Read tshwa Mateu 26 Bible Online

Mateu 26 - tshwa bible

Mateu 26

¹Laha Jesu na a mbhetile ku wulawula tontlhe leti timhaka, i te ngalo ka vapizani vakwe:

²Ma zi tiva lezaku loku ku hunzile masiku mambiri, a pasika yi tava kona, zonake a Nʼwana wa munhu i ta nyikelwa a kuva a belelwa. [437]

³A ka xikhati lexo a vapristi va hombe ni masingalakati ya vanhu va lo tsombana lomu hubyeni ya mupristi wa hombe, a tibyako Kayafasi. [438]

⁴Va lo xuxa kungo kasi va fela ku khoma Jesu hi kukunguha, va mu daya;

⁵kanilezi vaku ngalo: Ngha zi nga mahiwi laha mubuzweni, ku nga vuka vilinganya xikari ka vanhu.

⁶Makunu laha Jesu a nga hi le Betania, le ndlwini ya Simoni loyi wa hlokonho, [439]

⁷ku lota kakwe a wasati na a hi ni xikhudzana xa alabasteri xi nga hi ni mafura ya tsengo wa hombe, a ta ma chulula hlokweni yakwe laha a nga tshamile kugeni.

⁸Kanilezi laha vapizani na va zi wonile, va lo tsanwa, vaku: Ma xakelelwa yini ke? [440]

⁹A mafura laya ngha ma xavisilwe hi mali yo tala, yi nyikiwa zisiwana.

¹⁰Jesu na a zi tivile i te ngalo ka vona: Mu mu karatela yini a wasati loyi ke? I nzi mahele a ntiro wo saseka.

¹¹A zisiwana zi na nwina xikhati xontlhe, kanilezi a mu na mina xikhati xontlhe. [441]

¹²Hakuva hi ku chulula laya mafura mirini wa mina, i zi mahele kulahliwa ka mina.

¹³Hizinene nzi ngalo ka nwina: Kani hi kwihi laha misaveni laha a ivangeli leyi yi ta nga kanetwa kona, ku ta kanetwa ni lexi a xi mahileko loyi wasati, lezaku a alakanyiwa ha xona.

¹⁴Zonake a munwe wa vakhume ni vambiri, a tibyako Judasi Iskarioti, i loya ka vapristi va hombe. [442]

¹⁵A yaku ngalo: Mu ta nzi nyika yini loku nzi mu nyikela ka nwina ke? Va lo mu pimela 30 wa macheleni.

¹⁶Hi kona a nga sangula ku lava xikhati xo mu nyikela ha xona.

¹⁷Hi siku go ranga ga mubuzo wa zibaba zi nga hiko na comelo, a vapizani va lota ka Jesu, va taku: U ranza a kuva hi ku longisela kwihi a kuga pasika ke? [443]

¹⁸Aku ngalo: Fambani mutini ka munhu wo kari, mu yaku ka yena; A Mugonzisi i ngalo: A xikhati xa mina xi tshinele, nzi taga pasika ndlwini ya wena, zinwe ni vapizani va mina.

¹⁹A vapizani va lo maha lezi Jesu a nga va rumile, va longisa pasika.

²⁰Laha na gi hlwile, Jesu i wa tshamile kugeni zinwe ni 12 wa vapizani. [444]

²¹Na va kari vaga i te ngalo: Hizinene nzi ngalo ka nwina: A munwe wa nwina i ta nzi tokometa.

²²Va lo karateka nguvu, a munwe ni munwani a sangula ku mu wutisa, aku: Hosi, hi mina ke?

²³I lo hlamula, aku: Loyi a nusako zinwe na mina lomu ngelweni, hi yena a ta nga nzi tokometa. [445]

²⁴A Nʼwana wa munhu wa suka kota lezi ku tsalilweko ha yena; kanilezi i khombo ka munhu loyi a ta nga nyikelwa hi yena! Ku wa hi chuko ka munhu loyi loku a wa nga belekwangi. [446]

²⁵Judasi loyi a nga mu nyikela, aku: Rabi hi mina ke? Aku kakwe: U wula zona.

