Read tshwa Marku 12 Bible Online

Marku 12 - tshwa bible

Marku 12

¹Zonake i lo sangula ku kanela kabye hi mifananiso, aku: A munhu i lo byala xivina, a xi bhiyela lihlavu, a kehla a xigowolo xo hlutela vinya, ni ku aka tshala; zonake i lo xi nyikela ka varimi, aya matikweni. [194]

²Hi nguva ya kona i lo rumela a nanza ka varimi, kasi ga fela ku amukela a xipanze xa mihanzu ya xivina ka vona.

³Kanilezi va lo gi khoma va giba, va gi tlhelisa na gi nga hi na nchumu.

⁴I lo va rumela a ginwani nanza; kanilezi gona va gi balesa hloko, va gi wisa tingana.

⁵I lo ruma ginwani, kanilezi va lo gi daya; nj manwani ya kutala; ku biwa vanwani, vanwani va dawa.

⁶Yena i wa ha hi ni nʼwana munwe a ranzekako; hi kugumesa a mu ruma ka vona, aku: Va tava ni xichawo ka nʼwana wa mina.

⁷Kanilezi a varimi va lo wulawulisana xikari kabye, vaku: Hi yena mugi wa tshomba, ngonani hi ta mu daya, higa tshomba yakwe.

⁸Va lo mu khoma, va mu daya, va mu hoxa lahandle ka xivina.

⁹I ta maha yini a nwinyi wa xivina ke? I tata a ta lovisa lavo varimi, a nyika xivina ka vanwani.

¹⁰A mu se ku gonza a mutsalo lowu wu nge ngalo: A ribye legi gi nga aliwa hi vaaki, Gi mahile a hloko ya magumo; [195]

¹¹Lexi xi mahilwe hi Hosi, Xa hlamalisa mahlweni ya hina.

¹²Va lo lava ku mu khoma, kanilezi va chava xidlemo; hakuva va wa zi tiva lezaku a mufananiso lowu i wulawula ha vona; va lo mu siya, va famba. [196]

¹³Zonake va lo ruma ka yena a vokari va vaFarisi ni va ka Herodi, lezaku va fela ku ya mu hika kuwulawuleni. [197]

¹⁴Va lota, va taku kakwe: Mugonzisi, ha zi tiva lezaku u wula zinene, a ku chavi munhu, hakuva a ku cuwuki a xiyimo xa vanhu, kanilezi u gonzisa a ndlela ya Nungungulu hi zinene. Xana zi fanele ku yisa nzhuvo ka Kesari, kutani a hi zona ke? Hi luva, kutani hi nga luvi ke?

¹⁵Kanilezi yena na a tiva a wuxengeteli gabye, aku ngalo ka vona: Mu nzi ringela yini ke? Nehani a denario, kasi nzi fela ku yi wona.

¹⁶Va yi neha. I te ngalo kabye: Ngwa mani a mufananiso lowu ni kutsala loku ke? Vaku ngalo kakwe: Za Kesari.

¹⁷Jesu aku kabye: Tlheliseni ka Kesari lezi zi nga za Kesari, ni ka Nungungulu lezi zi nga za Nungungulu. Va lo hlamala nguvu ha yena.

¹⁸Zonake ku lota ka yena a vaSadusi, lava va nge ngalo a ku kona kuvuka hi ka vafileko; va ta mu wutisa, vaku: [198]

¹⁹Mugonzisi, Mosi i lo hi tsalela le? zaku loku nakulobye wa munhu afa, a siya sati, na a nga hi na nʼwana, a nakulobye i ta hlambela sati wakwe, kasi ku mu vuxela mbeleko. [199]

²⁰Ku wa hi kona a ntlhanu wa vanakulobye ni vambiri; a nhonzwa yi lo teka sati, yifa na yi nga siyangi nʼwana;

²¹ni wa wumbiri i lo mu hlambela, a sufa, na a nga siyangi nʼwana; zinghaho ni wa wunharu.

²²A vantlhanu ni vambiri a va siyangi vana; hi magumo ya vontlhe afa ni wasati.

²³A kuvukeni ka vafileko, i ta maha sati wa mani xikari ka vona, hakuva i wa mahile sati wa vona: vontlhe va ntlhanu ni Vambiri?

²⁴Jesu aku ngalo ka vona: Xana a mu lahlekangi, hilezi mu nga yi tiviko mitsalo, hambu ni ntamu wa Nungungulu ke?

