Read tshwa Marku 15 Bible Online

Marku 15 - tshwa bible

Marku 15

¹Ni mixo a vapristi va hombe va lo xuxa khungo zinwe ni masingalakati ni vatsali, ni hubye yontlhe; zonake va lo boha Jesu, va famba naye, va ya mu nyikela ka Pilatu. [260]

²Pilatu i lo mu wutisa, aku: Hi wena hosi ya vaJuda ke? A hlamula, aku kakwe: U wula zona, [261]

³A vapristi va hombe va lo mu kecara hi timhaka tinyingi.

⁴Pilatu i lo mu wutisa kambe, aku: A ku hlamuli nchumu ke? Hi ngazwa a timhaka tinyingi leti va ku kecarako ha tona!

⁵Kanilezi a nga hlamulangi nchumu, laha ka kuva na Pilatu a hlamala. [262]

⁶Laha mubuzweni Pilatu i wa tolovele ku va tlharihela a peresu yinwe, leyi va nga vi kombela. [263]

⁷Kuwa hi kona munwe a nga vitanwa Barabasi, a nga bohilwe zinwe ni vanwani va nga vuxile mubango, Va daya vanhu laha mubangweni.

⁸A xidlemo xi lo tshinela, xi sangula ku kombela Pilatu ku maha kota lezi a nga tolovela ku va mahela.

⁹I lo va hlamula, aku: Ma zi ranza lezaku nzi mu tlharihela a Hosi ya vaJuda ke?

¹⁰Hakuva yena i wa zi tiva lezaku a vapristi va hombe va mu nyikele hi matshoho.

¹¹Kanilezi a vapristi va hombe va lo kucetela a xidlemo lezaku ngha a va tlharihela Barabasi. [264]

¹²Pilatu i lo engeta aku ka vona: Nzi ta maha yini kasi hi loyi mu mu vitanako muku i hosi ya vaJuda ke?

¹³Va lo kanyuluka kambe, vaku: Mu belele.

¹⁴Pilatu aku kabye: Hikuyini, kubiha muni a ku mahileko ke? Kanilezi va lo kanyuluka nguvu, vaku: Mu belele.

¹⁵Pilatu na a ranza ku tangalisa xidlemo, i lo va tlhatlhela Barabasi; zonake i lo xupula Jesu, a mu nyiketa a kuva a belelwa. [265]

¹⁶A masochwa ma lo mu yisa ndlwini ya wuhosi, lomo ka xigodlo; ku tsombana kona a ntlawa wontihe.

¹⁷Va lo mu ambexa a xiwunguwungu, va luka a xidlodlo xa mizwa, va xi tlhateka hlokweni yakwe;

¹⁸va sangula ku mu losa, vaku: Xewe, Hosi ya vaJuda.

¹⁹Zonake va lo muba hloko hi musengele, va mu phelela mari, na va mu khizamele.

²⁰Laha na va mu tseketsele, va lo mu tlhatlha a xiwunguwungu, va mu ambexa a tinguwo takwe, va mu fambisa handle a ku ya mu belela.

²¹Vona va lo kurumeta a muhunzi a ngata hi le masinwini, lezaku a famba navo a rwala a xihambano xa Jesu; i wa hi Simoni wa le Kirene, a raru wa Alexandro na Rufusi. [266]

²²Va lo mu yisa wutshanwini ga Golgota, hi kutlhamuselwa ku ngalo: Wutshamu ga xikodo;

²³va mu nyika vinya na gi xanganyelwe ni mure, kanilezi a nga gi nwangi.

²⁴Laha na va mu belele, va lo avelana a tinguwo takwe xikari kabye, na va ti hlahluveta, lezaku hi yihi a ta nga teka munwe ni munwani. [267]

²⁵Ku wa hi xikhati xa wunharu laha va nga mu belela.

²⁶A mutsalo wo komba nanzu wakwe wu wa tsalilwe lezaku, l Hosi ya vaJuda.

