Read tshwa Mateu 25 Bible Online

Mateu 25 - tshwa bible

Mateu 25

¹Hi xikhati lexo a mufumo wa tilo wu ta fanana ni khume ga vanhwana, lava va nga teka tikandiya tabye, va huma ku ya khinga muyeni. [416]

²A ntlhanu wa vona va wa hi zipumbu, ni ntlhanu va wa tlharihile. [417]

³Hakuva lava va zipumbu, laha va nga teka tikandiya tabye, a va tekangi ni mafura;

⁴kanilezi lava va tlharihileko va lo teka mafura lomu ka mabotori yabye zinwe ni tikandiya tabye.

⁵Kota lezi muyeni a nga hlwela, vontlhe va lo khudzehela va etlela. [418]

⁶Kanilezi xikari ka wusiku ku lo zwala a gezu giku; Langutani, wata muyeni! Humani muya mu khinga. [419]

⁷A vanhwana vontlhe va lo vuka, va longisa tikandiya tabye. [420]

⁸Lava va zipumbu vaku ka lava va tlharihileko: Hi hungululeni a mafura ya nwina, hakuva a tikandiya ta hina ta timeka.

⁹Kanilezi a va tlharihileko va lo hlamula, vaku: Ahihi, ma nga kala ku enela hina na nwina. I chuko muya ka lava va xavisako, mu ya ti xavela.

¹⁰Na va ha famba va ya xava, i lo chikela muyeni; lava va nga longile va lo enghena zinwe naye mubuzweni wa muchado; li valiwa livati. [421]

¹¹Anzhako ku lota lava vanwani vanhwana, va taku: Hosi, Hosi, hi vululele! [422]

¹²Kanilezi i lo hlamula, aku: Hizinene nziku ka nwina: a nzi mu tivi. [423]

¹³Hikwalaho rinzelani, hakuva a mu gi tivi siku ni xikhati. [424]

¹⁴Hakuva ku ta ku khwatsi hi loku munhu na a lava ku enza; i lo vitana a malanza yakwe, a ma nyika xuma xakwe. [425]

¹⁵I lo nyika ginwe a ntlhanu wa titalenta, a ka ginwani timbiri, ni ka ginwani yinwe; a ginwe ni ginwani kota ntamu wa gona wu tsalangeneko; zonake i lo famba lwenzweni lakwe. [426]

¹⁶Loyi a amukeleko a ntlhanu wa titalenta, i lo famba a ya ti bhinzulisa, a bhinzula a tinwani ta ntlhanu.

¹⁷Hizalezo ni loyi a amukeleko timbiri i lo bhinzula tinwani ta timbiri.

¹⁸Kanilezi loyi a nga amukele talenta yinwe i lo famba a ya kela misaveni, a fihla mali ya hosi yakwe.

¹⁹Loku ku hunzile masiku yo tala, yi lo wuya a hosi ya malanza lawo, yi ta hlayelana nawo.

²⁰Ku lota loyi a nga amukele a ntlhanu wa titalenta, a neha a tinwani ta ntlhanu, aku: Hosi, u nzi nyikile a ntlhanu wa titalenta; languta, nzi bhinzule tinwani a ntlhanu wa titalenta.

²¹A hosi yakwe yi te ngalo ka yena: U mahile khwatsi, nanza go saseka gi tsumbekileko; u wa tsumbekile ka zilo zi tsongwani, nzi ta ku yimisa hehla ka zinyingi; enghena kutsakeni ka hosi ya wena. [427]

²²Loyi a nga amukele a titalenta timbiri i lota a ta ku ngalo: Hosi, u nzi nyikile titalenta timbiri; languta, nzi bhinzule tinwani titalenta timbiri.

²³A hosi yakwe yi te ngalo ka yena: U mahile khwatsi, nanza go saseka gi tsumbekileko; u wa tsumbekile ka zilo zi tsongwani, nzi ta ku yimisa hehla ka zinyingi; enghena kutsakeni ka hosi ya wena.

²⁴I lota ni loyi a amukeleko a talenta yinwe, aku ngalo: Hosi, nzi wa ku tiva lezaku u munhu wa mona, u tshovelako laha u nga byalangiko kona, u wungeletela laha u nga heherangiko kona;

²⁵nzi lo chava, nzi su famba nzi ya fihla a talenta ya wena misaveni; wangabye, teka za wena.

