Read tshwa Marku 11 Bible Online

Marku 11 - tshwa bible

Marku 11

¹Laha va nga tshinela Jerusalema, va hi le kusuhi ni Betfage ni le Betania, le xitsungeni xa maOliva, Jesu i lo ruma vambiri va vapizani vakwe, [181]

²aku ka vona: Fambani mutini wu nga mahlweni ka nwina; khwatsi hilezi mu enghenako ka wona, mu ta kuma a ximbongolana na xi khungilwe, lexi cima xi nga khilelwangiko hi munhu; xi tlhatlheni, mu xi neha laha.

³Loku munhu aku ka nwina: Hi yini mu mahako lezo? Mu taku: A Hosi ya xi lava, yi ta xi tlhelisa lokuloku.

⁴Va lo famba, va ya kuma ximbongolana na xi khungilwe nyangweni ya yindlu laha ndleleni; va xi tlhatlha.

⁵A vanwani lava va yimileko laho, vaku ngalo kabye: Mu xi tlharihela yini a ximbongolana ke?

⁶Vona va lo hlamula kota lezi Jesu a nga va byelile, zonake va va tsika va famba.

⁷Laha na va nehile ximbongolana ka Jesu, va lo veka a tinguwo tabye hehla ka xona, yena a xi khilela.

⁸A vanyingi va lo andlala tinguwo tabye ndleleni, ni vanwani a tiravi, leti va nga ti tsemile mafusini. [182]

⁹Lava va nga rangile, ni lava va nga lanzela va lo kanyuluka, vaku: Hozana: a khesiwe yena loyi a tako vitweni ga Hosi! [183]

¹⁰A wu khesiwe a mufumo lowu wu tako wa dadani wa hina Davida. Hozana le hehlahehla! [184]

¹¹Yena i lo enghena Jerusalema ni lomo tempeleni; laha na cuwukisile zontlhe gi wa pelile; yena a huma, aya Betania zinwe ni vakhume ni vambiri.

¹²Hi manziko wa kona laha na va huma hi le Betania, i lozwa ndlala; [185]

¹³na a wona a sinya ya nkuwu le kule, na wu hi ni matluka, i lo hambuka aku kutani i ta kuma nchumu ka wona; kanilezi laha na a chikele ka wona, a nga kumangi nchumu, sine matluka ntsena, hakuva yi wa nga hi nguva ya makuwu.

¹⁴Yena i te ngalo ka wona: Kusukela lezi ngha ku nga hi kona munhu a gako mihanzu ya wena kala kupinzuka. Ni vapizani va lo zizwa.

¹⁵Laha va nga chikela Jerusalema, Jesu i lo enghena tempeleni, a sangula ku hlongola lava va xavisako ni lava va xavako tempeleni; a khubhunyeta a timeza ta lava va nga xavisa mali, ni zitshamu za vaxavisi va zipomba; [186]

¹⁶na a nga vumeli lezaku a munhu a tsemakanya tempeleni na a rwele nchumu.

¹⁷I lo va gonzisa, aku: A ku tsaliwangi lezaku: A yindlu ya mina yi ta vitanwa a yindlu ya kukhongela ya matiko wontihe? Kasi ke nwina mu yi mahile a mhako ya vaphangi. [187]

¹⁸A vapristi va hombe ni vatsali loku va zizwa, va wa lava lezaku va nga mu dayisa kuyini; hakuva va wa mu chava, hilezi a xidlemo xontlhe xi wa hlamala hi kugonzisa kakwe. [188]

¹⁹A siku ni siku va wa huma mutini loku gi hlwile.

²⁰Kota lezi va nga hunza ni mixo, va lo wona a sinya ya nkuwu na yi womile kusukela mitswini. [189]

²¹Pedro na alakanya, aku ka Jesu: Rabi, languta a sinya ya nkuwu leyi u nga yi rukatela, yi wunile.

²²Jesu i lo hlamula, aku ngalo ka vona: Ngha mu hi ni kukholwa ka Nungungulu.

²³Hizinene nziku ka nwina: Kani hi wihi a ta ngaku ka lexi xitsunga: Kunuka u ya ti hoxa bimbini; loku a nga kanakani mbilwini yakwe, kanilezi a kholwa lezaku zi ta maheka lezi a zi wulako, i ta mahelwa zona. [190]

²⁴Hikwalaho nziku ka nwina: Zontlhe lezi mu zi kombelako hi kukhongela, kholwani lezaku mu zi amukele, mu tava nazo. [191]

²⁵Loku mu yimile mu khongela, tsetselelani a munhu loyi mu nga hi ni mhaka naye; kasi ni Raru wa nwina loyi a nga le tilweni a fela ku mu tsetselela a zihambuko za nwina. [192]

²⁶Kanilezi loku mu nga tsetseleli vanwani, na yenawu a Raru wa nwina wa le tilweni a nga ta mu tsetselela a zihambuko za nwina.

²⁷Zonake va lo tlhela va enghena Jerusalema; ni laha a nga kari a fambafamba lomu tempeleni, a vapristi va hombe va lota ka yena zinwe ni vatsali ni masingalakati, [193]

²⁸vaku kakwe: I ntamu muni u mahako ha wona lezi ke? Kutani himani a nga ku nyika lowu ntamu wa ku maha lezi zilo ke?

²⁹Jesu aku ka vona: Minawu nzi ta mu wutisa mhaka yinwe; loku mu nzi hlamula, na mina nzi ta mu byela a ntamu lowu nzi mahako ha wona lezi zilo.

³⁰A kubapatiza ka Johani ku wata hi le tilweni, kutani hi ka vanhu ke? Nzi hlamuleni.

³¹Va lo wulawulisana xikari kabye, vaku: Loku hi ku ngalo: Hi le tilweni; i ta ku ngalo: Hi yini mu nga kala ku kholwa ka yena ke?

³²Kanilezi loku hiku: Hi ka vanhu—va wa chava vanhu, hakuva vontlhe va waku Johani hakunene muprofeti.

³³Va lo hlamula Jesu, vaku: A hi zi tivi. Jesu aku ngalo kabye: Na minawu nzi nga ta mu byela hi ntamu lowu nzi mahako he wona lezi zilo.