Read tshwa Mateu 3 Bible Online

Mateu 3 - tshwa bible

Mateu 3

¹Hi ka lawo masiku ku lota Johani Mubapatizi na a kanela xiwuleni xa Judia, [24]

²aku: Hunzulukani, hakuva mufumo wa tilo wu tshinele. [25]

³Hakuva hi yaloye a nga kanela ha yena muprofeti Isaya, aku ngalo: A gezu ga loye a bako hungu xiwuleni, giku: Longiselani a ndlela ya Hosi, Mahani magonzo ya yona ma lulama. [26]

⁴Makunu Johani i wa hi ni tinguwo ta woya ga kameli, ni bhandi ga xikhumba xiwunwini xakwe; a kuga kakwe ku wa hi humbi ni wulombe ga khwati. [27]

⁵Zonake ku loya kakwe a va le Jerusalema ni Judia gontlhe, ni tiko gontlhe gi nga kusuhani ni Jordani; [28]

⁶va lo bapatizwa hi yena congweni wa Jordani, va wulela zionho zabye. [29]

⁷Kanilezi laha na a wona a vanyingi va vaFarisi ni vaSadusi na vata kubapatizeni kakwe, i te ngalo kabye: Pswalo wa tinyoka, mu lulekilwe hi mani ku chava a khulo gi tako ke? [30]

⁸Hikwalaho humesani mihanzu yi kombisako kuhunzuluka.

⁹Mu nga alakanyi muku: Hi na Abrahama, a nga dadani wa hina; hakuva nza mu byela lezaku Nungungulu i na ni ntamu ku vuxela Abrahama a vanana hi maribye laya, [31]

¹⁰Hambu ni lezi a xihloka xi vekilwe mitswini ya tisinya; a tisinya tontlhe leti ti nga pswaliko mihanzu yi neno ti ta tsemiwa, ti hoxiwa nzilweni. [32]

¹¹Mina nzi mu bapatiza hi mati kasi ma hunzuluka; kanilezi loyi a tako nzhako ka mina i na ni ntamu ku nzi hunza mina; a nzi faneli ni ku rwala zilato zakwe; yena i ta mu bapatiza hi Moya wa ku Basa ni nzilo. [33]

¹²A lihlelo lakwe li le canjeni gakwe, yena i ta swiyelisisa a wuhulelo gakwe, a hlengeletela a mavele yakwe magombeni yakwe, kanilezi a mungu i ta wu hisa hi nzilo wu nga timekiko. [34]

¹³Zonake Jesu i lota ka Johani le Jordani hi le Galilea, a ku ta bapatizwa hi yena. [35]

¹⁴Kanilezi Johani i wa lava ku mu kaneta, aku ngalo: Hi mina nzi faneleko ku bapatizwa hi wena, kasi wena uta ka mina!

¹⁵Jesu i lo hlamula aku kakwe: Lezi a zive tano; hakuva zinghaho hi fanele ku tatisa kululama kontlhe. Zonake Johani i lo mu vumela.

¹⁶Jesu laha na a bapatizilwe i lo huma zalezo hi lomo matini, languta, a tilo gi lo vululeka, a wona Moya wa Nungungulu wu relela kota tuva hehla kakwe. [36]

¹⁷Zonake ku lo zwala a gezu gi huma matilweni, giku: Loyi hi Nʼwana wa mina a ranzekako, nzi xaleleko khwatsi ha yena. [37]