²⁵Hakuva loku va vukile hi ka vafileko, a va ha teki, hambu ni ku tekiwa, kanilezi va ta kota tingelosi ta le tilweni. [200]

²⁶Kanilezi hi kukumbuka a kuvuxiwa hi ka vafileko, a mu gonzangi bhukwini ga Mosi, hi wutshamu gi wulawulako hi xihlahla, lezaku Nungungulu i lo wulawula kakwe, aku: Nzi Nungungulu wa Abrahama, ni Nungungulu wa Isaka, ni Nungungulu wa Jakobe? [201]

²⁷Yena a hi Nungungulu wa vafileko, kanilezi ngwa vahanyako. Mu lahlekile nguvu!

²⁸Ku lo tshinela munwe wa vatsali, loyi a nga vazwa na va kari va wutisana, na a zi tiva lezaku Jesu i va hlamulile khwatsi, i lo mu wutisa, aku: Hi wihi a nayo wo ranga ka yona yontlhe ke? [202]

²⁹Jesu i lo hlamula, aku: A nayo wa kuranga hi lowu wu nge ngalo: Ingisa, Israeli! A Hosi Nungungulu wa wena i Hosi yinwe. [203]

³⁰U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontihe, ni kupima ka wena kontlhe, ni ntamu wa wena wontihe.

³¹Ni wa wumbiri hi lowu: U ta ranza wakelene na wena kota lezi u ti ranzako wena. A wu kona nayo munwani wa hombe ku hunza leyi. [204]

³²A mutsali aku ngalo ka yena: Hi zona, Mugonzisi, u wulile khwatsi lezaku i Nungungulu munwe; a ku na munwani ahandle ka yena. [205]

³³Ni ku mu ranza yena hi mbilu yontlhe, ni kupima kontlhe, ni ntamu wontihe, ni ku ranza wakelene kota munhu a ti ranzako wutsumbu, za hunza nguvu minyikelo yontlhe yo hiswa ni miphahlo. [206]

³⁴Laha Jesu na a wonile lezaku i hlamule hi kupima, aku ngalo kakwe: Wena a ku kule ni mufumo wa Nungungulu. Zonake ku wa nga hi na munhu a nga tiya ku mu wutisa nchumu. [207]

³⁵Laha Jesu a nga kari a gonzisa lomo tempeleni, i lo wutisa, aku: Hikuyini a vatsali va wulako lezaku Kristu i Nʼwana Davida ke? [208]

³⁶Kasi Davida i wulile hi Moya wa ku Basa, aku: Hosi yi te ngalo ka Hosi ya mina, Tshama hi le reveni ga mina ga xinene, Kala nzi veka a valala va wena a kuva xikhegetelo xa mikonzo ya wena. [209]

³⁷Loku Davida wutsumbu a mu vitana aku Hosi, makunu i nʼwana wakwe hikuyini ke? A xidlemo xa vanhu xi lo muzwa hi kutsaka.

³⁸A kugonziseni kakwe aku ngalo: Tlharihani hi vatsali, lava va ranzako ku famba na va ambele a tinguwo to leha ni ku losiwa lomu maphangweni, [210]

³⁹ni zitshamu za le mahlweni lomu masinagogeni, ni matshamu ya le mahlweni le mibuzweni;

⁴⁰kanilezi na va phanga a tiyindlu ta tinoni, a xikhati va mahako mikhongelo yo leha. Vona va ta tsayiswa hi tsayiselelo wa hombe. [211]

⁴¹I lo tshama kusuhani ni laha va nga wa nyikela minyikelo, a wona lezi a xidlemo xi nyikelisako zona a mali xikhwameni xa minyikelo; ni vanyingi va fumileko va wa chela yo tala. [212]

⁴²Ku lota a noni ya xisiwana, yi ta chela a malana mambiri ma ringanako ni dezana.

⁴³Jesu i lo vitana vapizani vakwe, aku kabye: Hizinene nziku ka nwina: A noni leyi ya xisiwana yi chelile ku hunza vontlhe lava va chelako xikhwameni xa minyikelo; [213]

⁴⁴hakuva vona vontlhe va chelile na zita hi ka leʼzinyingi zabye, kanilezi yena hi kuvumala kakwe i chelile zontlhe lezi a nga hi nazo a nga tsumba ku hanya hi zona.