²⁷I lo belelwa zinwe ni vaphangi vambiri; munwe hi reveni gakwe ga xinene, ni munwani reveni gakwe ga xibhabha. [268]

²⁸Hi laha ku nga tatiseka a mutsalo lowu wu nge ngalo: I lo hlayiwa zinwe ni vahambunyeti. [269]

²⁹Lava va nga hunza va lo mu rukatela, va chepeta hi tihloko tabye, vaku: Ha! wena u khungumuleko a tempeli, u yi aka hi masiku manharu, [270]

³⁰hi nga ti hanyisa ka, u chika xihambanweni.

³¹Zinghaho ni vapristi va hombe na va mu tseketsela, va wulawula zinwe ni vatsali, vaku: I wa hanyisa vanwani, kanilezi a nga zi koti ku hanyisa wutsumbu gakwe.

³²A Kristu loyi, a nga Hosi ya vaIsraeli, ngha a chika xihambanweni, kasi ha fela ku wona, hi kholwa. Ni lava va nga belelwe naye va lo mu rukatela. [271]

³³Hi xikhati xa wuntlhanu ni xinwe ku wa hi kona munyama tikweni gontlhe, ku kala xikhati xa wuntlhanu ni mune.

³⁴Zonake a xikhatini xa wuntlhanu ni mune, Jesu i lo vitana hi gezu ga hombe, aku: Eloi, Eloi, lama sabaktani? Lezo na ku tlhamusela ku ngalo: Nungungulu wa mina, Nungungulu wa mina, u nzi tsikele yini? [272]

³⁵Vanwani va lavo va nga yimile koha, laha na va zi zwile, vaku. Hi ngazwa, wa vitana Elija.

³⁶A munwe i lo tsutsuma, a ya tatisa a khuvi hi vinagre, a gi tihomeka lihlangeni, a mu nyika a kuva anwa, aku; Ma nga tsikani, ha nga wona loku Elija ata a ta mu chisa. [273]

³⁷Jesu i loba huwa hi gezu ga hombe, a nyikela moya.

³⁸A xisirelo xa lomu tempeleni xi lo hanzuka hi laha xikari, kusukela hehla kala lahasi. [274]

³⁹A nduna ya zana leyi yi nga wa yimile mahlweni ka Jesu, laha yi nga wona lezaku i fisa lezo, yiku ngalo: Futsi loyi munhu i wa hi Nʼwana wa Nungungulu.

⁴⁰Ku wa hi kona ni vavasati, lava va nga cuwuka na va hi kule; xikari kabye ku wa hi na Maria wa le Magdala, na Maria a nyine wa Jakobe loyi tsongwani na Jose, na Salome. [275]

⁴¹Hi lavo va nga mu lanzela, va mu tirela laha a nga wa hi le Galilea; ni, vanwani vavasati vo tala lava va nga kanziha zinwe naye Jerusalema. [276]

⁴²Laha gambo gi nga hlwile hi siku ga Kulongisela, lezi hi ku ngalo, hi siku gi rangelako sabado, [277]

⁴³ku lota Josefa wa le Arimatea, a nga hi nghanakana yi dumileko ya hubye, loyi na yenawu a nga wa cuwukela a mufumo wa Nungungulu; i lo tiyisa mbilu, aya ka Pilatu, a ya kombela xirumbi xa Jesu.

⁴⁴Pilatu i lo hlamala hilezi Jesu a nga hatlisa kufa, a vitana a nduna ya zana a ta yi wutisa, xana kale na a file ke.

⁴⁵Laha na zi zwile hi ka nduna ya zana, i lo vumela Josefa a ku teka xirumbi.

⁴⁶Yena i lo xava a nguwo ya wukene, a chisa xirumbi xa Jesu, a mu petsela ngubyeni, a mu veka lomu nkeleni lowu wu kehlelweko ribyeni; zonake i lo wumbulutela a ribye, a vala nyanga ya nkele.

⁴⁷Maria wa le Magdala, na Maria a nyine wa Jose, va lo wona laha a nga vekilwe kona.