ku ma nyika zakuga hi xikhati xi faneleko ke? [413]

⁴⁶Gi katekile a nanza lego a hosi ya gona yi ta nga wuya, yi ta gi kuma na gi kari gi maha lezo.

⁴⁷Hizinene nziku ka nwina, yi ta gi yimisa hehla ka zontlhe lezi yi nga nazo. [414]

⁴⁸Kanilezi loku a nanza lego gi bihile, na gi wula mbilwini ya gona, giku:. A hosi ya mina ya hlwela;

⁴⁹gi sangula kuba malanza-kulobye, giga ni kunwa zinwe ni tifinela;

⁵⁰a hosi ya gona yi ta wuya hi siku gi nga yi languteliko, ni xikhati lexi gi nga xi tiviko,

⁵¹yi ta gi pulakanyisa, yi gi nyika xiavelo xa gona zinwe ni vaxengeteli; laha mikosi yi ta ngava kona ni kugetsela ka meno. [415]