Read tshwa Mateu 9 Bible Online

Mateu 9 - tshwa bible

Mateu 9

¹Yena i lo enghena ngalaveni a tlhatuka, aya mutini wabye. [131]

²Ku lo nehiwa kakwe a munhu a nga file reve ga tlhelo, na etlele sangweni. Jesu na a wona kukholwa kabye i te ngalo ka loyi a nga file reve ga tlhelo; Nwananga, tiya hlana. A zionho za wena zi tsetselelwe. [132]

³A vo kari va vatsali va lo alakanya timbilwini tabye, vaku: Loyi munhu i wula nzhukano.

⁴Jesu na a tiva kualakanya kabye, aku ngalo: Hi yini mu alakanyako kubiha timbilwini ta nwina? [133]

⁵Hi xihi xihehukako, aku ngalo: Zionho za wena zi tsetselelwe; kutani ku ngalo: Suka, u famba?

⁶Kanilezi kasi ma fela ku zi tiva lezaku a Nʼwana wa munhu i nani ntamu misaveni a ku tsetselela zionho, (aku ka loyi a fileko reve): Vuka, u teka sango ga wena, u famba kaya;

⁷A su vuka, aya kaya kabye.

⁸Laha vanhu va nga zi wona, va lo rewuka va dumisa Nungungulu, loyi a nyikileko ntamu wa kunghahi ka vanhu.

⁹Laha Jesu na a suka laho, i lo wona a munhu a vitwako Mateu, na a tshamile wutshanwini go hlengisa; i te ngalo kakwe: Nzi lanze. Yena i lo suka, a mu lanzela. [134]

¹⁰Zonake laha na a tshamile kugeni lomu ndlwini yakwe, a vahlengisi vanyingi ni vaonhi va lo ta tshama zinwe na Jesu ni vapizani vakwe laha kugeni.

¹¹Laha vaFarisi va nga zi wona, vaku ka vapizani vakwe: Hikuyini a mugonzisi wa nwina a gako ni vahlengisi ni vaonhi ke? [135]

¹²Laha Jesu na zi zwile, i te ngalo: Lava va hanyako a va lavi nʼanga, kanilezi sine lava va babyako.

¹³Fambani mu ya gonza lezaku zi wula yini leʼzo ngalo: Nzi ranza wuxinji, a nzi ranzi miphahlo. Hakuva a nzi telangi a ku ta vitana a valulamileko, kanilezi a vaonhi. [136]

¹⁴Zonake ku lota kakwe a vapizani va Johani, va taku: Hikuyini hina ni vaFarisi hi tala ku yila, kasi a vapizani va wena a va yili? [137]

¹⁵Jesu aku ngalo kabye: A vanghana va muteki va zi kota ku rila, a muteki na a ha hi navo ke? Kanilezi a masiku ma tata, laha muteki a ta nga suswa ka vona, hi kona va ta nga rila. [138]

¹⁶A ku na munhu a rungelako a xitiva xiswa ngubyeni ya kale, hakuva a xitiva xa kunghaho xi nga tlhukula nguwo, xi engetela kuhanzuka.

¹⁷Tlhatakumbiri, a vanhu a va cheli vinya giswa mikwameni ya kale; loku ku mahiwa lezo a mikwama yi ta hanzuka, a vinya gi halaka, ni mikwama yi onheka. Kanilezi va chela vinya giswa mikwameni yiswa, zi hlayiseka hi wumbiri ga zona.

¹⁸Na a ha wulawula timhaka leti, ku lota a mufumeli a ta mu khizamela, aku: A nhanyana wa mina wa hi kufa zalezi; kanilezi tana u ta tlhateka canja ga wena hehla kakwe, yena i ta hanya. [139]

¹⁹Jesu i lo suka, a mu lanzela zinwe ni vapizani vakwe.

²⁰Languta, a wasati loyi a nga hi ni wubabyi go huma nkhata a 12 wa malembe, i lo tshinela kakwe hi lenzhaku, a khumba a machakafula ya nguwo yakwe; [140]

²¹hakuva i waku mbilwini yakwe: Loku nzi khumba a nguwo yakwe ntsena, nzi ta hanya.

²²Kanilezi Jesu na a hunzuluka i lo mu wona, aku: Nwananga, tiya hlana; a kukholwa ka wena ku ku hanyisile. A ka xikhati xwalexo a wasati i lo hanyiswa. [141]

²³Laha Jesu na a chikelendlwini ya mufumeli, i lo wona lava va ngaba tinjhele, ni lava va nga tsombene va hlaluka,

²⁴aku kabye: Sukani; hakuva a nhanyana a nga fangi, i etlele. Va lo mu hleka. [142]

²⁵Kanilezi loku xidlemo xi humesilwe, yena i lo enghena, a mu khoma hi canja; ni nhanyana i lo vuka.

²⁶A wudumo ga kona gi lo zwala tikweni lego gontlhe.

²⁷Jesu na a ha suka laho, a zikhumu zimbiri zi lo mu lanza, zi vitana ziku: Nʼwana Davida, hi mahele wuxinji! [143]

²⁸Laha na a enghenile ndlwini, a zikhumu zi lota kakwe. Jesu i te ngalo ka zona: Ma kholwa lezaku nza zi kota ku maha leʼzi ke? Ziku kakwe: Ina, Hosi.

²⁹Zonake i lo khumba a mahlo yabye, aku: A ku maheke ka nwina kotisa kukholwa ka nwina.

³⁰A mahlo yabye ma lo vululeka. Jesu i lo va layisisa, aku: Wonani, zi nga tibyiwi hi munhu.

³¹Kanilezi va lo huma, va su hangalasa a wudumo gakwe ka gontlhe lego tiko. [144]

³²Na va kari va huma; ku lo tiswa kakwe a munhu wa mbeveve, loyi a nga hi ni dimoni.

³³Laha a dimoni na gi humesilwe, a mbeveve yi lo wulawula. A zidlemo zi lo hlamala, ziku: Cima a ku na nga wonwa zo kota lezi ka Israeli!

³⁴Kanilezi a vaFarisi vaku: I humesa madimoni hi hosi ya madimoni. [145]

³⁵Jesu i lo nzulanzula mitini yontlhe ni zimitaneni, a gonzisa masinagogeni, na a kanela Ivangeli ya mufumo, a chuma tontlhe tixaka ta tinghumbe ni tixaka tontlhe ta mababyi. [146]

³⁶Kanilezi laha na a wonile zidlemo, i lo zi zwela wusiwana, hakuva va wa xaniseka na va hangalakile, kota tiyivu ti nga hava murisi. [147]

³⁷Hi laha a ngaku ngalo ka vapizani vakwe: A kutshovela ka hombe nguvu, kanilezi a zitiri zi tsongwani. [148]

³⁸Hikwalaho kombelani a Hosi ya kutshovela, lezaku yi rumela a zitiri kutshoveleni ka yona.