Read tshwa Marku 1 Bible Online

Marku 1 - tshwa bible

Marku 1

¹A kusangula ka ivangeli ya Jesu Kristu, a Nʼwana wa Nungungulu. [1]

²Kota lezi ku tsalilweko hi muprofeti Isaya, ku ngalo: Languta, nza ruma a ntsumi wa mina mahlweni ka wena, Lowu wu ta nga longisa a ndlela ya wena.

³Ingisani a gezu ga loyi a bako hungu xiwuleni, aku: Longisani a ndlela ya Hosi, Mu lulamisa a magonzo ya yona. [2]

⁴Lezo ku lota Johani, loyi a nga bapatiza xiwuleni, a kanela a kubapatiza ka kuhunzuluka loku ku yisako kutsetselelweni ka zionho. [3]

⁵A tiko gontlhe ga Judia, ni vontlhe va le Jerusalema va lo huma vaya ka yena, va lo bapatizwa hi yena congweni wa Jordani, na va wulela a zionho zabye. [4]

⁶Johani i wa ambele a nguwo ya woya ga kameli, a hi ni bhandi ga xikhumba xiwunwini xakwe; i waga humbi ni wulombe ga khwati.

⁷I lo kanela aku: Wa hata munwani hi lenzhako ka mina, loyi a nga ni ntamu ku nzi hunza, loyi a tingoti ta zilato zakwe nzi nga faneliko ku korama nzi ti tlhatlha. [5]

⁸Mina nzi mu bapatizile hi mati, kanilezi yena i ta mu bapatiza hi Moya wa ku Basa. [6]

⁹Hi ka masiku lawo ku lota Jesu hi le Nazareta wa le Galilea, a ta bapatizwa hi Johani le congweni wa Jordani. [7]

¹⁰Na a ha huma hi lomo matini, i lo wona tilo na gi avanyeka, ni Moya wu relela hehla kakwe kota tuva. [8]

¹¹Ku lo huma gezu hi le tilweni, giku: Wena u Nwananga a ranzekako, nzi xalalako khwatsi ha wena. [9]

¹²Zalezo a Moya wu lo mu yisa xiwuleni. [10]

¹³I wa hi le xiwuleni a 40 wa masiku na ringwa hi Satani, na a hi xikari ka zihari za khwati; a tingelosi ti lo mu tirela. [11]

¹⁴Laha Johani na a valelwe paxweni; Jesu i loya Galilea, na a kanela ivangeli ya Nungungulu, [12]

¹⁵aku: A xikhati xi tatisekile, ni mufumo wa Nungungulu wu tshinele; hunzulukani mu kholwa hi ivangeli. [13]

¹⁶Na a kari a hunza hi le bimbini ga Galilea, i lo wona Simoni na Andreu a nakulobye wa Simoni, na va peta likoka bimbini, hakuva va wa hi vakukuti. [14]

¹⁷Jesu aku ngalo kabye: Nzi lanzeni, nzi ta mu maha vakukuti va vanhu.

¹⁸Zalezo va lo siya a tikoka, va mu lanzela. [15]

¹⁹Laha na fambile kutsongwani, i lo wona Jakobe nʼwana Zabedi, na Johani nakulobye, na va hi lomu ngalaveni va rungetela a tikoka tabye.

²⁰Loku a va vitanile va lo siya raru wabye Zabedi ngalaveni zinwe ni zitiri, va mu lanzela.

²¹Zonake va lo enghena Kapernaume; hi siku ga sabado i lo enghena sinagogeni, a gonzisa. [16]

²²A vanhu va lo hlamala hi kugonzisa kakwe, hakuva i lo va gonzisa hi ntamu, na ku nga hi ku khwatsi hi vatsali.

²³Lomu sinagogeni gabye ku wa hi kona a munhu loyi a nga hi ni moya wa kubiha, loyi a nga kanyuluka, [17]

²⁴aku: I mhaka muni hi nga nayo na wena, wena Jesu wa le Nazareta; u tele ku ta hi lovisa ke? Nza ku tiva lezaku hi wena mani, u Loyi wa kubasa wa Nungungulu. [18]

²⁵Jesu i lo wu kawuka, aku: Miyela, u huma ka yena.

²⁶A moya wa kubiha wu lo tsekatsekisa a munhu wa kona, na wu kanyuluka hi gezu ga hombe, wu lo huma ka yena. [19]

²⁷Vontlhelele va lo hlamala, va wutisana xikari kabye, vaku: Xini lexi? E, i gonzo yiswa ya ntamu! Hambu a mimoya ya kubiha wa yi laya, yi mu ingisa.

²⁸A wudumo gakwe gi lo hangalaka wutshanwini gontlhe ga le Galilea.

²⁹Kota lezi va nga humile sinagogeni, va loya ndlwini ya Simoni na Andreu, zinwe na Jakobe na Johani. [20]

³⁰Kanilezi a mukokati wa Simoni i wa etlele na a babya hi feveri, va lo hatla va byela Jesu ha yena.

³¹I loya mu khoma hi canja, a mu vuxa, ni feveri yi lo mu tsika; yena i lo va tirela.

³²Laha gambyeni loku gi pelile, va lo neha kakwe lava va nga babya, ni lava va nga hi ni madimoni. [21]

³³A muti wontihe wu wa tsombene laha nyangweni.

³⁴I lo hanyisa vanyingi va nga hi ni tinghumbe ti hambeneko, a humesa madimoni yo tala; kanilezi i wa nga vumeli a madimoni ku wulawula, hakuva ma wa mu tiva. [22]

³⁵Laha mixweni na gi nga se tsuwuka i lo vuka a huma, aya wutshanwini ga xiwula, a ya khongela kona.

³⁶Simoni ni lava va nga hi navo va lo famba va ya mu lava.

³⁷Loku Va mu kumile vaku kakwe: Vontlhe va ku lava.

³⁸Aku ngalo kabye: A hi fambeni kunwanyani, ka miti leyi yi nga kusuhani, kasi nza fela ku kanela ka yona kambe, hakuva nzi tele lezo. [23]

³⁹I lo famba a ya kanela masinagogeni yabye tikweni gontlhe ga le Galilea, na a kari a hlongola madimoni. [24]

⁴⁰Ku lota kakwe a munhu wa hlokonho, a ta mu khongotela, na a khizamile, aku kakwe: Loku u zi ranza, U nga nzi basisa. [25]

⁴¹Jesu na a mu zwela wusiwana, i lo nawuluta canja gakwe, a mu khumba, aku kakwe: Nza zi ranza, basiswa wena.

⁴²Zalezo a hlokonho yakwe yi lo suka ka yena, a basiswa.

⁴³Zonake Jesu i lo mu layisisa, a hatlisa ku mu fambisa,

⁴⁴aku kakwe: U nga dzuki u wula nchumu ka munhu; kanilezi ti fambele, u ya ti wonisa ka mupristi, u ya nyikela hi kota ya kubasiswa ka wena lezi Mosi a nga zi laya, kasi giva wukustumunyu kabye. [26]

⁴⁵Kanilezi yena i lo suka a ya hlawutela nguvu, ni ku hangalasa a mahungu lawa, a kala Jesu a nga ha zi koti ku enghena ni wihi muti kubaseni; kanilezi i wa fanele ku tshama lehandle wutshanwini ga xiwula, ni vanhu va lota kakwe hi matlhelo wontihe.