²⁶Na va kari vaga, Jesu i lo teka xibaba, a khesa, a xi khema; i lo nyika vapizani aku: Tekani, muga; lexi hi miri wa mina. [447]

²⁷I lo teka a gombe, a bonga, a gi nyika kabye, aku: Nwanani nwentlhe ha gona;

²⁸hakuva lexi hi nkhata wa mina wa xivumelwano xiswa, lowu wu halatelwako a vanyingi a kutsetselelweni ka zionho. [448]

²⁹Nziku ka nwina; Kusukela lezi nzi nga ha tanwa mihanzu ya xivina, kala siku lego nzi ta nga yinwa yi hi yiswa, zinwe na nwina le mufunweni wa Dadani. [449]

³⁰Laha na va yimbelele lisimu, va lo huma vaya xitsungeni xa maOliva.

³¹Zonake Jesu aku ka vona: Nwina nwentlhe mu ta khubeka ha mina wusiku legi; hakuva kutsalilwe ku ngalo: Nzi taba murisi, ni tiyivu ta ntlhambi ti ta hangalaka. [450]

³²Kanileziloku nzi vukile hi ka vafileko nzi ta mu rangela a kuya Galilea. [451]

³³Pedro i lo hlamula, aku ngalo ka yena: Hambu loku vontlhe va khubeka ha wena, mina cima nzi nga ta khubeka. [452]

³⁴Jesu aku ngalo kakwe: Hizinene nzi ngalo ka wena: Gwalegi wusiku, na wu nga se kuba nkuku, u ta nzi kaneta kunharu.

³⁵Pedro aku kakwe: Hambu loku nzi ngafa na wena, nzi nga ta ku kaneta. A vapizani vontlhe va wulawu zalezo.

³⁶Zonake Jesu i loya navo wutshanwini gi tibyako Getsemane, aku ka vapizani vakwe: Tshamani laha, nza haya lahaya, nzi ya khongela. [453]

³⁷Yena i lo teka Pedro ni vana vambiri va Zabedi, a sangula ku xaniseka ni ku karateka nguvu.

³⁸Aku ka vona: A muhefemulo wa mina wa xaniseka nguvu, ku khwatsi hi kufa; salani laha, mu rinzela zinwe na mina. [454]

³⁹I lo famba mahlweni kutsongwani, a yawa hi nghohe yakwe, a khongela, aku: Dadani, loku zi koteka, a gombe legi a gi hunze ka mina; ahemba na ku nga mahiwi hi kuranza ka mina, kanilezi kota kuranza ka wena. [455]

⁴⁰I lo wuya ka vapizani, a ta va kuma na va etlele wurongo, aku ka Pedro: Kasi mu wa nga zi koti ku rinzela ni hora yinwe zinwe na mina ke?

⁴¹Rinzelani, mu khongela, kasi mu nga engheni kuringweni; hakunene a moya wa vumela, kanilezi a nyama yi na ni gome. [456]

⁴²I lo suka hi khati ga wumbiri, a ya khongela, aku: Dada, a gombe legi loku gi nga zi koti ku hunza, a handle ka kuva nzi ginwa, a kuranza ka wena a ku mahiwe.

⁴³I lo tlhela kambe a ta va kuma na va etlele wurongo, hakuva a mahlo yabye ma wa tika.

⁴⁴I lo va siya; a ya khongela hi khati ga wunharu, a wulawula twaleto timhaka.

⁴⁵Zonake i lo tlhela ka vapizani, aku kabye: Kasi ma ha etlele, mu humula! Langutani, a xikhati xa kuva a Nʼwana wa munhu a nyikelwa mandleni ya vaonhi xi chikele.

⁴⁶Vukani, hi famba; langutani, loyi a nzi tokometako i le kusuhi.

⁴⁷Na a ha wulawula, Judasi, a munwe wa vakhume ni vambiri, i lota zinwe ni xidlemo xa hombe, xi nga hi ni tisupado ni zigomba, xita hi le ka vapristi va hombe ni masingalakati ya vanhu. [457]

⁴⁸Loyi a mu tokometako i wa va nyikile a xikombiso, aku: Loyi nzi ta nga mu pswopswa, hi yena; mu khomeni.

⁴⁹Laha na a chikele ka Jesu, i te ngalo: Xewe Rabi! a mu pswopswa. [458]

⁵⁰Jesu aku ngalo kakwe: Xaka, maha lexi u teleko xona. Zonake va lo tshinela va ta tlhateka mandla ka Jesu, va mu khoma. [459]

⁵¹Kanilezi munwe wa lava va nga hi na Jesu, i lo tshambuluta canja gakwe, a hlomula supado yakwe, aba a nanza ga mupristi wa hombe, a mu tsema ndleve. [460]

⁵²Jesu aku kakwe: Tlhelisa a supado ya wena; hakuva vontlhe lava va khomako supado va ta lobyiswa hi yona. [461]