²⁶Kanilezi a hosi yakwe yi lo hlamula yiku ka yena: Wena nanza go biha ni ga kuloloha; u wa zi tivile lezaku nzi tshovela laha nzi nga byalangiko kona, nzi wungeletela laha nzi nga heherangiko kona;

²⁷hikwalaho u wa fanelwe hi ku veka a mali ya mina bhankeni, kasi a kuwuyeni ka mina ngha nzi amukele a za mina zinwe ni bhinzu.

²⁸Mu tekeleni a talenta, mu yi nyika ka loyi a nga ni khume ga titalenta;

²⁹hakuva kani hi mani a nga nazo i ta nyikiwa, ava ni za kutala; kanilezi ka loyi a nga hiko nazo, hambu ni lexi a nga naxo xi ta tekiwa. [428]

³⁰Gi hoxeni munyameni wa lahandle a nanza gi nga vuniko nchumu, laha mikosi yi ta ngava kona ni kuge-tsela ka meno.

³¹Kanilezi laha a Nʼwana wa munhu a ta ngata hi kungangamela kakwe, ni tingelosi tontlhe ti hi zinwe naye; zonake i ta tshama xitshanwini xakwe xa kungangamela. [429]

³²Ku ta tsomhanyiswa a matiko wontihe mahlweni ka yena; i ta va hambanyisa a vanwe ka vanwani, kota a murisi a phakako tiyivu ka timbuti. [430]

³³I ta veka tiyivu reveni gakwe ga xinene, kanilezi a timbuti hi le reveni ga xibhabha.

³⁴Zonake a Hosi yi taku ka vona lava va nga reveni gakwe ga xinene: Ngonani nwina mu katekisilweko hi Dadani, mu taga a tshomba yi nga wona mufumo lowu wu longiselelweko nwina kusukela kusanguleni ka misava. [431]

³⁵Hakuva nzi wazwa a ndlala, mu lo nziha kuga; nzi wazwa tora, mu lo nziha a kunwa; nzi wa hi mupfhumba, mu lo nzi rurela; [432]

³⁶nzi wa hi ni wuna, mu lo nzi ambexa; nzi wa babya, mu lo ta nzi kamba; nzi wa hi le paxweni, mu lota ka mina.

³⁷Zonake a valulamileko va ta mu hlamula, vaku: Hosi, hi ku wonile rini na uzwa ndlala, hi ku phamela ke? kutani na uzwa tora, hi kuha kunwa ke?

³⁸Hi ku wonile rini na u hi mupfhumba, hi ku rurela ke? kutani u hi ni wuna, hi ku ambexa ke?

³⁹Hi rini hi nga ku wona na u kari u babya, kutani u hi le paxweni, hita ka wena ke?

⁴⁰A Hosi yi ta hlamula yiku ka vona: Hizinene nzi ngalo ka nwina: Kota lezi mu zi mahileko ka munwe wa lava vamakabye va mina va tsongwani, mu zi mahile ka mina. [433]

⁴¹Zonake i taku ngalo ka lava va nga reveni gakwe ga xibhabha: Sukani ka mina, nwina mu rukatelweko, mu ya nzilweni wa pinzukelwa lowu wu longiselweko Satani ni tingelosi takwe; [434]

⁴²hakuva nzi wazwa ndlala, a mu nzi nyikangi zakuga; nzi wazwa tora, a mu nzi nyikangi a kunwa;

⁴³nzi wa hi mupfhumba, a mu nzi rurelangi; na nzi hi ni wuna, a mu nzi ambexangi; nzi wa babya, nzi hi paxweni, a mu tangi mu ta nzi kamba.

⁴⁴Zonake vonawu va ta hlamula, vaku: Hosi, hi ku wonile rini na uzwa ndlala, kutani uzwa tora, kutani u hi mupfhumba, kutani u hi ni wuna, kutani na u babya, kutani na u hi paxweni, hi nga ku tireli ke?

⁴⁵Zonake i ta va hlamula, aku: Hizinene nzi ngalo ka nwina: Kota lezi mu nga kala ku zi maha ka munwe wa lava va tsongwanyani, a mu zi mahangi ka mina. [435]

⁴⁶Ni lava va taya kutsayisweni ka pinzukelwa; kanilezi a valulamileko va taya wutomini ga pinzukelwa, [436]