Read tshwa Mateu 7 Bible Online

Mateu 7 - tshwa bible

Mateu 7

¹Mu nga lamuli, kasi ma kala ku lamuliwa. [104]

²Hakuva mu ta lamuliwa hi kulamula loku mu lamulako ha kona vanwani; ni xiringaniso lexi mu ringanisako vanwani ha xona, mu ta ringaniswawu ha xona. [105]

³Hi yini u cuwukisako a xitoti lexi xi nga lomu tihlweni ga makabye wa wena, kanilezi u nga woni a tsanza lowu wu nga tihlweni ga wena nwinyi ke?

⁴U ta wulisa kuyini ka makabye wa wena, uku: Khwatsi, nzi susa a xitoti xi nga lomo tihlweni ga wena; kasi lezo ku na ni tsanza ka ga wena tihlo?

⁵Wena muxengeteli, susa kuranga a tsanza lomo tihlweni ga wena nwinyi, zonake u ta wona ku te dlunya a ku susa xitoti xi nga tihlweni ga makabye wa wena.

⁶Mu nga nyiki timbyana lezi zi basileko, hambu ni ku hoxa maperola ya nwina ka makhumba, ma nga taku ma ma kanzihela lahasi hi mikonzo ya wona, ma mu hunzulukela ma mu hanzula. [106]

⁷Kombelani, mu ta nyikiwa; lavani, mu ta zi kuma; gongonzani, mu ta vululelwa. [107]

⁸Hakuva kani hi mani a kombelako, wa nyikiwa; ni loyi a lavako wa zi kuma; ni loyi a gongonzako i ta vululelwa. [108]

⁹Xana himani xikari ka nwina loyi a to nyika nʼwana wakwe a ribye, loku a kombela xibaba,

¹⁰kutani loku a kombela xidluwani a mu nyika a nyoka ke?

¹¹Hikwalaho loku nwina, na mu bihile, mu zi tiva ku nyika leʼzo saseka ka vanana va nwina, nguvunguvu a Raru wa nwina wa le tilweni a nga ta va nyika zilo zo saseka lava va mu kombelako ke?

¹²Hikwalaho zontlhe lezi mu ranzako a kuva vanhu va zi maha ka nwina, va maheleniwo zona; hakuva lezi i nayo ni vaprofeti. [109]

¹³Enghenani hi nyangwa yo hlongana; hakuva a nyangwa yi yako kulobyisweni yi anamile, ni ndlela yi komamako kona yi kulile; mbanyingi va fambako ha yona. [110]

¹⁴Kanilezi a nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako.

¹⁵Chavani a vaprofeti va mawunwa, lava va tako ka nwina na va ambele a tinguwo ta tiyivu, kanilezi timbilwini tabye va hi timhisi leti ti pamako. [111]

¹⁶Mu ta va tiva hi mihanzu yabye. Kunene a vanhu vakota mauva mizweni ke, ni makuwu le makahweni ke?

¹⁷Zinghaho ni tisinya tontlhe to saseka ti pswala mihanzu yo nanziha; kanilezi a sinya yo biha yi pswala mihanzu ya kubiha.

¹⁸A sinya yo saseka a yi zi koti ku pswala mihanzu ya kubiha, hambu ni sinya yo biha a yi zi koti ku pswala mihanzu yo nanziha.

¹⁹A sinya yinwe ni yinwani leyi yi nga pswaliko mihanzu yo nanziha, yi tsemiwa, yi hoxiwa nzilweni. [112]

²⁰Hikwalaho hi mihanzu yabye mu ta va tiva.

²¹A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni. [113]

²²A vanyingi va taku ka mina hi lego siku: Hosi, Hosi, a hi profetangi hi vito ga wena ke; hi vito ga wena a hi hlongolangi madimoni ke; a hi mahangi zirewukiso zo tala hi vito ga wenake? [114]

²³Zonake nzi taku ka vona: Cima nzi wa nga mu tivi; sukani ka mina, nwina vaonhi: [115]

²⁴Hikwalaho kani hi mani loyi a zwako a timhaka leti ta mina, a ti maha, i ta fanana ni munhu a tlharihileko, loyi a nga aka yindlu yakwe laha ribyeni. [116]

²⁵Zonake yina vula, ni mintalo yi lota; ni timheho ti lo bhubhutsa, ti taba yindlu leyo, kanilezi a yi wangi, hakuva yi wa gingilwe ribyeni.

²⁶Ni kani hi mani loyi a zwako a timhaka ta mina, a nga ti mahi, i ta fanana ni munhu wa phuphulu, loyi a nga aka yindlu yakwe vunyeni.

²⁷Zonake yi lona vula, ni mintalo yi lota, ni timheho ti lo bhubhutsa, ti taba yindlu leyo, yiwa; ku wa hi ka hombe a kuwa ka yona.

²⁸Ku te laha Jesu na mbhetile leti timhaka, a zidlemo zi lo hlamala hi kugonzisa kakwe; [117]

²⁹hakuva i lo va gonzisa kota munwe a nga ni ntamu, na ku nge khwatsi hi vatsali vabye. [118]