Read tshwa Mateu 5 Bible Online

Mateu 5 - tshwa bible

Mateu 5

¹Laha Jesu na wona zidlemo, i lo kanziha xitsungeni; laha na a tshatirile lahasi a vapizani vakwe va lo tshinela ka yena. [52]

²Zonake i lo vulula nomu wakwe a va gonzisa, aku:

³Va katekile a zisiwana moyeni, hakuva mufumo wa le tilweni ngwabye. [53]

⁴Va katekile lava va rilako, hakuva va ta chavelelwa.

⁵Va katekile lava va kurula, hakuva va taga tshomba ya misava. [54]

⁶Va katekile lava va nga ni ndlala ya leʼzo lulama ni tora ga zona, hakuva va ta xuriswa. [55]

⁷Va katekile lava va nga ni wuxinji, hakuva va ta mahelwa wuxinji. [56]

⁸Va katekile lava va kubasa timbilu, hakuva va ta wona Nungungulu. [57]

⁹Va katekile lava va lamulako, hakuva va ta vitanwa vana va Nungungulu.

¹⁰Va katekile lava va xaniswako hi kota ya kululama, hakuva mufumo wa le tilweni ngwabye. [58]

¹¹Mu katekile loku va mu rukatela, va mu xanisa, va mu lumbeta kontlhe kubiha hi kota ya mina. [59]

¹²Tsakani, mu nengela nguvu, hakuva ngwa hombe a nchachazelo wa nwina le tilweni; hakuva va lo xanisisa lezo a vaprofeti lava va mu rangeleko. [60]

¹³Nwina mu munyu wa misava; kanilezi loku munyu wu pswhama, wu ta lungwa hi yini? A wa ha vuni nchumu ntsena ku hoxiwa lahandle wu kanzihelwa hi vanhu. [61]

¹⁴Nwina mu kuwonekela ka tiko; a muti lowu wu nga hehla ka xitsunga a wu na ku sirelwa. [62]

¹⁵Ni kandiya, a yi lumekwi yi vekiwa lahasi ka xirunzu, kanilezi yi hayekwa le hehla, yi woninga vontlhe lava va nga lomu ndlwini. [63]

¹⁶Hizalezo ngha na kuwonekela ka nwina ku woninga mahlweni ka vanhu, kasi va wona mitiro ya nwina yo saseka, va dumisa a Raru wa nwina wa le tilweni. [64]

¹⁷Mu nga alakanyi muku nzi tele ku ta fuvisa nayo hambu ni vaprofeti; a nzi telangi ku ta fuvisa, kanilezi ku ta tatisa. [65]

¹⁸Hizinene nziku ka nwina: Ku ta kala ku hunza a tilo ni misava, na cima ku nga fuvangi a nzhatana munwe kutani xidokho xinwe xa nayo, kala zontlhe lezi zi maheka. [66]

¹⁹Hikwalaho kani hi mani a ta nga hambunyeta munwe wa milayo leyi yi tsongwani, a gonzisa vanhu ku maha lezo, i ta hlayiwa loyi tsongwanyani mufunweni wa le tilweni. Kanilezi loyi a hlayisako milayo a yi gonzisa, i ta hlayiwa wahombe mufunweni wa tilo. [67]

²⁰Hakuva nza mu byele, nziku; Loku a kululama ka nwina ku nga hunzi a kululama ka vatsali ni vaFarisi, cima mu nga ta enghena mufunweni wa tilo. [68]

²¹Mu zi zwile lezi zi nga wuliwa ka vakale, za ku ngalo; U nga dayi; loyi a dayako i yimelwe hi ku lamulwa hi hubye. [69]

²²Kanilezi mina nziku ka nwina: Kani hi mani a zangarelako makabye wakwe i yimelwe hi ku lamulwa hi hubye; kani hi wihi a ta nga wula ka makabye wakwe, aku: Xipumbu, i yimelwe hi ku lamulwa hi hlengeletano; kani hi wihi a wulako aku: Wena u phuphulu, i yimelwe hi ku hoxiwa Gehena ga nzilo. [70]

²³Hikwalaho loku u humesa muphahlo wa wena laha alatini, u alakanya kona lezaku nakuloni i na ni mhaka na wena,

²⁴siya a muphahlo wa wena mahlweni ka alati, u famba u ya wuyisana ni nakuloni kuranga, zonake wuya u ta humesa a muphahlo wa wena.