⁵³Wo alakanya lezaku a nzi zi koti ku kombela Dadani, a nzi rumela zalezi a khume ni mambiri mabutho ya tingelosi ti hlamusa ke? [462]

⁵⁴Zonake yi ta tatiseka hikuyini a mitsalo, yi nge ngalo zi fanele ku maheka lezi ke? [463]

⁵⁵Hi lexo xikhati Jesu aku ngalo ka xidlemo: Lezi nwina mu tako na mu hlomile tisupado ni zigomba, mu tela ku ta nzi khoma kota muphangi ke? Nzi lo tshama tempeleni masiku ni masiku nzi gonzisa, a mu nzi khomangi.

⁵⁶Kanilezi zontlhe lezi zi maheka, kasi ku fela ku tatiseka a mitsalo ya vaprofeti. Zonake a vapizani vontlhe va lo mu siya, va tsutsuma. Jesu a lamuliwa hi mupristi wa hombe.

⁵⁷Lava va nga wa khomile Jesu va lo mu yisa ndlwini ya Kayafasi, a mupristi wa hombe, laha va nga tsombene kona a vatsali hi masingalakati. [464]

⁵⁸Pedro i lo mu lanzela hi le kule, aya hubyeni ya mupristi wa hombe; i lo enghena a tshama zinwe ni malanza, kasi ku wona kumbhela ka zona.

⁵⁹Zonake a vapristi va hombe ni hubye yontlhe va lo lava a wukustumunyu ga mawunwa ha Jesu, kasi va fela ku mu daya;

⁶⁰kanilezi a va gi kumangi, hambu lezi ku ngata a vakustumunyu vanyingi va mawunwa. Hi magumo ku lota vavanuna vambiri [465]

⁶¹vaku: Loyi munhu i te ngalo: Nza zi kota ku khungumula a tempeli ya Nungungulu, nzi yi aketa hi masiku manharu. [466]

⁶²A mupristi wa hombe i lo suka, aku kakwe: Xana a ku hlamuli nchumu ke? I mhaka muni va ku kecarako ha yona lava ke?

⁶³Kanilezi Jesu i lo miyela. Ni mupristi wa hombe i te ngalo kakwe: Nza ku hlambanyisa hi Nungungulu, lezaku u hi byela loku u hi Kristu, a Nʼwana wa Nungungulu. [467]

⁶⁴Jesu aku kakwe: U wulile zona. Ahembalokoke, nza wula ka nwina, nziku: Anzhako ka lezi mu ta wona a Nʼwana wa munhu na a tshamile hi le reveni ga xinene ga Ntamu, na ata hi marefu ya tilo. [468]

⁶⁵Zonake a mupristi wa hombe i lo hanzula a tinguwo takwe, aku: I wulile nzhukano! Ka ha laveka hikuyini a vakustumunyu ke? Nwina mu yi zwile a nzhukano ya kona.

⁶⁶Mu alakanya yini nwina ke? Va lo hlamula vaku: Yena i fanelwe hi kufa. [469]

⁶⁷Zonake va lo mu phelela nghoheni, va muba; vanwani va lo mu phakata hi mandla, [470]

⁶⁸vaku: Kristu, hi vumbele loyi a ku bileko!

⁶⁹Laha Pedro a nga tshamile lahandle le hubyeni, ku lota kakwe a nanza ga xisati, a taku: Wenawu u wa hi na Jesu wa le Galilea. [471]

⁷⁰Kanilezi i lo kaneta mahlweni ka vona vontlhe, aku: A nzi zi tivi lezi u zi wulako.

⁷¹Laha na a humele nyangweni, a munwani wasati i lo mu wona, aku ngalo ka lava va nga hi laho: Loyi munhu kambe i wa hi na Jesu wa le Nazareta.

⁷²I lo kaneta kambe a hlambanya, aku: A nzi mu tivi loyi munhu.

⁷³Hi xikhanzakanya xa lezo ku lota lava va nga wa yimile laho, va taku ka Pedro: Hakunene wenawu u munwe wa vona; a wulawulela ga wena ga ku kombisa. [472]

⁷⁴Zonake i lo sangula ku rukatela ni ku hlambanya, aku: A nzi mu tivi loyi munhu. Kwalaho a nkuku wu loba. [473]

⁷⁵Pedro i lo alakanya a gezu ga Jesu ga ku ngalo: Na wu nga se kuba nkuku, u ta nzi kaneta kunharu. Yena i lo huma, a ya rila nguvu. [474]