²⁵Hatlisa u vumelana ni loyi a ku kecarako na wa ha hi naye laha ndleleni; ku nga taku a mukecari wa wena a ku yisa ka mulamuli, a mulamuli a ku nyikela ka nyakasani u valelwa paxweni. [71]

²⁶Hizinene nziku ka wena: Cima u nga ta huma kona, u kala u riha mali yontlhe.

²⁷Mu zwile lezaku ku wulilwe ku ngalo: U nga bhayi.

²⁸Kanilezi mina nziku ka nwina: Kani hi mani a cuwukako wasati a mu navela, i sina a bhayile naye mbilwini yakwe. [72]

²⁹Loku a tihlo ga wena ga xinene gi ku maha u khubeka, gi xokole, u gi hoxa kule; hakuva zi ku sasekele lezaku xiro xinwe xa wena xi lova, lezaku kasi a miri wa wena wontihe wu nga hoxiwi Gehena. [73]

³⁰Ni loku canja ga wena ga xinene gi ku maha u khubeka, gi tseme, u gi hoxa kule; hakuva zi ku sasekele lezaku xiro xinwe xa wena xi lova, lezaku kasi a miri wa wena wontihe wu ngayi Gehena.

³¹Ku wa wulilwe kambe ku ngalo: Loku munhu a hlongola sati wakwe, a mu nyike a papilo ga kuhambana. [74]

³²Kanilezi mina nziku ka nwina: Kani hi mani a hlongolako a sati wakwe, ahandle ka mhaka ya wubhayi, wa mu bhayisa; kani hi wihi a ta nga mu teka laha pa hlongolwe wa bhaya. [75]

³³Kambe mu zwile lezi zi nga wuliwa ka vakale ku ngalo: U nga hlambanyi hi mawunwa, kanilezi u ta tatisa ka Hosi a zifungo za wena. [76]

³⁴Kanilezi mina nziku ka nwina: Mu nga hlambanyi ni kanwe; hambu hi tilo, hakuva xitshamu xa wuhosi xa Nungungulu; [77]

³⁵hambu hi misava, hakuva xikhegetelo xa mikonzo yakwe; hambu hi Jerusalema, hakuva hi muti wa Hosi ya hombe.

³⁶U nga hlambanyi hi hloko ya wena; hakuva a ku zi koti ku hunzula a sisi munwe wu maha wo basa kutani wa ntima.

³⁷Kanilezi kuwulawuleni ka nwina, loku muku, Ina, a kuve ina; a Ahihi ava ahihi; kani hi xihi xa ku hunza lezi xita hi ka loyi wa kubiha. [78] Ku ti photela.

³⁸Nwina mu zi zwile lezaku ku wa wulilwe ku ngalo; A tihlo gi rihiwa hi tihlo, a tino hi tino; [79]

³⁹kanilezi mina nziku ka nwina: Mu nga tsimbeteli loyi wa kubiha; kanilezi kani hi mani a ku phakatako a rama ga xinene, hunzuluka u mu nyika ginwani kambe. [80]

⁴⁰Loku munhu a lava ku ku kecara kasi ku ku tekela hembe, mu nyike ni bhaji ga wena.

⁴¹Loku munhu a ku kurumeta ku mu heleketa pfhuka munwe, famba naye mipfhuka mimbiri. [81]

⁴²Mu nyike loyi a ku kombelako, ni loyi a ku lombako u nga mu fulareli. [82]

⁴³Mu zwile lezaku ku wulilwe ku ngalo: U ta ranza muakelane wa wena, u venga nala wa wena. [83]

⁴⁴Kanilezi mina nziku ka nwina: Ranzani valala va nwina, mu kombelela lava va mu xanisako; [84]

⁴⁵kasi mu fela kuva vana va Raru wa nwina loyi a nga le tilweni; hakuva wa tsuwukisa gambo gakwe hehla ka vobiha ni ka vosaseka, a nisa vula hehla ka valulamileko ni ka va nga lulamangiko.

⁴⁶Hakuva loku mu ranza lava va mu ranzako, i nchachazelo muni mu nga nawo ke? Hambu a vahlengisi a va mahi lezo ke? [85]

⁴⁷Loku mu losa vamakabye va nwina ntsena, mu va hunza hi yini a vanwani? Na vona vamatiko a va mahi lezo ke?

⁴⁸Hikwalaho ngha na nwina mu mbhelela, khwatsi hi Raru wa nwina wa le tilweni a mbheleleko. [86]